1 ከደ ቆሮንቶስ 8

1ከመገሸራ እኽላ ከፄ በጫ ኤተ ቢሸኮቆ ከምሙሳ፥ ኤተ በኸቆተኬ አኽ ካራ። ኸገሻ፥ ኤያሥ በኸከለካ አኽ "በኮጨካ ኮዎኳ መገመሸማ፤" ነደንኳ፥ መገመሸማ አለአ በተኮከሥ ጸጋ፥ ማሄሻኸን በተጸከሥ ገሙንፀ ደ ገዴራ። 2ጸጋ ኤተ በኦከሥ ጸገማ ኤዳ ቤያምባለሥ በበኽ፥ አገምካኼ ኤበከኢካ ካ አማምባለሠማኼ። 3ጸጋ ኤተ በሄከሽ ረባኸን፥ ከምገማ አረባኳ አ። 4ከመገሸራ እኽላ ከፄ መሰ በጫ ኤተ ቢሸኮቆ ከምሙሳ፤ በኮገምካ ሙሳ ኤባንዢገካ መኢያ ነኤበ እኔያ ነለአ፥ ኣሥ ረባ ሜተል ኤበሜካ ጀንዳ። 5ኤከምኢያን መዥጋ ነጎዛ ነኔያኳ ኤተ በከጤካ በከዴረካ አጸጋ፥ ኤከምኢያን አበበኽ መዥግ ገፉጫ ከዶጎ ጥሳኳ፥ 6ካኳኸን በኢካ ኣሥ ረባ ሜተም። አኳ በባ ኤተ በዘዘኬ ዳ ኮዎማ፥ ኤተ ከምኢኳ አኳኳ ከአ። ኤያሥ ኤያኳ በኢካን ኤታ ሜተል፥ አኳ ያሱስ ክርስቶስ። ኤተ ቢዘዘኬ ዳ ኤተ በኢካ ኮዎማ ከንዶጎማ፥ ከምኢኳ አኳኳ ከንዶጎማ። 7ነደንኳ፥ አጨካኼ አኮዎማ መገመሸማ አለኣኼ፤ ጸጋ ሜታ ሜታ ከፄ ባገምከኽ አመዴራ ከሙሳ፥ ኖከ ቢሰካ በጫ እኽላኳ፥ ቢሰካ ኤያሥ በጫ ኤተ ቢሸኮቆ ከምሙሳ፤ ከፄ ቢበፀካ መዥጉዋ ነመገሚላ፥ ከመዦጓ እለማም ከመስ በጫ አለአ። 8ነደንኳ፥ ኤተ ከምሮቆ አኳ ኮጎ ረባ፥ አደ መሳኼ። ኤከምበፆኳ መሶኳ፥ አኢካንኼ ዳ ኤተ ከምሸ ካኳኼ፥ ኤከምሶኳናኳ ከምተጻኼ ዳ ሜተል ካኳኼ። 9ዜኸኽ ጸገኻ፥ ኤከምበፃ መዳ አመገመሸማለኻ ከደ መሥ ከደ በሌኤካ ነመገሚላ። 10ኤከምገመሥ ጸጋ ኤተ በበፀካ መዥጋ ነመገሚላ ሜታ አም ኤተ ባጨካ መገመሸማ ማከኢ ነመሰሳ ነመፀ ሙሳ፥ ከምጅራኼያኽ አመሰማሉ አለአ መዣ አ፥ ኤከምሳ በጫ ኤተ ቢሸኮቆ ከምሙሳ? 11ኤያሥ አለአ መዣ ኤተ በጨካ ዱ ገናሥ መገሚላ፥ ዱዌበኡ ኤተ በከሸካ ክርስቶስ፥ ከምቴካ ከመገመሸማ ካሉ። 12ኤከምሸ ኸሥ ከኢዴበኻ ደ ገዴራ፥ ኤከምትርኸኪል መገሚላለማም ኤተ በበፀካ መዥጋኳ፥ ከምሸ ኸሥ ከክርስቶስ። 13ካ፥ ኤከምዳ ደ መሳ ከደ መሥ ከዱዌበም ኤተ ገዴራ፥ ሜተል ከማኮለሪልኼ መሰ በጫኼ፥ ኤከምበፀራ መደራን ከዱዌበም ከደ መሥ።

will be added

X\