2 ከደ ቆሮንቶስ 4

1ረባ ከመሌእላለማ በኸኬ መደዳ አለአ ካይላ፤ ካ ከምሪልሠኼ እልላኼ። 2ቢልበፀከሸንዥገን ዳ ኤተ በዪፀኮቆ ጸጋ ኤተ ቢደካ ከገጸፃኳ፤ ኢልደካኼ ከመንጠኸማ፥ ኢላገልክልኼ እገሸ ረባኼ። ከመትገሥ ኸማ ቢልከትገከሥ ጸግላ ኒል ጸጋ ኮዎማ፥ ቢልከኢካ ነታሰ ረባኳ። 3ኤከማጉንዳቆን ሰ ማገ ላ አል ረባ ኤተ ቢላቲከስ አይልኳ፥ ካሥ ደ በኢካ ነንዶ መቴያ በካጉንደካቋ። 4በፐሸከኸንዥገን ሴጠና ኤተ በደካ ከጥስ ኤበ እኔያ አለአ ጸጋ ደ በበፀካ መገሚል፤ ከለአ ኢፈለከሸኼ መገመሥ መዪዦጎ ሰ ማገ ላ አል ረባ ኤተ በትገከሥ ገሂን ክርስቶስ፤ ክርስቶስኳ መኮሥ ረባ። 5አይላ ቢላቲከስ ቢልከለካ ኤበደካ ያሱስ ክርስቶስ ኤታ፥ ኢልዪርካኼ እልቆምላ ኤኤታ ኢላቲከሰንኼ፤ አይላኸን ከፄ ያሱስ ደ መደዳለኻ። 6ረባ ኤተ ቤከል፥ "ነዪዦጎ መዪዦጓ ኒል መጓ"፥ አ በዪዥኮጎንዥገን መዪዦጓለማ ኒለምላ፤ ዳ በከጦካ አለአ፥ ኤከምገማን ጸጋ ገሂን ረባ ኤተ ባገምካሥ ኒልኽ ክርስቶስኳ። 7አይላ ደ በርኮቆ ዳ ኤተ መዥግ በና አለአ፥ አይላ ኤእንሤ ዬዛ፤ ከለአ በካትገካሥ ኤበዎኬ በቦቆ መዥጋ ኖጎ ረባ፥ ኖጎምላኼ። 8ቢላጥፀካቆ ከንዶ ኮዎማ ኢላሽልካሸኼኳ፤ ቢልኤምካ ዳ ኤተ ከምድላ፥ ኢልርከሠኼ እለምላኼ። 9ቢላሙቸካቋ፥ ረባኸን ኣምብከሸኼ አይላኼ፤ ቢፋተኮቆ አይላ ከኔያኳ፥ ኢልቴካኼ። 10ኤከማገማሥ ነጸግላ ያሱስ መዳለማ ኤተ መኢያ፥ ቢልጹርካ መዱጎክ ማቲሥ መሻለማ ነጸግላኳ። 11ኤከማገማሠን መኢ ያሱስ ነጸግላ ነኤተ ከምሻ፥ ሚልከኢ ነኤባ ናል እኔያ፥ መዱጎክ ከማተገሩቆ አይላ ከፄማ ከምኹዋ ከመሻ። 12ካ ዳ ኤተ በኢካ ነመደማ ነጸገምላ መዥግ መሻ፥ ነጸገኻኸን መዥጋ አል መኢያ። 13በከለካ ነመዪዥሥ ሎርጋ፥ "በርገምኪለንዥገና፥ ካ በርከገሸካ፤" ቢልገምኪል አይልኳ፥ ከለኣኳ ቢልከገሸካ። 14ቢልገምካ ረባ ኤተ በፈርኬቆ ኤቶኳ ያሱስ ነመሻ፥ ኤከምፈሮቆ አይላ ከኤቶኳ ከያሱስ፥ ኤከምሂኢቆ አይላ ከአኻ ነታሰማኳ። 15ቢልከደካ አለአ ኮዎማ ከፄኻ፥ ከፄ መፈገኽ መገ ኤከምፈገኻን ጸጋ ደ በኸካ መገ ላ ከገሂን ረባ። 16ከለአ ኢልርከሠኼ እልላኼ፤ ኤከምረከሸን አቆ ቤ ጸገምላ ከምከራኳ፥ ከምዳ እለምላኸን ኖካ ኖካ ኽኻ። 17መፐፐል ማኣንሠሣ ኤተ ቢልኢካን አይል ካሥ አንጅ ማ ከለአ፥ ከምዸብልካ ገሂን አል ግዢ ግዥ ኤተ ከመንተሮቆ ነኮዎማ። 18አይላ ቢልዪርኮጎ ካሥ ጎ ዳ ኤተ በበፀካ ማገማሥ ከኻ፥ ኢልዪርኮጎኼ ኮጎ ዳ ኤተ ማገማሥ ከኻኼ፤ ዳ ኤተ ባገምካሥ ከኻ ካሥ አንጅ ማ በኢካ፥ ዳ ኤተ በበፀካ ማገማሥ ከኻኸን ካል ግዢ ግዥ።

will be added

X\