1 ከጢሞቴዎስ 2

1ነዳ ነኮዎማ ከበቦቆ ከመገሸራ ካኻ፥ ኤከምጦኻን ገቆና ከገዴራ፥ መገሽ ሳ ከጸጋ፥ መገ ላኳ ነታሰ ረባ። ዴረኻ ከጸጋ ከኮዎማ፥ 2ከምጥሳ ከደ በጨካ ገፋሌያ ኮዎማ፥ ኤከምኢኳን ከመጺጓ ከመገማኳ። ከምዳ ካኳ አመኸ ገሂን ከረባ አመኢያ ከገሸል መንዳኳ። 3አለአ ገሸለማ፥ ከማገ ል ረባ ኤተ መብዶቆ አኳኳ። 4በኦከሽ አኳ፥ ኤከምብዳ ጸጋ ኮዎማ፥ ኤከምዱዋሸን ኮጎ ማምባለሥ ኸገሻኳ። 5ረባ ኣሥ ሜተም፥ ኤተ በኢከቾጎ ነጂል ጸጋ ከረባ ባገ ካኻኳ ኣሥ ሜተም፤ አኳ ያሱስ ክርስቶስ ኤተ በደካ ጸጋ። 6አ ከማንዢል ጸጋ ኮዎማ ቤያተገሮቆ ጺማ ቤኻ፤ ቤድ አለኣኳ ካል ኦከ ቤሪል ረባ አንጅ ማ። 7ከፄ አለአ በጦከሥ ረባ አራ ከኤተ ማቲሰማ ከሰ ገትገ ክርስቶስኳ። ከመገሸርሥ ኸማ፥ ከምለጎዘራኼ። በትገኬ አረባ አራ ኮጎ ሾካ ከኮዎማ፥ ኤከምትገርሥ ገትጋ አል መገሚላ ካል ኸገሻኳ። 8በራኣጎካ ኖጎ ከማሙንፀኾቆ ከገዴራ፥ በላ መዳን ከእል ገቱዋ ከማትርቋ፥ ኒፈሮቆ ጋጉንዛ ደ በዪዥካሥ ከረባ ኤለማም ከገዴራ። 9በራኣጎካ ኤያሥ ኤያ ኤከምኢሰሥ ጋፋኳ ከገዪፆቋ፥ ከመጦኽ ጸገማ ከገቻ ኣ ኤተ ከምደካ፤ ዳ ኤተ ከማንደጎነሥ እማም፥ በላ መዳን መንጀልስ ቤቋ ከመቃት ጸገማ ከኣያ፥ ከሚንዛ ከማሰኽ ኣ ኤተ መዥግ በና፥ 10ነድ ከጋገሸል መደዳ። ነድ ኤያሥ አለአ ከጋፋ፥ ደ በኣጎካ መኸ ገሂን ከረባ። 11ነገመሽ አጋፋ ከማጦዪል ፄያ ከማገሳሣኳ። 12ከምኸርኪልኼ ኤከምትገሥ ጋፋ ነገሙንፀ ደ ገዴራ፥ ኤከምጫ ገፋሌያ ነጸገ ጉንዛኳ፤ ነጦ ፄ ትል፥ 13ከፄ ቤዘዛሜ ኣዳም ነገሲቋ፥ ቤዘዛሜን ሄዋንኳ ነን። 14ቤያጣኽ እገፋ፥ ቤያፑቆ ማቶቋ አል ረባ፥ ኤያጣኸንኼ ኣዳምኼ። 15ነደንኳ፥ ኤከማራቆካሥ ጋፋ ከመገሚላ ከማሄሻ፥ ኤበዪዥካሥ ከረባ ከመጦኽ ጸገማ ከገቻኳ፥ ከምብደካ እገፋ ከመፖቆ ዱዋ።

will be added

X\