1 ገትገ ዮሃንስ 5

1ደ በገምኪል ኤበደካ ያሱስ መሲያ፥ ኮዎማም ኢደ ረባ፤ ኤተ በሄከሽ በባ ኮዎማ፥ ከምሄሽ ዱማኳ። 2ዳ ኤተ ከምገምኮኳ ኤበኮሄከሽ ኢደ ረባ፥ ኤከምሄኮሽ ረባ ከምዜኮኽ ማገሸሣለማኳ። 3መሄሽ ረባኳ መዜኽ ማገሸሣለማ፤ ከምሂንኼ ማገሸሣለማኳ ካኳኼ። 4ከፄ አለአ ደ በደካ ኢዳ አል ረባ ኮዎማ፥ ከመሙቹቆ ኤባ አል እኔያ፤ ዳ ኤተ ከመሙቸከኮቆ ኤባ አል እኔያኳ፥ ከመገሚላሎኳ። 5ዎዴ ኤተ ከምፈለሽ መሙቾቆ ኤባ አል እኔያ? ኣሥ ኤተ በገምኪል ኤበደካ ያሱስ ዱ ረባ። 6ኤተ ባጩጸካቆ ከኣያ በዎኬ ከማርከኽ መሃለማ አለአ፤ አኳ ያሱስ ክርስቶስ። ዳ ኤተ በከዎኬ አ፥ በላ መዳ ካሥ ኣያ፥ ከኣያ ከመሃኳ፤ ከፄ በደካ መዪዥሥ ገፉጫ ኪልቆማ ኸማ፥ ከምዳ ኸገሻ ከፄማ። 7ደ በደካ ኸገሻ እማም ኦካግ። 8እማም አለኣኳ ገፉጫ፥ ኣያ፥ ከመሃ፤ ኬያ ኦካገማም ከምዱዋ ኸገሻ ከሳ ሜተል። 9ኤበኮርኮቆ መደ ኸገሻ አል ጸጋ፥ በሙቸኮቆ አመደ ኸገሻ አል ረባኳ ናል ጸጋ፤ መደ ኸገሻ አል ረባኳ ኤተ በደካ አ ከፄ ዱማ፥ ኸማ። 10ኤተ በገምኪል ከዱ ረባ፥ በጨካ ኒለማ መደ ኸገሻ አለአ፤ ኤተ በበፀካ መገምኪል ከረባኸን፥ በደከሥ ረባ ከኤተ ጎልጎዛ፥ ከፄ በበፀካ መገሚል ዳ ኤተ በደካ አረባ ከዱማ ኸገሻ። 11መደ ኸገሻለማኳ፥ ኤተ በከኸኬ አረባ መኢያ አል ግዢ ግዥ ካኳ፤ በኢካ መኢያ አለኣኳ ኖጎ ዱማ። 12ኤተ በጨካ ዱ ረባ፥ በጨካ መኢያ፤ ኤተ በንዢገካ ዱ ረባኸን፥ አጨካኼ መኢያኼ። 13አኻ ደ በኸገምኪል ከዱ ረባ ኮዎማ፥ በርቆተከንዥገን አለአ ካኻ፥ ኤከምገመኻን ኤበኸጨካ መኢያ አል ግዢ ግዥ። 14ኤከምሎቆኳ ዳ ኖጎማ ኤያሥ ማሄሻለማ፥ ከምገሞኮኲል ዝንዜን ኤከምገሶቆን ካኳ። 15ኤበኮገምካ፥ ኤከምገሶቆ አ ዳ ኤተ በኮሎቆካ ኖጎማ ኮዎማ፥ በኮገምካ ኤበኮዸበካ ዳ ኤተ በኮሎቆካ ኖጎማ። 16ኤከምገመሥ ጸጋ ሜታ ዱዌበማ ነመደ ገንሣ ኤተ ከምበፃ መርኬቆ መሻ አል ግዢ ግዥ፥ ነከዴር፥ ከምኸካ ረባኳ መኢያ፤ ከምደካ አለአ ከደ በደካ ገንሣ ኤተ ከምበፃ መሮቆ እማም ከመሻ ካል ግዢ ግዥ። በኢካን ገንሣ ኤተ ከምሮቆ ከመሻ አል ግዢ ግዥኳ፤ አርከለካንኼ ዴረኸካ ከጸጋ ደ በደካ ሾከ ገንሣ አለኣኼ። 17መምፑቆ ማቶቋ ኮዎማ ገንሣ፤ ነደንኳ፥ በኢካን ገንሣ ኤተ በበፀካ መሮቆ ከመሻ አል ግዢ ግዥ። 18በኮገምካ ደ በደካ ኢደ ረባ ኮዎማ ኤከምበፁዋ መኮሉዊል መደ ገንሣ፤ ከፄ በዜከኽ አዱ ረባ እማም፥ ከምደሠኼ ሴጠናኳ እማምኼ። 19ኤከምኢያን ኤባ አል እኔያ ነገፋሌ ሴጠናኳ፥ በኮገምካ ኤበኮደካ አኮ ካል ረባ። 20በኮገምካ ኤበዎኬ ዱ ረባ፥ በኸኬ ማምባለሠማ ካኳ፤ ከለአ በኮገምካ ረባ ኸማ። አኳ በኮኢካ ከረባ ኸማ ከዱማ ከያሱስ ክርስቶስኳ። አ ረባ ኸማ፥ መኢያ አል ግዢ ግዥኳ ኣሥ አ። 21ኢዳለም፥ ሃተኻሥ ነመዴር እምሙሳ!

will be added

X\