2 ከደ ቆሮንቶስ 3

1ከማኩልልል እኽላኳ ከማጦዪልሽ መኸ መገ ላ ኪልቆምላኽ? ኤያሥ ኤያኳ ኤያሥ በጦካ አጸጋ ሜታ ሜታ፥ ከምዳኽ ካይላ አመዸብ ሎርገ መገ ላ ኤተ ከምትግልሥ ካኻ ፌት ኤተ ከምቆተኻ አኽ ካይላ? 2አኻ ኪልቆኻ ሎርጋለምላ፥ ኤተ ቢቆተኬ ኒለምላ፥ ኤተ በፈለከሽ ጸጋ ኮዎማ መሎቆሠማ ማምባለሠማኳ። 3አኻ በኻገምካይል መዳለኻ ሎርጋ አል ክርስቶስ ኤተ በከፐከሥ ከመደዳለምላ፤ ሎርጋ አለአ በላ መዳን ከደ ቦሻ፥ ኤተ ቢቆተካ ከገፉጨ ረባ መኢማ፥ ነከምደን ነግሻ፥ ኖቆ ጽሥ ጸጋ። 4ቢልከከለካ ኤለኣኳ፥ ከፄ ቢልጨካ መገሚላ በቦቆ ከረባ ከንዶጎ ክርስቶስ። 5ኤተ በጦካ ኤከምፈልልሽ መትቶቆ መደዳ አለአ፥ አረባ፤ አይላ ኪልቆምላ ከምፈልለሸኼ መደዳ ሜተልኼ። 6አ በጦካ አይላ ደ መደዳ አል ማገሲል ኽኻ፤ ማገሲል ኽኻ አለአ አል ገፉጫ፥ አል ኸ ሎርጋኼ፤ ኸ ሎርጋ ከምሮቆ ከመሻ፥ ገፉጫኸን ከምኻ መኢያ። 7ቢንፆ ማቶቋ ነግሻ ከኸ ሎርጋ። መደዳ አል ማቶቋ አለአ፥ ኤከምሮቆን ከመሻኳ፥ በጨካ ገሂን። ኤፈለሸንኼ አጸጋ አል እስራኤል መዪር ታሰ ሙሴ ከፄ ገሂን ካ ኤተ ቤኢ ከምቴያ። ካ ኤበጨካ መደዳ አል ማቶቋ ኤተ ከምሮቆ ከመሻ ገሂን፥ 8እንዘሥ ከምጫን መደዳ አል ገፉጫኳ በቦቆ ገሂን! 9ኤበጨካ መደዳ ኤተ ከምሮቆ ከመኸሣ ገሂን፥ እንዘሥ ከምጫን አመደዳ ኤተ ከምሮቆ ጸጋ ከመዪዥሣኳ፥ በቦቆ ገሂን! 10እኽላኳ ከፄ ባገምካሥ ዳ ኤተ በጨካ ገሂን በቦቆ፥ ኤተ ቤጨን ገሂን ገፀኳ፥ ባንዢገከንዥገን ገሂን። 11ኤበጨካ ኤተ ከምተራ ገሂን፥ እንዘሥ ከምጫን ኤተ ከምኢያ ካል ግዢ ግዥኳ በቦቆ ገሂን! 12ካ ቢለንዥገካይልኽ በቦቆ፥ ከፄ ቢልጨካ ሾከ ማጦዪላ አለአ። 13አይላ ኤያል ሙሴ ኤተ ቤያጉንዶቆ እልኸማ፥ ኤከምበፃ አጸጋ አል እስራኤል መገመሥ ማንደኻ ኤተ ቤኢ ከምቴያ ኒልኸማኼ። 14በተተሸከንዥገን እለማምኳ። ካሥ አል ኦካ አለአ ኤቢሎቆከሥ ነሎርገ ማገሲል ገፀ፥ ባሸካኽ ማጉንዶቋ ኒልኸማ፤ ኤተ ከምፈለከሽ አማጉንዶቋ አ መፐሣ፥ ካሥ ከክርስቶስ። 15ካሥ አል ኦካ አለአ ኤቢሎቆከሥ ማቶቋ አል ሙሴ፥ ባጉንደኮቆ አማጉንዶቋ አ ቆጽሠማም። 16ኤከምኮሌ ጸጋ ኮጎ ኤታኳ፥ ከምቼያሥ አማጉንዶቋ አ። 17ኖጎ አለአ ሳ ኤተ በከለካ "ኤታኳ፥" መጨገሰማኳ መዪዥሥ ገፉጫ። ኖጎ በኢካ ገፉጨ ረባኳ፥ በኢከን አመፐሣ ነኤለ ማቶቋ አል ሙሴ። 18አኳ ኮዎኳ በላ ማጉንዶኮቆን እልኾኳ ባንደከኽ ገሂን ረባ ኒልኾኳ፤ ከለአ ከማንዦኮካይል ከምዶኳን ኤጸገማ ከመንዞኲል ከበቦቆ ነገሂን ረባ። ኤተ ከምደካ አለኣኳ፥ ከገፉጨ ኤታ።

will be added

X\