2 ከደ ቆሮንቶስ 13

1መዌያለም ኮጎኻ ከለአ እል ኦካግ፤ በቆተካንዥገን ነመዪዥሥ ሎርጋ በከለካ፥ "በካገምካይል እገሻ ኮዎማ ከሹዳ ከምበንድ ኤያሥ ኤያ ከደ ኦካግ።" 2በርገሸከሠንዥገን ካል ገሲቋ ኖከ ቤርኢዬ ኪል እምበንድ ኖጎኻ፥ በርገሸከሥ እኽላ ኖከ በርሃተካቋኳ፤ ኖከ ከምኮለሬ ከምሌአራይልኼ ከደ በደካ ገንሣ ካል ገሲቋ ከጃጀንዳ ኮዎማኼ። 3ከለአ ከምዸበኸካ ማቲሥ መዥጋ ኤተ በኻኣጎካ፥ ኤበገሸካ ክርስቶስ ከንዶጎም። አ ኖጎኻ መዥገማ፥ ኮጎኻ መሌኤማኼ። 4ኤቢቱን ክርስቶስ ነጋገድ ጃ ነመሌኣለማኳ፥ በኢካ ከመዥጋ አል ረባ፤ አይላኳ ኖጎማ መሌኤማ፥ ከመዥጋ አል ረባኸን ቢልኢካ ከክርስቶስ ሜተም ከምደማ ካኻ። 5ዪርኻ ጸገኻ፥ ሎቆኸሥ እልቆኻ ኤከምኢያ በኸከኢካ ከመገሚላ። አኻምባለከሠንኼ ነጸገኻ ኤበኢካ ያሱስ ክርስቶስ ኒልኻኽ? ኤከምበፀኻ ማምባለኸሥ አለአ፥ በኸፋተከንዥገን ነመኢ ደ ገዴራ። 6በራጦኪልኸን ኤከማምባለኸሥ ኤቢልበፀካ መፋትላ ነለአ። 7አይላኸን ቢልዴረካ ከረባ፥ ኤከምበፀኻን አኽ መደኻ ገንሠ ዳ። ዳ ቢልከጦካ አለአ፥ ኤከምኢላን አይል ኤዳ ቢልፋታኳ፥ ኤከምጦኻን አኽ ገሸለማ፥ ከመትገሥ ኤቢልደካ አይል ማኸማኼ። 8አይላ ቢልደካ ካሥ ኸገሻ፥ ኢልፈለከሸኼ መደማ ነኸገሻ ዳ ሜተልኼ። 9ቢላገ ካይል፥ ኖከ ቢልደካ አይል መሌኤቆማ፥ ኤበኸደካ አኽኳ መዥገማ፤ ኤተ ቢልከዴረከሥ አይል ረባኳ፥ ኤከምደኻን አኽ ከደ መትቶቆማ። 10ዳ በርከቆተካ አለአ ካኻ መርከሃታቆ ኖጎኻ፥ ኖከ ከምዎሬ ኮጎኻ ኤከምበፀራ መዥገራ እል ካኻ ከገፋሌያ ኤተ በኸኬ ኤታ ካራ። ገፋሌያ አለአ ከመኮሸማ፥ ከመብማኼ። 11ኮጎ መርሸማ፥ ኢዴበም፥ ኣገ ኻይል። ሻምበኻ ኤከምደኻን ደ መትቶቆማ፥ ገሰኾቆ እገሻለም፥ ኣገሰኺልስ፥ ኣኢኸካ ከመገማኳ! ነድ ረባ ከአኻ ኤተ በደካ ኪልቆማ ማሄሻ ከመገማኳ። 12ኣፅምኻ ኣሥ እልኸኻ ኤመኢ ደ ገዴራ፤ ደ ገዴራ ኮዎማ ቢትገካ ዳገ ካኻ። 13መገ አል ኤታ ያሱስ ክርስቶስ ነድ ከኮዎኻ፥ ከማሄሻ አል ረባ፥ ከመዪዥሥ ገፉጫ ከሜተምኳ።

will be added

X\