1 ገትገ ዮሃንስ 3

1ዪርኻና እንዘሥ በቦቆ ኤበሄከሽ ረባ አኳ፤ ቢከለካ ካኳ ኢደ ረባ፥ ኸገሻ አኳ ኢደማ፤ ከፄ በኤምካ ኤበ እኔያ አ፥ አገምካኼ አኳኳ። 2ጀንደም! አኳ እኽላ ኢደ ረባ፥ ኣገምካሠንኼ ኤከምዶኳ ካለን ኣሤ፤ ነደንኳ፥ ኖከ ከማገማሥ ክርስቶስ፥ በኮገምካ ኤከምኮኮሥ አ ከፄ ከምገምኮሥ ኸገሸ ጸገማ። 3ኤተ ከማጦዪል ካ ኮዎማ፥ ኤያሥ በደካ ክርስቶስ መዪዥሠማ፥ አኳ ከመዪዥሥ ጸገማ። 4ኤተ በደካ ገንሣ ኮዎማ፥ ከመምፑቆ ማቶቋ አል ረባ፤ ገንሣኳ መምፑቆ ማቶቋ አል ረባ። 5በኸገምካ ኤበዎኬ ክርስቶስ ከምቼሥ ገንሣ አል ጸጋ፥ ኤበሜካ ገንሣ ኒለማኳ። 6ካ ጸጋ ኤተ ከምኢካ ከክርስቶስ ኮዎማ፥ ከመኮሊልኼ መደ ገንሣኼ፤ ኤተ ከመኮሊል መደ ገንሣ ኮዎማኳ፥ አገምከሠንኼ አ፥ ኣምባለከሠንኼኳ። 7ኢዳለም፥ መንጠኸኼ አጸጋ ሜተል አኻኼ! ክርስቶስ ኤያሥ በደካ መዪዥሠማ፥ ኤተ ከምዳ መዪዥሥ ዳ ኮዎማ፥ መዪዥሠማ። 8ሴጠና ከፄ በደካ ገንሣ ካል ገሲቋ፥ ጸጋ ደ በኮለኪል መደ ገንሣ ኮዎማ አል ሴጠና፤ ዳ በከዎኬሥ ዱ ረባኳ፥ ከመቴሥ መደዳ አል ሴጠና። 9ደ በደካ ኢደ ረባ ኮዎማ፥ ከፄ በኢካ አገፉጨ ረባ ኒለማም፥ ከመኮሊልኼ መደ ገንሣኼ፤ ከፄ በደካ አረባ በበማም፥ ከምፈሉሸኼ መኮሊል መደ ገንሣኼ። 10ከለአ ከማገምኮኪል ኢደ ረባ ከኢደ ሴጠና፤ ኤተ በበፀካ መዳ መዪዥሥ ዳ፥ መሄሽ ዱዌበማ ኮዎማኳ፥ አል ረባኼ። 11አለአ እገሻ ኤተ በኸገሰኮቆ ካል ገፀ፤ አኳ "ከምዳ ማሄሻ ካኳ።" 12መዶኳኼ ኤያል ቃይልኼ፤ ከፄ ቤድ አ ካል ሴጠና፥ ቤሾቆ ዱዌበማ። ካሤ ቤከሾቋ? ከፄ ቤድ መደዳለማ ገንሠማ፥ አል ዱዌበማኳ ገሸለማ። 13ኢዴበም፥ መሰሠኼ እልኻ ኤከማቸከካኽ ጸጋ አል ኤበ እኔያ ካኻ። 14ከፄ በኮሄከሽ አኳ ኢዴቦኳ፥ በኮገምካ ኤበኮተርከንዥገን ነመሻ ከመኢያ፤ ኤተ በበፀካ መሄሽ ዱዌበማኳ፥ በኢካ ኒል መሻ፥ ከምፀቆ ናሥ እል መሻኳ። 15ኤተ በካቸከካኽ ከዱዌበማ ኮዎማ ኤተ መሾቆ ጸጋ፤ በኸገምካ ኤበንዢገካ ኤተ መሾቆ ጸጋኳ መኢያ አል ግዢ ግዥ። 16ዳ ኤተ ከምገምኮካ ኤበደካ ማሄሻ ኣሤ፥ ከኤተ ባተገርኬቆ አክችስቶስ ጺማ በኸኬ ከፄኳ፤ ካ ከምዳ ካኳኳ ኤከማተገርኮቆ ጺኳ ከምኾኳ ከፄ ኢዴቦኳ። 17ጸጋ ተቃ ሜተም መከገመሥ ዢገ ዱዌበማ ኤከምዥገካ እላ፥ ኤያላሥ ከምኢካን አማሄሽ ረባኳ ኒለማ? 18ኢዳለም፥ ነድ ማሄሻሎኳ ከመደዳ ከኸገሻኳ፥ መደዳኼ ካሥ ሳ ከገሻኳ። 19ዳ ኤተ ከምገምኮካ መዳሎኳ አል ኸገሻ፥ ኤከምኢኮቾጎ ነታሰ ረባ ከመገሚላ በላ መጤኳን። 20ኤከምዪፆቆን እሎኳ አኳኳ፥ በኮገምካ ኤበንተርኮቆ ረባ ኒሎኳ በቦቆ፥ ኤበገምካ አ ዳ ኮዎማኳ። 21ጀንደም፥ ኤከምበፃ መዪፆቆ አእልኳ አኳኳ፥ በኮጨካ መንዥግ እልኻ ነታሰ ረባ። 22ከፄ በኮዜከኽ ማገሸሣለማ፥ በኮደካ ዳ ኤተ በሄከሽ አኳ፥ ከምዸቦኳ ኣሥ ዳ ከምሎቆኳ ኖጎማ። 23ማገሸሣለማኳ ኤከምገሙኲል ከዱማ ከያሱስ ክርስቶስ፥ ኤከማሄኮሸን ኣሥ እልኾኳ ኤያሥ በገሸከሥ ክርስቶስ ካኳ። 24ኤተ ከምዜኽ ማገሸሣ አል ረባ ኮዎማ ከምኢካ ከአ፥ ረባኳ ከምኢያ ከአ፤ ከምገምኮካ ከገፉጫ ኤተ በኸኬ ካኳ ኤበኢካ አ ካኳ።

will be added

X\