1 ገትገ ጴጥሮስ 4

1ከፄ ባኣንሠካሥ ክርስቶስ ከበጨ ጸገማ፥ ገመኻ አኽኳ ከእልኻ ኤከምዌ አሾከ ማኣንሠሣ አለአ ነጸገኻ። በኸገምካ፥ ጸጋ ኤተ ባኣንሠካሥ ከበጫ፥ ኤበበፀከሸንዥገን መኽል ጸገማ ከገንሣ። 2ካ ካሥ አል ኦከ ከምኢኻ ነኤበ እኔያ ነለአ፥ ኢኻ ኒል ኤለ ማሄሻ አል ረባ፥ መኢኻኼ ኒል ኤለ መአጀበ በጫኼ። 3በትተከንዥገን ኦከማ ኤተ ቤያኽኢን ኤያል መንደ ጸጋ ደ በበፀካ መዳ አል ረባ። ቤያኽኢ ነመቴሽ ጸገኻ ከመአጀባ ከጅንሰማ ከጅንሰማ፤ ቤያኸደኽ ደ መፋ፥ ቤያኸፈገሥ መሰማ ከመፈማኳ፥ ቤያኽኢ ነመዴራ ከምሙሴ ኤተ በበፀካ መኸሥ አመደማ ካኳ። 4ኤከምበፀኻ አኽ እኽላ ማገሰኺል ነመበፀሽ መዜኽ ጸገማም ከማቆሻሣለማምኳ፥ ከምቱሥ እል ደ ቤድ ገፀ መዠኻ፥ ከምዋ ፄኻ። 5በኢካ ነጸገማምኳ አመኮሎቆማ ነኸ ረባ ነዳ ኤተ ቢደካ ና። በገ ከሠንዥገን አኸን ከመኸሠማ ከደ በኢካ ከደ በሸሸካኳ። 6ባቲካሰንዥገን ሰ ማገ ል አል ረባ ከደ በሸሸካኳ። በከደካ አለኣኳ፥ ኤበከኸከሠን ረባ ኤከምሹዋ ከበጨ ጸገማም ኤያል ጸጋኳ፥ ከገፉጫኸን ኤከምኢዋ ኤያሥ አል ረባ። 7ባርቸካዬቆንዥገን መርሽ ዳ ኮዎማ። ካ ዜኸኽ ጸገኻ፥ ሸኻ ቁንዘ ከገዴራኳ። 8ከበቦቆኳ፥ ኣሄኸሽ ከእልኻ! ኤከማሄኸሻ፥ ከምበፀኸሽ ከጸጋ ገንሣለማም። 9በላ መገሸኺለን ሰኻ፥ ኣሄኸሽ ነመፃ ነመፃለኻ። 10በኸኬንዥገን ረባ ካኻ ደ መኻ ከጅንሰማ ከጅንሰማ። ካ ነከድ አጸጋ ሜታ ሜተም ኤመገሚል ጸጋ ከደ መኻ ኤተ በከኸኬ ረባ ከአ ከበና አል ጸጋ ኮዎማ። 11ኤተ ከመገሻ ነገሸሥ እገሸ ረባ፤ ኤተ ከምዳ ዳኳ ነከድ ከመዥጋ ኤተ በከኸኬ አረባ፤ ኤኤለአ ከምሂንሥ ረባ ነዳ ነኮዎማ ከንዶጎ ያሱስ ክርስቶስ ከኤተ ከምደካ ገሂን ከገፋሌያ ካል ግዢ ግዥ። ኣሜን። 12ማሄሽ ኢዴበም፥ መተምዘኻኼ ኖከ ከምዳን ነጸገኻ አዳ ኤተ በሰኮቆ ኤማንጃ። ከምደካ አለኣኳ ከመዻምብ አኻ፥ መኦኸሠኼ ኤከምበፃ መዳ አሾከ አለአ ነጸገኻኼ። 13ኣገኻይል ከፄ ከመንዘኺል ከማኣንሠሣለኻ ነማኣንሠሥ ክርስቶስ። ኖከ ከማትጋሥ ገሂንለማኳ፥ ከማገኻይል ነለአ ከበቦቆ። 14ኤከምዋ አኻ ነፄ ክርስቶስ፥ አኻ ደ በኻገካይላ፤ በትገከሥ አለኣኳ፥ ኤበኢካ አገፉጨ ገሂን፥ መከላለም ኤበኢካ ገፉጨ ረባ ከአኻ። 15ናኻ መደዳኼ አማፉንጮቋ ነጸገጸጋ ሜተል ከፄ በደካ አ ኤተ መሾቆ ጸጋ፥ ገልኳ፥ ኤተ መደ ገንሣ ዳ፥ ኤተ መኩሻ ነገሸ ጸጋኳ። 16መዪፃቆኼ ጸጋ ኤከማፉንጫቆ ከፄ መዳለማ ክርስታና፤ ኸኸካ መገ ላ ከረባ ከፄ ቢኦካ አኻ ከፄያ ከል ክርስቶስ። 17ባርቸካዬቆንዥገን አንጅ ኤተ ከማጦዋሸን መኸሣ ነጸገጸጋ አል ረባ፤ ካ ኤከማጦዋሽ መኸሣ አለአ ነጸጎኳኳ፥ እንዘሥ ከምዥጋን መኸሣ ነጸገ ደ በበፀካ ማገሳሥ ከሰ ማገ ላ አል ረባ። በከለካ አመዪዥሥ ሎርጋ፥ 18"ኤበደካ አመብደ ገሸል ጸጋ ከመሮቆ ማፉንጮቋኳ፥ ኤያብ ከምዳን አ ነጸገጸጋ ደ በበፀካ መኻ ገሂን ከረባ፥ ነደ ገንሣኳ።" 19ከለኣኳ ደ በርኮቆ ማኣንሠሣ ከፄ በደካ ማሄሻ አል ረባ፥ ኒካተተስ ኒድ ገሸል ዳ፥ ኒከኽ መኢያለማም ከረባ ኤተ በዘዘኬ እማም፥ በደካ መገሚለማኳ።

will be added

X\