1 ገትገ ጴጥሮስ 3

1ኤያሥ ኤያ አኻ ጋፋ፥ ኣገሰኻሥ ከጋጉንዛለኻ! ኤኤለአ በላ መገሸኻን ዳ ሜተል፥ ከምጦኻ ከመንዳለኻ ኤከምገሙዊለን ጋጉንዛ ደ በበፀካ ማገሰካሥ ከሰ ማገ ል አል ረባ። 2ከምገሙሥ ኤበደካ መንዳለኻ መዪዥሠማ፥ ኤበኸኸካ ገሂን ከረባኳ። 3መደዳኼ አማንደጎናለኻ ከዳ ኤተ ባገምካሥ ነኸ እኔያ ኤመቼኽ ቤቋ፥ መንጀልስ ኣያ ከምኢሰሥ ማሰኽ ኣ፤ 4ነድ ማንደጎናለኻኸን ኒልኻ ከመዳለኻ መፉጨኸማ ከመገ ሳኳ። አለአ በጨካ በቦቆ በና ነታሰ ረባ። 5ኤኤለአ ቢያንደጎነሠንዥገን ጸገማም አመዪዥሥ ጋፋ፥ ደ ቢጦሥ ማጦዪላለማም ነጸገ ረባ። ቢያገሳሥ ከጋጉንዛለማምኳ። 6ቤያገሳሥ ሳራኳ ከኣብራሃም ቤከል ቤኦ "ኤተም።" ከምደኻ አኽኳ ኢደ ሳራ፥ ኖከ ከምደኻ ጋገሸል ዳ ከምበፀኻ መጤኸካ ከምጀጀጮቋ ሜተል። 7አኻ ጋጉንዛኳ፥ ገመኸካ ከጋፋለኻ ከፄ ቢደካ እማም ናኻ መሌኤቆማ። ኸኸካ ገሂን ከፄ ከምኸካ አረባ መኢያ አል ግዢ ግዥ ከማምኳ ኤያሥ አለኻ። ኤከምጦኻ አለአ፥ ከምኩልኼ ዳ ሜተል ገዴራለኻ ከምጻንዶቆኼ። 8ከመርሸማ፡ ኣጨኸሥ እልኻ፥ ኣሌኤኻይል፥ ኣሄኸሽ ከማኦከሣ፥ ጦኸኽ ጸገኻ ከገቻኳ! 9መኮለኸቆኼ ነገንሠማ ገንሠማ፥ ነጎታኳ ጎታ። በላ መጦኻን ኤለአ፥ እገ ኸሥ ጸጋ! በኦከንዥገን ረባ አኻ ኤከምርኾቆን ማገሣኳ። 10በቆተካንዥገን ነመዪዥሥ ሎርጋ በከለካ፥ "ጸጋ ኤተ በኣጎካ ማገይላ ከመኢያለማ፥ ኤተ በአጀበካ መገመሥ ገሸል ኦካኳ፥ ነጻንዶቆ ጥጠማ ነመገሽ ገንሠ ዳ፥ ሰማኳ ነመገሽ ጎልጎዛኳ። 11ነሃታሥ ነገንሠማ፥ ነድ ገሸለማ፥ ናኣጎ መገማ ነሁልኳ። 12ከፄ በዪርኮጎ ኸ ረባ ኮጎ ደ በደካ ጋገሸለማ፥ በካጦኪል ፄ ከገዴራለማምኳ፤ በ ካይል ኸ ረባ ከደ በደካ ገንሠማኳ።" 13ኤከምጥጠኻይላ አኽ ከመደ ገሸለማ፥ ኦዴ ከምዳ ገንሠማ ነጸገኻ? 14ኤከማፉንጨኻቆ ከፄ በኸደካ ገሸለማኳ፥ ከመገሥ ረባ አኻ። መጤኸካኼ ከጸጋ ሜተል፥ ማሰሲኻሠኼኳ! 15ሂንኸሥ ክርስቶስ ከእልኻ፥ ኸኸካ ገሂን ኤያል ኤታ። ኤከምሎቆሥ ጸጋ አኻ ከፄ ማጦዪላ ኤተ በኢካ ኒልኻ፥ እገ ኸሥ መዱጎክ ከመኮሎቆማ ዝንዜን። 16ከፄ በኸደካ ጸጋ ደ በጨካ መዪዥኽ እላ፥ ነድ አመኮሎቆማለኻ ከመፉጭ ሳ ከገሂንኳ። ኖካ ና ከምዪፃቆ ጸጋ ደ በቴከሥ ፄኻ፥ ኤከምገሙሥ ገሸል መንዳለኻ ከንዶጎ ክርስቶስ። 17ኤከምዳ ማሄሸማ አል ረባ፥ ከማፉንጫቋ ከፄ ቢጦካ ገንሠማ፥ ከምገሸላ አማፉንጫቋ ከፄ ቢጦካ መገማ። 18ኤከምሮቆን ክርስቶስ አኻ ኮጎ ረባ፥ በሸከንዥገን አ እል ሜታቆ ከኦካ ከኮዎማ ከገንሣ አል ጸጋ። አ ኤተ ባንዢገካ መሸ ሠማ፥ በሸካ ከፄ ደ በሸከሣ። ቢሾቆ በጨ ጸገማ፥ በኢኮቆንዥገን አገፉጨ ረባኸን አ። 19ከመዥግ ገፉጫ ከለአ ቤዽ ክርስቶስ ኮጎ ፉሣ ደ ቢፉንጨካ ቢዜከኽ መኸሣ፥ ቤካቲስ ሰ ማገ ላ አል ረባ ከማም። 20እማም አለአ ፉሠ ጸጋ፥ ደ ቤኮዎቆ ማገሳሣ ከረባ ነግዠ ኖህ፥ ኖከ ቤዜኽ ረባ ከገቀማ ካሥ አል ኦከ ከመገሥ ኖህ ለማዲያ። ጸጋ ዱፀን ደ ቤኩ ኪል ለማዲያ፥ ደ ቤድ ገንዘለማም ዬሰናኮ፥ ቤብዶቆ አረባ እማም ነኣያ። 21አለኣኳ መኮሥ ኣይ ማጩጾቋ፥ ኤተ በብደኮቆ አኻ እኽላ። ማጩጻቋ አለአ፥ በላ መዳን ኤተ ከምዪዡከሥ ጋያ አል ቆ ቤ ጸገ ጸጋ፥ ከምዴሮኳ ከንዶጎማ ኤከምኼ አረባ መዪዥኽ እላ ካኳ። ከፄ ከምዸበኮካ አኮ መብዳ ከንዶጎ ማጩጾቋ፥ ከመፈርሣ ካል ያሱስ ክርስቶስ ነመሻ። 22በቶኮካ አኳ ከጎዛ፥ በኢከሽ ነጅኤለ ረባ በባ ከኤላ ጉንዛ፤ በጦከሠንዥገን ኒል ኤለማ ሰ ገትጋ አል ጎዛ፥ ከምሙሳ ደ በጨካ ገፋሌያ ከመዥጋ ነጂል ጎዛ ከኔያኳ።

will be added

X\