2 ከደ ቆሮንቶስ 1

1አራ ጳዉሎስ ከማሄሻ አል ረባ ኤተ በርደካ ሰ ገትገ ያሱስ ክርስቶስ፥ ከዱዌበም ከጢሞቴዎስ ቢልቆተካ ገትጋ አለአ ከገሙንፀ ደ ገዴራ አል ኤበ ቆሮንቶስ ኤያሥ ኤያ ከደ ገዴራ ካል ኣካያ ከኮዎማ። 2ነድ መገ ከመገማ አል ረባ በቦኳ፥ ካል ኤቶኳ ያሱስ ክርስቶስኳ ከአኻ። 3ነከድ መገ ላ ከረባ፥ ከኤተ በዎኬ አመንዥገሣ ኮዎማ ኖጎማ። አ በበ ኤቶኳ ያሱስ ክርስቶስ፥ ኤተ መሌእላኳ። 4ረባ በንዥገከሥ አይላ ነማፉንጮቋ ነኮዎማ፥ ኤከምፈልልሸን አይል መንዥገሥ ጸጋ ጃጀንዳ ደ በኢካ ነማፉንጮቋ ነሾካብኳ፥ ከመንዥገሣ ከኤተ ቢልዸበካ ኖጎ ረባ። 5ኤያሥ ቢላምጹሸከኽ በበኽ ማኣንሠሣ አል ክርስቶስ፥ ኤያሥ ኤያኳ ከምዸብልካ በቦቆ መንዥገሣ ከንዶጎ ክርስቶስ። 6ኤቢላፉንጨካቆ አይል፥ ከምዳ አኳ ከበነ ከመንዥገሣለኻ ከመብዳለኻኳ። ኤከመንዥግላሥ አይል፥ ከመንዥገኻሥ አኻኳ፥ ኤከምፈለኸከሽ መቀሞቆ ማኣንሠሣ ኤተ ቢልኢከን አይል። 7ቢላጦኪል ነጸገኻ በቦቆ። ኤያሥ በኸምጹሸከኽ ማኣንሠሣለምላ፥ ቢልገምካ ኤከመምጹሸኸኽ መንዥገሣለምላኳ። 8ኢዴበም! ከምጸፅልቆኼ ካኻ ማፉንጮቋ ኤተ በደካ ነጸገምላ ነጋጦቆ እሲያኼ። ማፉንጮቋ አ ነኤተ ቢልፈለከሽ አይል መጹረማ፥ በሂንካ ካይላ በቦቆ። ካ ቢልርከሥ እለምላ ከመኢያኳ። 9ቤኢ ካይላ ኤዳ ቢኸሥ መሻ ካይላ፤ ዳ ቤከድ አለአ፥ ኤከምገሚልል ኣሥ ረባ ኤተ በፈርኮቆ ደ በሸካ፥ ኤከምገሚልል ጸግላኼ። 10አ በብደኮቆንዥገን አይላ ነማፉንጮቆ መሻ፥ ከምብዶቆ አይላ ካለንኳ፤ ቢላጦኪል ካ፥ ኤከምብዶቆ አይላ ነለአ ከገትኳ። 11ተጸኸሥ አኽኳ አይላ ከገዴራለኻ፤ ኖካ ና ከምኸካ አበበኽ ጸጋኳ ከመገ ኤተ ቢልዸበካ ኖጎ ረባ፥ መገ ላ ከረባ ከፄ አይላ። 12እልላኳ በደካ ኸገሻ፥ መኢያ ኤተ ቢልከኢካ አይል ነኤባ ናል እኔያ ነለአ፥ ከበቦቆኳ ማርቻሣሎኳ ኤበደካ በላ ማጸፅልቆን እልላ። መደዳለምላኳ ከመዪዥኽ እላ ከኤተ በኸኬ ረባ ካይላ። ዳ ኤተ ቢልከሸኮጎ አይልኳ ከለአ። ነደንኳ፥ ዳ ኤተ ቢልከፈለከሽ አይል መኢያ ኤኤለአ፥ ከመገ አል ረባ፥ ከመገመኻ አል ጸጋኼ። 13ቢልቆተካ ካኻ ዳ ኤተ ከምፈለኸሽ መሎቆኸሥ ማገመኺልኳ፥ ኢልቆተካንኼ ዳ ጀንዳኼ። ከማጦሪል፥ 14ኤያሥ በኻምባለከሥ አይላ እኽላ ጎ ሜተም፥ ኤከማምባለኸሠን አይላ ካለን ነኮዎማኳ፤ አኳ ኖከ ኤታ ያሱስ ኤከምሸኸኮጎን አኽ ከአይላ ኤያሥ ቢልከሸኮጎ አይል ከአኻኳ። 15ከፄ በርጨካ ማጦዪላ አለአ፥ በርዻምበካ ካል ገሲቋ መዎሬ ከመዪርቆ አኻ፥ ኤከምኻ አረባ መገ ካኻ እል እምበንድ። 16በራኣጎካ ነቾጎ መዻለም ከማቀዶኒያ ኤበርምዌ መዪርቆ አኻ፤ ኖከ በርምኮሌ ነማቀዶኒያኳ ኤያሥ ኤያ በርምዌ ኮጎኻ፥ በኸመተጸሥ አኻኳ አራ ነቾጎ መዻለም ከኤበ ዪሁዳ። 17አርዪርካ አር ቾጎ መንዻለም አለአ ኤደ ጋሲያኽ? ኤያሥ ኤያኳ ከመንጦራ መንዻለም ኤያል ጸጋ አል ኤበ እኔያ፥ ከምከለራ ከሳ ከሜተል "ኣዬ" "ከምበኣኽ?" 18ኤያሥ ረባ በደካ መገሚለማ በገሸከሥ ኸማኳ፥ ኤያሥ ኤያ እገሻ ኤተ በርገሸከሥ አር ካኻ ከሳ ሜተም "ኣዬ፥" "እምበኣኼ።" 19ዱ ረባ ያሱስ ክርስቶስ፥ ኤተ ቢላቲከስ ካኻ ከሲልዋኖስ ከጢሞቴዎስኳ ኣሥ መከላ "ኣዬ" በኢካ ኖጎማ፥ ኤኢንኼ ኖጎማ "ኣዬ" "ከምበኣኼ።" 20ሳ ኤተ በካጦኪል ረባ ኮዎማ ከንዶጎ ክርስቶስ በትተካቆ "ከኣዬ፤" ከለአ አኳኳ ከንዶጎማ ከምከላ "ኣሜን" በኮከኸካ ገሂን ከረባ። 21ረባ በጦካ ኤከመንዥግላሠን አይል፥ ኤከመንዥገኻሠን አኽኳ ነመገሚላ ከክርስቶስ፤ አ በሽለከሥ አኳ፥ 22ኤከምዶኳን ካለማ በጦከንዥገን ማቲሣ ነጸጎኳ፥ በጦከሥ ኒሎኳ መዪዥሥ ገፉጫኳ፥ ኤተ ከምትገሥ ኤከምኻ አረባ በበኽ ዳ ካኳ። 23ከምኦራ ረባ ከሹዳለም። ዳ ኤተ በርከበፀካ መኮለሬ ከቆሮንቶስ፥ ኤከምበፀራ መቱርሠን እልኻ። 24ቢልገምካ ኤበኸዥገካ አኽ ነመገሚላ። ቢልከደካ ካኻ ኤከማገ ኻይለን አኽ፥ ኢላኣጎካኼ መዳ ነመገሚላለኻ ከኤተማኼ።

will be added

X\