1 ከደ ቆሮንቶስ 4

1ኒዪር ጸጋ አኳ ኤያል ደ መደዳ አል ክርስቶስ፥ ደ ቢከኸካ መደዳ ከማቲስ ገጸፃ አል ረባ። 2ዳ ኤተ ቢያኣጎካ ነጸገ ደ መደዳኳ፥ መገሚለማ። 3እኽላ፥ ኤተ በኸኸከሥ አኽ ኤያሥ ኤያ ከጸጋ አል ተምባ ካራኳ፥ ከምዳኼ ነጸገም ሜተልኼ። አራ ከጺምኳ ከምኸርሠኼ ኪልቆምኼ። 4አራምባለከሠንኼ ነጸገም ሜተል ዳ ኤተ በርሸከሣኼ። ነደንኳ፥ ከምርካኼ ከለአ አመዳለም ከመዪዥሠማኼ፤ ኤተ ከምኸሥ ካራኸን ኣሥ ኤታ ያሱስ። 5ካኳ በላ መዳዬሸን ኦከማ፥ ነከምዌን አኤታኳ፥ መኸኸሠኼ አኽ ከጸጋ ሜተልኼ። አ ከምፖቆ ከመዪዦጓ ዳ ኤተ ባጸፀካቆ ኒል መጓ፥ ከምፖቆ ገሳንዘ እል ጸጋ ከኸ እኔያኳ። ኖካ ና ከምዸባ ጸጋ ኮዎማ ከጺማ ከጺማ መገ ላ ኖጎ ረባ። 6ኢዴበም፥ በርገሸከሥ አለአ ከፄ አጶሎስ ኪልቆምኳ፥ ኤከምዳን ካኻ ከመትገሣ። ሳ ኤተ በከለካ "መተርኸሠኼ ከምጻ ሳ ኤተ በከለካ አመዪዥሥ ሎርጋ፥" ኤከምገመኻን ኖጎምላ ኤበደካ መጨገሰማ ኣሤያ፥ በርጦካ አይላ እምበንድ ከመኮሣ። ከለአ ከምዳኼ ካኻ መሸኸኮጎ ከጸጋ ሜታ፥ መኸሠን ጸጋ ጀንዳኳ። 7ኦዴ በኸኬ ካም ኤከመንተራቆን ነጃጀንዳ? ኣሤ ባጨካ ነዳ ኤተ በበፀካ መኼን አረባ ካማ? ኤባርኬቆ ዳ ኮዎማ ኖጎማኳ፥ ካሤማ ባከከሾጎን አም ኤዳ ናበፅ መዳ ከኤተ ቢኸኬያ? 8እኽላ አኸነን አኽ? አኸተቀን አኽ? ኤከምበፃን መዳን አይላኳ፥ አኸደን አኽ ከጥሳኽ? ኤከምድላን አይልኳ ከአኻ ከጥሳ፥ በርምሄሽ ኸገሻ ኤበኸመዳ አኽ ከጥሳ። 9ኤበኮከሥ ካራ፥ በጦካ አረባ አይላ ሰ ገትጋለማ ነጸጋ ነኮዎማ ከገቻ። አይላ ኤጸጋ ደ ኒከኸሥ መሻ ኒል ኤማንጀ ጸጋ፥ ቢልደካ ደ ጋሲያ ከደ ገሎዋ ነታሰ ሰ ገትጋ አል ጎዛ ካል ጸጋ አል ኤበ እኔያኳ። 10አይላ ከፄ ክርስቶስ ተሞ፥ አኻኸን ከንዶጎ ክርስቶስ ደ መገመኻ፤ አይላ መሌኤማ፥ አኻኸን መዥገማ፤ አይላ ደ ቢከሣ፥ አኻኸን ደ ቢመከሻ። 11ከደኽላኳ ቢልሸኪል ኤዴበና፥ ቢልሸካ እምበ ኣያኳ፤ ቢልኢሰከሥ ገደገና፥ ቢያዪልኦቸካ፥ ቢላኦቸካኽ ከመደዳኳ ከገአ ከገት። 12ቢልሻምበካ ነመደማ ከኤለምላ፤ ቢለገካስ ኖከ ቢሆተካ አይላ፤ ቢልቀመኮቆ ኖከ ቢያሙቸኮቆ አይላኳ። 13ኖከ ቢካ ፄምላ፥ ቢልኮለኮቆ ገሸል ሳ፤ ቢልደከንዥገን ከንችጃ አል ኤበ እኔያ፥ ከደኽላ ከገጨር እኔያኳ። 14በርገሸካ ካኻ ኤማሄሸ ኢዳለም፥ አርቆተካንኼ አለአ ከመዪፆቆ አኻኼ። 15ኤከምጨኻን ከንዶጎ ክርስቶስ ኤተ ከምዱቆ አኻ ኤተ ባንዢገካ መንዘ ኸማ፥ አኸጨካንኼ በባ ኤማንጀማኼ። በርደከንዥገን አርኸን ከንዶጎ ያሱስ ክርስቶስ ከበበኻ። ከመትገሥ ሰ ማገ ላ አል ረባ ካኻ። 16ካ ከመገሸራ ካኻ ኤከምሁለኻን መኮሣለም። 17ከፄ አለአ በርትገከንዥገን ጢሞቴዎስ ኮጎኻ። አ ከንዶጎ ኤታ ማሄሽ ዱዋለም፥ መገሚለማኳ። አ ከማኮሊል መገሸሠማ ካኻ መትገሠማለም፥ ኤተ በርትገከሥ አር ኤኤተ መደዳ አል ያሱስ ክርስቶስ ነገሙንፀ ደ ገዴራ ኮዎማ። 18ናኻ ጸጋ ሜታ ሜታ ቢኦከሥ ኤዳ ከምበፀራ መዎሬ ከመዪርቆ አኻ፥ ቢተኮከሥ ጸገማም። 19እኽላኸን ኤመከላ ኤታ፥ ፈላ ከምዎሬ ኮጎኻ፤ ኖካ ና በላ መዳን ኣሥ እገሻለማም፥ በራኣጎካ መገም መደዳ አል ደ በተኮከሥ ጸገማም አለአ። 20ከንዶጎ ከማትጋሥ ገፋሌ ረባ ኖጎኳ፥ ከመደዳ፥ መገ ከሳኼ። 21ካ ኣሥ በኻኣጎን አኽ? አኻኣጎካ ከምረሬቆ ዘጎላ ከምዎርኬ ኮጎኻኽ? ፌት ዎሬ ከማሄሻ ከመገ  እላኽ?

will be added

X\