1 ከጢሞቴዎስ 5

1መሉጋኣሠኼ ደ እምፈጋ፥ እገሸካ ኤያሥ በበኡ። እገሸካ ከጋሸላ ኤያሥ ኢዴበኡ፥ 2ከጋዘ ጋፋኳ ኤያሥ እይኡ፤ ዪር ገምበብ ጋፋኳ ከመዪዥኽ እላ፥ እገሸካ ኤያሥ ኢደ ዳጎን ኤበኡ። 3ኸካ ገሂን ከጋፈ ዢጋ ደ በሸከሥ ጉንዛ፥ ኸገሻ ደ ባንዢገካ ጸጋ ኤተ ከምተጸሥ እማምኳ። 4ጋፈ ዢጋ ሜተም፥ ኤከምጫ ዱዋ ኤያሥ ኤያ ኤፐማ፥ ነገም ኢዳ አ ነገሲቋ ዳ ኤተ በኢካ አመደማ ነጸገማም ከዶጎ ኤበማም፤ ኒካጎቆ እማምኳ ገሸል መደዳ ኤተ ቤከድ አዶጎ ኤበማም። አለኣኳ ኤተ ከማገ ል ረባ። 5ጋፈ ዢጋ፥ ኤተ በሸከሥ ጉንዛ ባሸካኽ በላ መዸባን ጸጋ ኤተ ከምተጸሣ፥ በጦከሥ ማጦዪላለማ ነጸገ ረባ፥ በጦካ መዱጎክ ነመጎኳ ከኦካ ገቆና ከገዴራኳ። 6እገፋ ኤተ በሸከሥ ጉንዛ በናቲኽ ጸገማ፥ መከኢ ከኸማኳ፥ መሸማ። 7እገሸከሥ አለአ ኤከምኢዩሸን እማም በላ መጩዋን ቆቆማ። 8ኤከምበፃ ጸጋ ሜታ መተጸሥ ጀንደማ፥ ከበቦቆኳ ደ መፃለማ፥ በሽጠካ አ መገሚላለማ፤ ሾከ ጸጋ አለአ ነጸጋ ደ በበፀካ መገሚል ገንሠማ። 9ጋፋ ደ ቢቆተካን ፄማም ነገንዘ  ጎ ቢቆተካ ጋፋ ደ በሸሸከሥ ጉንዛ፥ መደዳኼ ግዣለማም ነግቸማ ኦካግ ከገቻኼ። ኤያሥ ኤያ ነድ ኤተ ቢርኮቆ ኣሥ እል ሜታቆ፥ 10ኤተ ባገምካይል ከመደ ጋገሸል መደዳ። ከምደካ ከአ አመዳ እገፋ ኤተ በዱኮቆ ኢደማ ዝንዜን፥ በሄከሽ ኮዶ፥ በኤፈከቾጎ ደ ገዴራ፥ በተጸከሥ ደ ባፉንጨካቋ፥ ኤተ በሻምበካ ከጋገሸል መደዳ ኮዎማኳ። 11ጋምበብ ጋፋ ደ በሸከሥ አጉንዘማኸን፥ መቆታኣኼ ነገንዘ  ጋፈ ዢጋኼ። ኤከምፈራ አመአጀበ በጫ ነጸገማምኸን፥ ነኤተ ቢኸካ ጸገማም ከክርስቶስ ቢዠገተካ ኤከምበፁዋ መሩቆ ኪል እምበንድ፥ ከማፑ ቆ ከማኣጉዋ መሮቆ ጉንዛ። 12ከምኸካሥ ከማም ከፄ ቢያፑኮቆ ገዠገታ ኤተ ቢዠገተካ ከክርስቶስ። 13በላ መዳን ኣሥ አለአ፥ ከማገመኽ አመንደዳ እማም፥ ከሞኩኽ ከመፀ ጸጋ። በላ መዳን ኣሥ መንደዳኳ፥ ከምፈጉኽ ገለሌባ፥ ከሞከሽ ነገሸ ጸጋኳ፥ ከመገሹሥ ዳ ኤተ በበፀካ መዪራ እማምኳ። 14ካ በራኣጎካ ኤከምሮቆ እል እምበንድ አጋምበብ ጋፋ ኤተ በሸከሥ ጉንዛ፤ ኒፖቆ ኢዳ፥ ኒራቆ መፃለማምኳ ዝንዜን። ኤከመድ ኤለአ፥ ከምኻሰኼ እንዶዋ ከብታ ኤተ ከማገሸኮቆ አኳ። 15ነማም ሜታ ሜታ ካል ገሲቋ ቢበከኸንዥገን እንዶ ገዴራ ቢሁልከቾጎ ሴጠና። 16እገፋ ኤተ ገዴራ ሜታ፥ ኤከምኢያን ነመፃለማ አጋፈ ዢጋ ሜታ ሜታ፥ ነተጸሥ እገፋ ኤተ ገዴራ አኳ እማም። ኤኤለአ ከምደካኼ ከገጹራ ከገሙንፀ ደ ገዴራ፥ ከምፈለሽ አገሙንፀ ደ ገዴራኳ መተጸሥ ጋፈ ዢጋ ኸገሻ ደ ባንዢገካ ጸጋ ኤተ ከምተጸሥ እማም። 17ደ እምፈጋ አል ገሙንፀ ደ ገዴራ ደ በደካ መደዳለማም ዝንዜን፥ ከበቦቆኳ ደ ቢሌኤካ ነማቲሰማ ከመትገሠማኳ፥ ከምደካ አመዸብ በነ መደዳለማም ኤላ እምበንድ። 18በከለካ አመዪዥሥ ሎርጋ፥ "መፉንጫሰኼ ዎደ ሙሳ ኤተ በኢካ ነመኦቸኽ ጋትጋኼ፥" ኤያሥ ኤያኳ፥ "ከምደካ ከኤተ መደዳ አመዸብ በነ መደዳለማ።" 19ኤከምበፃ መዳ ከሹደ ጸጋ ደ እምበንድ ኤያሥ ኤያ ከኦካግ፥ መገሳቆኼ ማገሾቋ ኤተ በደካ ነጸገ ደ እምፈገ ገሙንፀ ደ ገዴራ ሜተምኼ። 20ኤከምጫ ነማም አጸጋ ሜታ መሸ ሠማኸን፥ ተሥ ነኸ ጸጋ ኮዎማ ኤከምጤያን አጃጀንዳኳ። 21ከመገሸራ ካም ነታሰ ረባ ካል ያሱስ ክርስቶስ፥ ነታሰ ሰ ገትጋ አል ረባኳ፥ ሮቆ ማገሸሣ አለአ ኮዎማ። ነዳ ኤተ ከምዳኣ ኮዎማ ማሃቻሠኼ ጸጋ ሜታ ከጀንዳኼ፥ መገሻኸኼ ከዎዴኳ! 22ዜኽ መዪዣሣሉ! ማሰሲያኣኸኼ ከመጦሥ ኤሉ ኒልቆ ጸጋ ሜታ ከምሽልሠማ ከመደዳ አል ረባኼ። ማገሰኺልኼ ከጸጋ ከጀንዳ ነመደ ገንሣኼ። 23ከፄ እሉ ከመንሳሣሉ መዱጎኮኳ፥ ኣቆሸከኽ ኬ ባጉዋ ዱፀን ከኣያ ፋ፥ መፋኣኼ ኣሥ እልኽ ኣያኼ! 24ገንሣ አል ጸጋ ሜታ ሜታ ማትገሠማ፥ በሲኮቆ ከማም ኮጎ መኸሣ፤ ገንሣ አል ጸጋ ጃጀንዳኸን ከማትጋሥ ነን። 25ኤያሥ ኤያ ጋገሸል መደዳኳ ማትገሠማ፤ ኤከምበፃ ማትጋሠን ከደኽላኳ፥ ከምፈለሸኼ ማጸፃቋ ሰ ሜተልኼ።

will be added

X\