1 ከደ ቆሮንቶስ 7

1ከፄ እገሻ ኤተ በኸቆተኬ ካራ ከምኮለሮቆ ካኻ፤ ጸጋ በምበፅ መሮቆ እገፋ ገሸለማ። 2በላ መፋታን ከገንሣ ከፄ ጎሲያ ነጭ ጉንዛ እገፋ ኪልቆማ ኪልቆማ፥ እገፋኳ ጉንዛ ኪልቆማ። 3ጉንዛ ነዸበሥ እገፋለማ ከማሄሻ፥ ኤያሥ ኤያኳ እገፋ ነዸበሥ ጉንዛለማ ከማሄሻ። 4ከምፈለሸኼ እገፋ መገሻ መከላ፥ "ጸገም ኣሥ አለም፥" ከጉንዘማኳ አለማ፤ ከምፈለሸኼ ጉንዛ መገሻ መከላ፥ "ጸገም ኣሥ አለም፥" ከገፈማኳ አለማ። 5በላ መዳን ኖከ በኻገሰኪል ከምፀቋ ነገዴራ፥ መኮዎኾቆኼ ማዸበሣኼ። ነለአ ነቸቻኸን ኮለኻ ኣዸበኸሥ፥ ኤከምበፃን ሴጠና መዸባ እንዶዋ ኤተ ከምዻምበካ አኻ ነመሃለሽ መዜኽ ጸገኻ። 6መከላለም አለአ ከመኸስ እንዶዋ ካኻ፥ ከመቶቆ አኻኼ። 7በርምሄከሽ ኤበምበፀካ ጸጋ ኮዎማ መሮቆማ በመድ ኤያለም፤ በጨካ ጸጋ ኮዎማኸን ኖጎ ረባ ደ መኻ ከጅንሰማ ከጅንሰማ፤ ሜታ በጨካ ሾከ ደ መኻ ሜታ፥ ሜታኳ ሾከ ደ መኻ ጀንዳ። 8ከደ በበፀካ መሮቆን ኤያሥ ኤያ ከጋፋ ደ በሸከሥ ጉንዛ በርከለካ ቢመድ ኤያሥ አለም ገሸለማ። 9ኤከመሃሉሽ መዜኽ ጸገማምኸን ኒያሮቆ፤ ከመንጥጣቋ ከመአጀበ በጫ አማሮቋ ከምገሸላ። 10ከደ ባርኮቆንዥገናኸን በርጨካ ማቶቋ፤ ማቶቋ አለኣኳ በላ መዳን አለም፥ አል ኤታ፤ አኳ፥ እገፋ ማጨጉዋኼ ከጉንዘማኼ። 11ኤከማጨጉዋ ከጉንዘማኸን፥ ነኢሽ በላ መሮቆን ጉንዛ ጀንዳ ፌት ናገኽ ከጉንዘማ፤ ጉንዛኳ መሙቸሸዳኼ እገፋለማኼ። 12ከጸጋ ጃጀንዳኳ፥ በላ መዳን ኤታ፥ ከመገሸርካ አርኳ ኪልቆም፤ ኤተ ገዴራ ሜታ ኤከምጫ እገፋ ኤተ በበፀካ መዳ ኤተ ገዴራ፥ ኤከምሄሽ እገፋ አኳ መኢዋ ከጉንዘማ ከአ፥ መሙቸሸኼ አጉንዛ አ እገፋ አኼ። 13እገፋ ኤተ ገዴራ ሜታ ኤከምጫ ጉንዛ ኤተ በበፀካ መዳ ኤተ ገዴራ፥ ኤከምሄሽ አጉንዛ አኳ መኢዋ ከገፋ ከአ፥ መዥኬልኼ እገፋ አ ከጉንዛ ከአኼ። 14ጉንዛ ኤተ በበፀካ መዳ ኤተ ገዴራ፥ ኤከምዳ እገፋለማ ኤተ ገዴራ፥ ከማራቆ ኖጎ ረባ፤ ኤያሥ ኤያ እገፋ ኤተ በበፀካ መዳ ኤተ ገዴራ፥ ኤከምዳ ጉንዛለማ ኤተ ገዴራ፥ ከማራቆ ኖጎ ረባ። ኤከምበፃ መዳ ኤለአ ከማራቆኼ ኢዳለኻ ኖጎ ረባኼ፤ ኤኤለኣኸን ማሮቆማ ኖጎ ረባ። 15ነማም ኤተ በበፀካ መዳ ኤተ ገዴራ ኤከማኣጓ መዠኬል ነካንዤል፤ ኖካ ና ነድ ጉንዛ ኤተ ገዴራ፥ እገፋ ኤተ ገዴራኳ ከማፉንጩከሠኼ። ዳ በከኦከሥ ረባ አኳ፥ ኤከምኢኮሽ ከመገማ። 16አም እገፋ አለአ፥ ኤያብ ባገምካ ኤከምሬቆ ጉንዘኡ ኮጎ መገሚላ? አም ጉንዛ አለአ፥ ኤያብ ባገምካ ኤከምሬቆ እገፋሉ ኮጎ መገሚላ? 17ጸጋ ኮዎማ ኤያሥ በከኸኬ አረባ ገንዘ፥ ነከተጽ ነኢ ኤያሥ አል ኦከ በኦካ አረባ አ። እንዶዋ ኤተ በርትገከሥ ነገሙንፀ ደ ገዴራ ነኮዎማ ኣሥ አለአ። 18ጸጋ ሜታ ኤበኦካ አረባ ነመሸሣለማ ነቸቻ፥ መደዳኼ ኤዳ ቢበፅ መሹሠን። ጸጋ ጀንዳ ኤበኦካ አረባ በላ መሹሠን፥ ማኣጎዳኼ መሸሣኼ። 19ኣሥ መዜኽ ማቶቋ አል ረባ በጨካ በና፥ መሸሣ ከምበፀሽ መሸሣኳ አጨካኼ በናኼ። 20ጸጋ ኮዎማ ነከር ኤያሥ አል ኦከ በኦካ አረባ አ። 21ኖከ ቤኦ አረባ አም፥ አም ዎደኽ? መንሰሠኼ አለአ አምኼ። ኤከምዸባኣ እንዶዋ ኤተ ከምፓከሥ ነዎደኸን፥ መፐኸኼ አምኼ። 22ጸጋ መከኢ ነዎደ ኤበኦካ ኤታ አ፥ በፐከሠንዥገን ነዎደ ኖጎ ኤታ፤ ኤያሥ ኤያ መከኢ ዶቆ ኤባ ኤበኦካ ኤታ አ፥ አ ዎደ ክርስቶስ። 23ከፄ በኮደካ አረባ አኻ ከበና፥ መደኻኼ ዋደ ጸጋኼ። 24ካ ኢዴበም፥ ጸጋ ኮዎማ ነኢ ነታሰ ረባ ኤያሥ አል ኦከ ማኦዋለማ። 25ከፄ ዳጎና ደ ቢበፀካ በላ መሩቆን፥ አርጨካኼ ማቶቋ አል ኤታ ከማምኼ። አራኸን ኤጸጋ ናዸብ ማገ ኖጎ ረባ፥ መገሚለማኳ፥ ከመገሸርሥ ቁንዘም። 26ከፄ ማፉንጮቋ ኤተ በኢካ ከመዌያ፥ በምኢሽ ጸጋ በላ መሮቆን ገሸለማ በኢካ ካራ። 27ኤባደምርኮቆን እንገፋ ኤከምዳ፥ ማጨገኻኼ። ኣርኮቆንኼ ኤከምዳኣኳ፥ ማኣጓኣኼ መሮቆማኼ። 28ነደንኳ፥ ኤከምራቆ እገፋ፥ ኣደከኼ ገንሣኼ። ኤያሥ ኤያኳ ኤከምሩቆ ደጎና ሜተም፥ ደጎና አ አደካኼ ገንሣኼ። ጸጋ ደ ባርኮቋ፥ ከምዳ አበበኽ ማፉንጮቋ ነጸገማም። በራኣጎካ አርኳ፥ ኤበኸምፐሥ ኒል ኤለ ማፉንጮቋ ነለአ። 29ኢዴበም፥ ካሥ አል ኦከ ከምዌ አመርሸማ፥ አንጅ ማ መጸለማ፤ ነለአ ከገት ደ በጨካ ጋፋ፥ ኒኢ ኤደ ማንዢገማ። 30ኒኢ ደ በእሰካ ኤደ በበፀካ መእሳ፥ ደ ባገ ካይላ ኤደ በበፀካ ማገይል፥ ደ በኮደካ ዳ ኒኢ ኤያል ደ ማንዢግ ደ መጫ። 31ደ በከንድ ከኤለ ከዳ አል ኤበ እኔያ አለአ፥ ኒኢ ኤደ በበፀካ መንደ ከኤለ። ከምተራ ኤባ አል እኔያ ኤያሥ በከኢካ ዚያለአ። 32ካ፥ በርሄከሽ ኤከምኢኸሽ በላ መሳንዘኻ። ኤተ በበፀካ መሮቆ እገፋ፥ ከማገ ል ኤታ በሻምበካ ነመደዳ አል ኤታ። 33ጸጋ ኤተ በርኮቆ እገፋኸን፥ ከማገ ል እገፋለማ በሻምበካ ነዳ ናል ኤበ እኔያ። 34ከፄ አለአ እለማ እምበንድ እምበንድ። እገፋ ኤተ ቢበፀካ መሩቆን፥ ኤያሥ ኤያ ደጎና ኤከምዪዣሠን ጸገማ ከገፉጫለማ ከኤታ፥ በሻምበካ ነመደዳ አል ኤታ። እገፋ ኤተ ቢርኮቆንዥገናኸን ከማገ ል ጉንዘማ፥ በሻምበካ ነዳ ናል ኤበ እኔያ። 35በርከገሸከሥ አለኣኳ ከመተጸሥ አኻ፥ ከመፉንጭ ጺ አኻ ከሲያኼ፤ በራኣጎካ ኤከምደኻ ዳ ኤተ ከምገሸላ ከምዘራ፥ በላ መጅራን አዳ ጀንዳ አኻ፥ ኤከምጦኸኸን ጸገኻ ከመደዳ አል ኤታ። 36ጸጋ ሜታ መበፀሽ መሮቆ ደጎና ኤተ በዪርከሣ፥ ኤከምኢካ ኤዳ በከሸከሥ ከአ፥ ኤከምዥጋኽ ደጎና አ፥ ኤከምዌሥ አ መሮቆማኳ፥ ነጦ ኤያሥ በሄከሻ። ኒያሮቆ፥ አደካኼ ገንሣኼ። 37ጸጋ ኤተ በርኪል እገሻ አለአ ኪልቆማ፥ ኤከመሜያ ዳ ኤተ ከምተገኽ አ ከማሮቋ፥ ኤከምፈለሽ መዜኽ ጸገማኳ፥ ከምርሽ እለማ ከምበፀሽ መሮቆ ኤተ ማዪርሣለማ፥ ከምዳ ገሸለማ። 38ከለአ ጸጋ ኤተ ከምሮቆ ኤተ ማዪርሣለማ ከምዳ ገሸለማ፤ ኤተ ከምበፀሽ መሮቆ ኤተ ማዪርሣለማኳ፥ ከበቦቆ ከምዳ ገሸለማ። 39እገፋ ካሥ አል ኦከ ከምኢያ ጉንዘማ ከማፉንጨካሥ ከጉንዘማ፤ ኤከምሻ አጉንዘማኸን፥ ከማሩቆ ከኤተ በሄከሽ አ። ነደንኳ፥ ነድ መዣ አ ኤተ ገዴራ። 40በምኢሽ ኤያሥ አለአ፥ በማገይል በቦቆ። እገሻ አለኣኳ ኤእለም፥ ነደንኳ በኢካ ካራ ኤዳ በርጨካ አርኳ ገፉጨ ረባ።

will be added

X\