1 ከደ ቆሮንቶስ 5

1ኸገሻ ቢገሸከሠንዥገን ካራ፥ ኤበኢካን አጎሲያ ኖጎኻ ኤተ በበፀካ መኢያን ኖጎ ጸጋ ደ በበፀካ መዳ አል ረባኳ። በኢካን ጸጋ ሜታኳ ኤተ በካንዢገካ ከገፈ በበማ ኤገፋለማ። 2በላ መተኮኸሥ ጸገኻ አኸእሰከሠኼያኽ ከፄ አለአ? መዣ ኤተ በደካ አለአ በምደኼያኽ አመፖቆማ ኖጎኻ? 3ኤከምሃተራቆን ኖጎኻ ከጸገምኳ፥ ከገፉጫ በርኢካ ኖጎኻ። በርኸከሠንዥገን ከመዣ ኤተ በደካ ሾከ መንዳ አለአ ኤዳ በርኢ ኖጎኻ። 4በርደከንዥገን አለኣኳ ከፄ ኤቶኳ ያሱስ። ኖከ ከማሙንፀኾቆ፥ ኖከ ከምኢራ አርኳ ከገፉጫለም ኖጎኻ፥ ኤከማገማሥ መዥጋ አል ኤቶኳ ያሱስ ኖጎኻኳ፥ 5ከምዳ ካኻ አማተገሮቆ መዣ አለአ ከኤለ ሴጠና ከመቴሥ ጸገማ፥ ኤከምብዳን አፉሠ መዣ አ ኖከ ከምዌ ኤታ ያሱስኳ ከመኸሣ። 6ካ መሾጓለኻ ገሸለማኼ፤ አኸገምካኼያኽ ኤበጸሸከሥ አዱ ገናሥ ኣይ እጋ በበኽ ጊዛ? 7ፐኾቆ ገፀ ኣይ እጋ ኒልኻ ኤከምደኻን ጊዘ ኽኻ፤ ከፄ በደከንዥገን አክርስቶስ ከደ መኸ ጃጀ ፋዝጋ ካኳ፥ በኸደከንዥገን አኽኳ ጊዘ ኽኻ ኤተ ባንዢገካ ኣይ እጋ ኒለማ። 8ከለኣኳ ዎኼ፥ ሂንኮሥ ዚፈ ፋዝጋ ከጋ ኤተ ባንዢገካ ኣÄማ፤ መከላለም አለአ፥ ሂንኮሥ ከመዪዥሥ መኢያ ከኸገሻኳ፥ መሂንኮሠኼ ከገፀ ኣይ እጋ ኤተ በጨካ ገንሣ ከገንሠ እላኳ። 9በርቆተከንዥገን ካኻ ነገትጋለም ናል ገሲቋ፥ ኤከምበፀኻ ማገሰኺል ከደ ጎሲያ። 10መከላለም አለአ፥ ፐኸሥ ኖጎ ጸጋ ደ በኢካ ነጎሲያ ነኤባ ናል እኔያ ነለአ ኮዎማኼ፥ ኤያሥ ኤያኳ ኖጎ ደ መሲያሣ፥ ኖጎ ደ ገልኳ ከደ መዴራ ከምሙሳ ኮዎማኼ። በምኢካ ካኻ አመፐሣ ነኤባ ናል እኔያ። 11ዳ ኤተ ቤርቆት አር ካኻኸን፥ ኤከምበፀኻ ማገሰኺል ከጸጋ ኤተ በከለካ ኪልቆማ ኤተ ገዴራ ባጎሲካ፥ በሲካሥ፥ በዴረካን እምሙሳኳ፥ ከኤተ በቴከሥ ፄ ጸጋ በደከኽ ደ መፋኳ፥ ኤያሥ ኤያ ከኤተ በሎኮካኳ። መኢኸሸኼ ከሾከ ጸጋ አለአ ከመሰሳኼኳ። 12መደዳለምኼ መር መኸሣ ከጸጋ ደ በበፀካ መዳ ደ ገዴራ። አኻኸን፥ አኸከኸከሠኼያኽ ከደ በኢካ ነገሙንፀ ደ ገዴራ? 13በከለካ አመዪዥሥ ሎርጋ፥ "ፐኾቆ ጸጋ ኤተ በደካ ገንሠማ ኖጎኻ።" ከደ በበፀካ መዳ ደ ገዴራኸን፥ አረባ ከምኸከሥ።

will be added

X\