2 ከደ ቆሮንቶስ 12

1ኤከምበፃን አመሾጓ መጫ በናኳ፥ ከምዳ መሾጓ ካራ፤ እኽላ በራኣጎካ መገሻ ከፄ መጎሎጓ ከማትጋሣ ኤተ በኸኬ አኤታ ካራ። 2በርገምካ ጸጋ ሜታ ኤተ በደካ አል ክርስቶስ፥ ኤተ ቢሦ ነጎዛ ከምጻ ነግዣ አሤር ኖቆማ እንዝኽ ነገሲቋ፤ አርገምካኼ ኤቤደምድ አለአ ከበጨ ጸገማ ፌት ከመጎሎጓኳ፤ ኣሥ ረባ በገምካ፥ አርገምካኼ አራኼ። 3በርገምካ ጸጋ አለኣኳ፥ አርገምካኼ ኤቤደምድ ከበጨ ጸገማ ፌት ከመጎሎጓ፥ ኣሥ ረባ በገምካ፥ 4ኤቢሦ ከጀናታ፥ ቤገሶቆ እገሻ ኤተ በበፀካ ማፈላሽ መገሸማ፥ ከኤተ ባሃለከሽ አጸጋኳ መገሸማ። 5አራ ከምሸርኮጎ ከአ፤ ኪልቆምኸን ኤከምዳ ገማዋለም፥ አርጨከኼ ዳ ኤታ ከምሸርኮጎኼ። 6ኤከማኣጎራ መሾጓ፥ ከፄ ከመገሸራ ኸገሻ ከምደራኼ ተሞኼ። ኤከምበፃን ጸጋ መዪራ አራ በቦቆ ነዳ ነኤተ ቢገምከሥ ነጸገም ቢገሰኮቆ ነሰምኳ፥ ከምበፀርከሽ መሾጓ። 7ኤከምበፀራ መዻቆርከኸን ጸገም ከምጻ ከበቦቆ መጎሎጓ ከለአ፥ ቢጦሥ ነጸገም ዳ ኤተ ከምቆሻ በጨ ጸገም፤ ዳለኣኳ ኤከምበፀራ መዻቆርከኸን ጸገም ከምጻ፥ ከምኦቻ አራ ኤዳ ቢትጌ ኖጎ ሴጠና። 8ቤርዴር ከኤታ ኦኪል ኦካግ፥ ኤከምቼሠን ሰ ገትገ ሴጠና አለአ ነጸገም። 9አኸን ቤኮሎቆ ካራ ቤከል፤ "መገለም በትተካ ካም፥ መዥጋለም ነገማዋሉ መዥገማ።" ከለአ ኤከምኢያን አመዥግ ክርስቶስ ኒለም፥ ከበቦቆኳ ከምሸርኮጎ ከገማዋለም። 10ካ በራገካይል ከፄ ክርስቶስ ነገማዋ፥ ነገ ያ፥ ነማኣንሠሣ፥ ነማሙቾቋ ነማፉንጫቋኳ፤ ዳ በርካገካይላኳ፥ ከፄ በረንዥገካሥ ኖከ ገማዋለምኳ። 11ከመሾጓለም ኤበርደካ ተሞኳ፥ ኤተ በደከሽ አራ አኻ፤ ኤበኸመኽ አኽ መገ ላ ካራ፥ በመድ ካኻ። ኤበርደካን ጸጋ ኤታ በንዢገካ በናኳ፥ አርሃለካቆኼ ነሰ ገትጋ ነደ በንተርኮቆ ኮዎማ ከንዶጎ ሜተልኼ። 12ዳ ኤተ በትገከሥ መዳለም ሰ ገትገ ክርስቶስ ኸማ፥ በላ መርሸን በደከንዥገን ኖጎኻ፤ አኳ ዳ አል ገተምዛ፥ ከጋገሸል ዳ ከመዥግ በቦቆ መደዳኳ። 13ኣሥ መዳለም ካኻ ከገጹራ፥ አኢካንኼ ዳ ኤተ በፀካቆስ ካኻ ነገሙንፀ ደ ገዴራ ጃጀንዳኼ፤ በፀኸካረሽ መሸ ሠማለም አለኣኳ። 14ከኦኪል ኦካግ በርገ ከሠንዥገን ከመዌያ ኮጎኻ፥ ከምደራኼ ካኻ ከገጹራኼ፤ በራኣጎካ ኣሥ አኻ፥ አራኣጎካኼ ለማናለኻኼ። ኤተ በሙንፀኮቆ ደ መጫ ከኢዳለማም አዶጎ ኤበማም፥ አሙንፆቆኼ ኢዳ ከዶጎ ኤበማኼ። 15ካ ዳ ኤተ በርጨካ ኮዎማ መኢያለምኳ፥ በርሄከሽ መቼርሥ መኸራ ከፄኻ። ኤበርሄከሽ አር አኻ ዝንዜን፥ አኸሄሸን አኽኳ አራ ዱፀናኽ? 16ነደንኳ፥ በኸገምካ ኤበርበፀካ መደራ ካኻ ከገጹራ፤ አኽኦከሥ አኽ ኤዳ በርደካ መዥግ እልኸማ፥ በርጦከሥ አኻ ኒል ኤለም ከመዥግ እልኻለማኽ? 17ነደ ቤርትግ አር ካኻ፥ ከንዶጎ ጸጋ ሜታ ኤርንጠኽ አኻ ኤርሰን ዳ ነጸገኻኽ? 18ኣዬ፥ በርከገሸከንዥገን ከቲቶስ ኤከምዌ ኮጎኻ፥ በርትገከንዥገን እማም ከዱዌባ ከአ። አንጠኬኽ ቲቶስ አኻ አሰኬሠን ዳ ኖጎኻኽ? ቢልደካ አይልኳ ካሥ ከእላ ከሜተምኼያኽ? ቢለንዸካ ቾጓ ሜተምኼያኽ? 19ኢገም በኽኦከሥ አኽ ከደኽላ፥ ኤዳ ቢልጻንደኮቆ እገሻ ነጸገምላ ነታሰኻ። ኤኤለኣኼ ዶጎ መዠም፤ ቢልገሸካ ከንዶጎ ክርስቶስ ነታሰ ረባ፥ ቢልደካ ዳ ኮዎማኳ ከመንዥገሥ አኻ። 20በርጤካ፥ ኖከ ከምዎሬ ኮጎኻ ከምገመርሠኼ አኻ ኤያሥ በራኣጎካ መገመሥ አኻ፤ ከምገመኸሠኼ አኻኳ አራ ኤያሥ በኻኣጎካ መገመሠማኼ። በርጤካ ኤከምኢያ ማከለማ፥ ገንሠ እላ፥ ማኦሣ፥ መኢይሣ፥ መቴሥ ፄ ጸጋ፥ ማገሾቆ ጸጋ፥ መተኮሥ ጸገ ጸጋ፥ ማንደ እገሻኳ ኖጎኻ። 21በርጤካ፥ ኤመኮለሬ ከምዎሬ ኮጎኻ፥ ረባ ከምሃሎቆ አራ ነታሰኻ፥ ከምእሰራ ከበበኽ ጸጋ ደ በደካ ገንሣ ካል ገሲቋ፥ ከፄ ቢበፀካ መበፁሽ ጎሲያለማም፥ ለሙራ፥ ከመቴሽ ጸገጸጋኳ መኮሉዌ ከንዶዋ።

will be added

X\