1 ከጢሞቴዎስ 6

1ደ ቢኢካ ነሲ ዎደ፥ ደ በደካ መደዳ ከደ በበፀካ መዳ ደ ገዴራ፥ ኒከኽ ገሂን ኤተ ከምዳ ከኤተማም። ኖካ ና ከመገሻኼ ጸጋ ገ ያ ከፄ ረባ ከመትገሣሎኳኳ። 2ዋደ ደ በደካ ዳ ከኤታ ኤተ ገዴራ፥ መሠኼ ኤተማም ከፄ ቢደካ ኮዎማም ከንዶጎ ገዴራ ደሌባ። ከፄ ቢደካ ኤተማም ደ ገዴራ በሄከሽ ረባኳ እማም ከመተጸማኳ ከፄ ቢሻምበካ እማም ከመደ ገሸል ዳ፥ ኒድ ከበቦቆኳ። ትገሥ አለአ፥ እገሸሥኳ! 3ጸጋ ኤተ ከምትገሥ ዳ ጀንዳ፥ ጸጋ ኤተ በበፀካ ማኩቆ እገሻለማ ከገሻ አል ኤቶኳ ያሱስ ክርስቶስ ከመትገሣ አል መገሚላሎኳኳ፥ 4አ ኤተ መቶኮሥ ጸገማ ኣምባለከሠኼ ዳ ሜተልኼ። በከዥገኪለንዥገን ከማከለማ ከመንሳ ኤገንሠ መዹማ፤ ከምሮቆ አለኣኳ ከገንሠ እላ፥ ከማቱሣ፥ ከመቴሥ ፄ ጸጋ፥ ከማጦሥ ጸጋ ከገንሠ ዳ፥ 5ከማገሻ ቆሳ ከጸጋ ነበበኽ ዳኳ። ሾከ ጸጋ አለአ በንሠከንዥገን ሳምቢርቆማም ቢበከኸንዥገን ኸገሻኳ። ቢኦከሥ እማም እንዶ ገዴራ ኤማጸጫ። 6ኸገሻ፥ ከምጫ አመዥጋ ነንዶ ገዴራ በቦቆ በና፥ ኤከምነቆ ኣሥ ኤተ ቢጨካ። 7አኮርኬቆንኼ ዳ ሜተል አኳከዎኬንኼ ከኤባ ካል እኔያኼ፥ ከምርኮቆኼ ዳ ሜተል ኒለማኼኳ። 8ኤከምጮኳ ዳ ኤተ ከምሶኳ ከምኢሰኮሥኳ፥ ከምትታ ካኳ። 9ደ በኣጎካ ማጸጫኸን፥ ከምፋቱዋ ነማዻምባ። ከማዻቁዋሽ ነበጎላምባ ኤተ በዻቆከሽ ጸጋ ከመአጀበ አል መንጣኻ ከበበኽ ገንሠ መአጀባ ኤተ ከምቴሥ ጸጋ ከምኩቆ እማም ከመፂ ጺያ። 10ነዳ በዎኬ አገንሠ ዳ ኮዎማ ነመሲያሣ ከለማና። ከፄ አለአ በሽጠካ ጸጋ ሜታ ሜታ መገሚላለማም፥ ቢርኮቆንዥገን ኪልቆማም በቦቆ ማፉንጮቋኳ። 11አም ጸጋ አል ረባ፥ ሃታሥ ነዳ ነለአ ነኮዎማ! ሻምብ ከዳ ኤተ በኦከሽ ረባ፥ ዥግ ነንዶ ገዴራ፤ ሻምብ ነመገሚላ ነማሄሻ፥ ነገቀማ ነመሌእላኳ። 12ዥግ ነገሸል ማቆራ ናል መገሚላ፤ ራቆሽ መኢያ አል ግዢ ግዥ፥ ኤተ በከኦኬ ረባ አም፥ ኖከ ባቲከሥ አምኳ ኸገሻ ዝንዜን ነታሰ ደ ገዴራ በበኽ። 13ከመገሸራ ካም ነታሰ ረባ ኤተ በኢኮቆ ዳ ኮዎማ፥ ነታሰ ያሱስ ክርስቶስ ኤተ ቤድ ኸገሻ ዝንዜን ነኸ ጴንጦስ ጵላጦስኳ፤ 14ካሥ አል ኦከ ከማትጋሥ ኤቶኳ ያሱስ ክርስቶስ ጦሥ ነመደዳ ማገሸሣ ኤተ ባኸካዬሽ ካም፥ በላ መጫን ቆቆማ ከመምበድዞቆማኳ። 15ማትጋሥ ክርስቶስ አለአ ከምጦዋ አረባ ካል ኦከ ከማገ ከሣ። ረባ ኤተ በከኸካ አጸጋ ኮዎማ መገ ላ፥ ኤተ መሙቾቆማ ኣሥ አ፥ አ ጥስ ዶጎ ጥሳ፥ ኤተ ዶጎ ኤታኳ። 16ኤተ በበፀካ መሻ ኣሥ አ፥ በኢካ ነመዪዦጓ ኤተ ከምበፃ አጸጋ ሜተል ማርቸሥ፥ አገምከሠንኼ ጸጋ ሜተልኳ አ፥ ከምፈለሸኼ ሜተል መገመሠማኼ። ነድ ከአ ገሂን ከገፋሌያ ካል ግዢ ግዥ። ኣሜን። 17እገሸካ ከደ መጨ ለማና ካል ኤበ እኔያ፥ ኤከምበፁዋ መኦዉሥ ጸገማም ኤበቦቆ ጸጋ፥ መጦዉሥ ማጦዪላለማምኳ ነደ መጫ ኤተ ባንዢገካ ሸማ። ኒጦሥ ማጦዪላለማም ነጸገ ረባ፥ ኤተ ከምኼ ካኳ ኮዎማ ከበበኽ ኤከምዶኮኳን ከማገ ጓ። 18ኒድ እማም መገ  ዳ፥ ኒፈገኽ መደ ጋገሸል ዳ፥ ኒተጸሥ ጸጋ ጃጀንዳ፥ ኒንዘ ል ዳ ኤተ ቢጨካኳ። 19ኤኤለአ ኮጎ እልኻ ከማሙንፁቆ ኪልቆማም በና ኤተ በዥገካሽ ሸማ፥ ኤከምዸብዋን መኢያ ኸማ። 20ጢሞቴዎስ፥ ዜኽ ዳ ኤተ በኸኬ ረባ ካም። ሃታሥ ነገሻ ኤተ ቢከለካቆስ መገ ከመትገሥ ጎልጎዛ፥ ኤተ በከለካ ጸጋ በኦካ "መገመሸማ።" 21ነጸጋ ነደ ቢከለካ "ቢልዸበካ መገመሸማ አለአ" በበከንዥገን አሜታ ሜታ ነንዶ መገሚላ። ነድ መገ አል ረባ ከአኻ!

will be added

X\