1 ከደ ተሳሎቄ 2

1ኢዴበም፥ በኸገምካ አኽ ኪልቆኻ ኤበበፀካ መዳ አመዌያለምላ ኮጎኻ መገ ። 2በኸገምካ ኒልከምዌን ኮጎኻ ኤቢላፉንጨካቆ ነፊሊጲሲዩስ፥ ኤበ ካ አጸጋኳ አይላ፤ ኤከምዳን አማቸከኻ በቦቆ ነጸገምላኳ፥ ኤከመገሽልሠን ሰ ማገ ላ ኤተ በዎኬ ኖጎማ፥ በኸኬንዥገን ረባ መንዥግ እልኻ ካይላ። 3ዳ ኤተ ቢለገሸከሥ ካኻ፥ አፐኬሠንኼ ነጎልጎዛ ነገንሠኽ እላኳ፥ አጨካንኼ መንጠኻኼ። 4ቢለገሸካ ኤያል ጸጋ ደ ቤዻምብ አረባ፥ ቤጦ ኤከማቲልሰን ሰ ማገ ላ አለማ። ነከምደን ከጸጋ፥ ቢልሻምበካ ከማገ ል ረባ ኤተ በዻምበካ እልላ። 5በኸገምካ አኻ ኪልቆኻ፥ ኤቢልበፀካ መዎዪሌ ኮጎኻ ከመገሽ እገሻ ኤተ ከምገ ል ፄ አኻ ኤያሥ ኤያ ከምሰሥ አኻ። ከለኣኳ ረባ ከምዳ ኸገሻ ካራ። 6አይላ ኖጎኻ ነድ፥ ኤያሥ ኤያ ኖጎ ጸጋ ጃጀንዳ፥ ኢላኣጎካንኼ ገሂን ኖጎ ጸጋኼ። 7ሚልከፈለሸን መሂን ኖጎኻ ኤሰ ገትገ ክርስቶስኳ፥ ቢልኢዬ ኖጎኻ ኤኤዬማ ኤተ ናራቆኽ ኢዳ ከጸገማ ከመሌእላ። 8ዳ ቢልሄከሽ አኻ፥ በላ መዳን ኣሥ ኤተ በኸንዘ ኪል ሰ ማገ ል አል ረባ ከአይላ፥ ቢለገ ከሥ ከመኸ ጺምላ ከፄኻ፤ ኸገሻ በኸደካ ማሄሽ ኢዴባ ከአይላ። 9ኢዴበም፥ በኸሳንዘከሥ ኤቢልሻምበካ ቢልሌኤካ ነመደዳ ካኻ፤ ኤከምበፃ መዳን ከጸጋ ሜተል ከገጹራ፥ ቢልደካ ኖካ ከመጎኳ፥ ቢላቲከስ ሰ ማገ ል አል ረባኳ ካኻ። 10ኖከ ቢልኢዬ ኖጎኻ፥ ከአኻ ደ በኸገምኪላ ኤቢልድ መዪዥሠማ፥ ጋገሸለማ ከደ በንዢገካ ቆቆማ፥ አኻ ከረባኳ በኸደካ ካይላ ኸገሻ። 11በኸገምካ፥ ኤያሥ በዪርካ አበባ ኢደማ፥ 12ኤቢለንዥገከሥ ሜታ ሜታማለኻ፥ ኤቢለጎከኽ፥ ቢለገሸካ ካኻኳ፤ ዳ ቢልከደካ አለአ፥ ኤከምኢኻን ኤከማገኺለን ረባ ኤተ በኦኬ አኻ ኤከምዸበኻን ገፋሌያለማ ከገሂንለማኳ። 13በኢካን አዳ ጀንዳ፥ ኤተ ከምኽልካ መገ ላ ከረባ መዱጎክ። ኖከ ቢልርኬቆ እገሸ ረባ ካኻ፥ በላ መዳን ኤገሸ ጸጋ በኸገሰኮቆ በኸርኮቆንዥገን ኤገሸ ረባ፤ አ ኸገሻ እገሸ ረባ ኤተ በኢካ ነመደማ ኖጎኻ፥ ደ በኸገምኪላኳ። 14ኢዴበም በኸሁለከንዥገን መኮ ገሙንፀ ደ ገዴረ ረባ ነኤበ ዪሁዳ፥ ደ በከገምኪል ከያሱስ ክርስቶስ። ኤያሥ ቢያፉንጨካቆ እማም ከኤለ ዶጎ ዪሁዳ፥ በኻፉንጨካቆንዥገን አኻኳ ከኤለ ሾከኻ። 15ቢሸኮቆ ዶጎ ዪሁዳ ኤታ ያሱስ ከደ መዪርጓ፥ ቢያሙቸኪል አይላኳ ቢፐኮቆ ኒል ኤባ፤ እማም ደ መቱሥ እል ረባ፥ ብተ ጸጋ ኮዎማኳ። 16ኤከምበፁዋ መብዱዋ እማም ቢያኣጎካ መጻንዶቆ አይላ ኤከማቲልሰን እገሸ ረባ ከደ በበፀካ መዳ ዶጎ ዪሁዳ። ኤኤለአ ነገንሣ ቢተጸከንዥገን ገንሣ፤ ካ በዎኬንዥገን በቦቆ አማመሠ ረባ ነጸገማም። 17ኢዴበም፥ በላ መዳን ከእላ፥ ኤከማኤምኮሠን ከኻኳ ከኦኪል ዱፀን፥ ቢልአጀበካ ከመገመሥ አኻ በቦቆ ቢልሲከቾጎኳ። 18ከለአ ቢልከኣጎካ መዎዪሌ መገሚልሥ አኻ፤ አራ ጳዉሎስ ኪልቆም በራኣጎካን መኮለሬኽ ኮጎኻ፥ አሴጠናኸን በገርዘከኽ አራ። 19ካ ማጦዪላለምላ ከማገ ጓለምላ ኤያሥ ኤያ ዠላ ኤተ ከምሽለኮጎ ነታሰ ኤቶኳ ያሱስ ክርስቶስ ኖከ ከምዌያ፥ ኤከምበፃ መዳ አኻ፥ ዎዴ ጀንዳ? 20አኻ ኸገሻ ገሂንለምላ ማገ ጓለምላኳ።

will be added

X\