1 ከደ ቆሮንቶስ 6

1ናኻ ጸጋ ሜታ ኤከማቱዉሥ ከደ ገዴራ ጀንዳ፥ ኤያላሥ ከመንዥጋይልኸን አ ከመሮቆ እገሻ አ ኮጎ ጸጋ ደ በበፀካ መዳ አል ረባ ከመኸሣ። ከምዻኼያኽ ኮጎ ደ ገዴራ? 2አኸገምካኼያኽ ኤከምኸሠን አደ ገዴራ ከኤበ እኔያ ከለአ? ኤበኸኸከሥ ከኤባ አል እኔያ፥ ኤያበማ በኸከሃለሸን አኽ መር እገሻ ዱ ገናሠማ አለአ? 3አኸገምካኼያኽ ኤከምኸኮሥ አኳኳ ከሰ ገትጋ አል ጎዛ? እኽላ ከማሌኮኮሥ ከመኸሠማ ከዳ አል ኤበ እኔያኽ? 4ኤበኸጨካ ሾከ እገሻ አለኣኳ፥ ኤያብ በኸከርኮቆን አኽ እገሻለኻ ኮጎ ደ ተምባ አል ኤበ እኔያ፥ ደ ባንዢገካ ገሂን ነገሙንፀ ደ ገዴራ? 5በርከከለካ አለኣኳ ከመዪፆቆ አኻ፤ አኢካንኼያኽ ናኻ ኤተ መገመሸማ ሜተል፥ ኤተ ከምራ እገሻ ኤተ በኢካ ኖጎ ኢዴባ እምበንዳ? 6በላ መጦኻን ኤኤለአ፥ ዱዌባ ኤተ ገዴራ ሜታ በርኮቆ ዱዌበማ ኤተ ገዴራ ከኸ ተምባ፥ በጦካ ኤከምርካ ከማም አጸጋ ደ በበፀካ መዳ ደ ገዴራኳ። 7ማተምባ ኣሥ እልኸኻኳ ካኻ ደ ገዪፆቋ፤ አኸቀመኮቆኼያኽ ኤከማዱሠን ካኻኳ? ካሤ በኸከበፀካ ማቀዘኻሣ? 8አኻ ካሥ ከኢዴበኻ ደ ገዴራ በኸካደከሥ፥ በኻቀዘከሥኳ! 9ከለአ አኸገምካኼያኽ ኤከምበፃ አገንሠ ጸጋ መኩ ከገፋሌ ረባ? ማጠኻኸኼ ከለኣኼ! ደ ጎሲያ፥ ደ በዴረካ ሙሳ፥ ደ ጎርታ ኤያሥ ኤያ ጉንዛ ኤተ በካንዢገካ አጉንዛኳ፥ 10ደ ገልኳ፥ ደ በሲካሣ ከደ በደከኽ ደ መፋ፥ ደ መቴሥ ፄ ጸጋ ኤያሥ ኤያ ደ ማጎዠሥ ጸጋኳ ከምኩዋኼ ሜተል ኤለአ ከገፋሌ ረባኼ። 11ናኻኳ ቤኢን ጸጋ ጀንዳ ጀንዳ ነሾከ አለአ። እኽላኸን በኸኤፈከሠንዥገን ነገንሣ፥ በኸዪዥካሥኳ፥ በዪርካ አረባ አኻ ከመዪዥሠማ ከፄ ኤቶኳ ያሱስ ክርስቶስ ከገፉጨ ረባኳ። 12በኢካን ጸጋ ሜታ ሜታ ኤተ በከለካ፥ "አጻንደካቆኼ ሜተል ዳ ኮዎማ ካራኼ፤" ነደንኳ፥ ከምገሸልካኼ ዳ ኮዎማ ካኼ። ከምከለራ አርኳ፥ "አጻንደካቆኼ ሜተል ዳ ኮዎማ ካራኼ፥" ነደንኳ፥ ከምደራኼ ከዳ ሜተል ከዎደኼ። 13ጸጋ ጀንዳኳ በከለካ፥ "እጋ ከእላ፥ እላኳ ከጋ፤" ኣዬ ኸማ፥ ከማከኽ ረባኸን ከምበንደማም ከኔያ። ጸጎኳ ከመደዳ አል ኤታ ያሱስ፤ ኤታ ያሱስኳ ከፄ በሻምበካ ከጸጎኳ፥ አኸኬንኼ ጸጎኳ ከመደ ጎሲያኼ። 14ረባ በፈርኬቆንዥገን ኤታ ያሱስ ነመሻ፥ ከምፈርኮቆ አኳኳ ከመዥጋለማ ነመሻ። 15አኸገምካኼያኽ ኤበደካ ጸገኻ ጎ ሜታ ካል ክርስቶሳ? ርዾቆ ጎ ጸገ ክርስቶስ ሜታ፥ ጦራን ከጸገ እገፋ ኤተ ጎሲያኽ? እምበአ፥ ከምዳኼ ኤለኣኼ። 16አኸገምካኼያኽ ጸጋ ኤተ በጽጨከኽ ጸገማ ከገፋ ኤተ ጎሲያ፥ ኤከምዱዋ ከገፋ ከአ በጫ ሜተም። በከለካ መዪዥሥ ሎርጋኳ፥ "ከምበንደማም ከምዱዋ በጫ ሜተም።" 17ጸጋ ኤተ ከምጽጨኽ ጸገማ ኮጎ ኤታ ያሱስኸን፥ አ ከንዶጎ ገፉጫ ከምዱዋ ከኤታ ሜተም። 18ሃተኻሥ ነጎሲያ! ሾከ ገንሣ ጃጀንዳ ኤተ በደካ ጸጋ፥ አኩኪልኼ ጸገጸጋኼ፥ መደ ጎሲያኸን በኩኪል ጸገጸጋ። 19አኸገምካኼያኽ ኤበደካ ጸገኻ ኤመዪዥሥ መፀ ገዴራ አል ረባ፥ ኤተ በኢካን ገፉጫ መዪዥሠማ። ገፉጫ አለአ በኢካ ኒልኻ፥ በኸኬ አረባ ካኻኳ። ካ አኻ አል ረባ፥ አል እልቆኻኼ። 20ረባ በኮደካ አኻ ከመዥግ በና፤ ካ ሂንኸሥ ረባ ከጸገኻኳ።

will be added

X\