1 ከደ ቆሮንቶስ 3

1አራኳ ኢዴበም፥ በርገሸከሥ ካኻ ኤያል ደ በሁለካ መኢ በጫ፥ ኤያል ደ በሌኤካ ነመገሚላ ከክርስቶስኳ፥ አርፈለከሸንኼ መገሸርሥ ካኻ ኤያል ደ በጨካ መዪዥሥ ገፉጫኼ። 2በርኸከንዥገን ኩዋ ካኻ ኤከምፈኻ፤ ከፄ በኸበፀካ መትተኻ ካ፥ አርኸከንኼ መዥግ ደ መሳ ካኻኼ፤ ከደኽላኳ አኸትተካንኼ። 3በኸሁለካ አኽኳ ከደኽላኳ መኢ በጫ። ዳ በከኢካ ገንሠ እላ ከማከለማ ኖጎኻ፥ አኻ ደ መሁል መኢ በጫኼያኽ? በኽኢካ ኤያሥ አል ጸጋ ጃጀንዳኼያኽ? 4ናኻ ሜታ ኤበከለካ፥ "አራ አል ጳዉሎስ፥" ጀንዳኳ "አራ አል አጶሎስ፥" በኽኢካ ኤያሥ ጸጋ አል ኤበ እኔያኼያኽ? 5አጶሎስ ኣሤያ? ጳዉሎስኳ ኣሤያ? ከምበንድላ ደ መደዳ አል ረባ ደ በኦካ አኻ ከመገሚላ፤ ቢልደካ ሜታ ሜታማለምላ መደዳ ኤተ በኸኬ ኤታ ካይላ። 6አራ በርንጨካ፥ አጶሎስኳ በከንተኮቆ ከኣያ፤ ኤተ በፈገኮቋኸን ኣሥ አረባ። 7ካ ኤተ በደካ ኸማ ኣሥ ረባ ኤተ ፈገኮቆ መፐማ፥ ኤተ በንጨካ፥ ኤተ በከንተኮቆ ከኣያኳ አደካኼ ኸማኼ። 8ኤተ በንጨካ ከኤተ በከንተኮቆ ከኣያኳ ማንዞ ቆማ። ሜታ ሜታማለማም ከምሩቆ በናለማም ኤመሌኣለማም። 9አይላ ከምበንድላ ማጨ ጺማ ደ ቢልደካ ከረባ፤ አኻኸን ቼ ረባ፥ መዶቋለማኳ። 10ኤያሥ መገ ኤተ ባኸካዬሽ ካራ ኖጎ ረባ፥ ኤጸጋ ናገመሽ መዶቆ መፃ፥ በርኮከሸንዥገን ሸ መፃ። ጸጋ ጃጀንዳኳ ከምዶቆ ኖቆማ፤ ሜታ ሜተምኸን ነካዪር ኤያሥ ኤከምጦዋ መዶቆማ። 11ኣሥ ኤተ በኮካሽ ነገሲቋ፥ ከምፈለሸኼ ጸጋ ሜተል መኮሽ ሸማ ጀንዳኼ። ሸማ ኤተ በኮካሽ ነገሲቋ አኳ፥ ያሱስ ክርስቶስ። 12ኤከምዶቆ ጸጋ ኖቆ ሸማ ከኣያ፥ ከለማና፥ ከግሻ ኤተ መዥግ በናኳ፥ ኤያሥ ኤያ ከጃ፥ ከግዚያ ከጅ ገሳኳ፥ 13ከምፖቆ አኦከ መኸሣ ከኸ እኔያ፤ ኖካ ና ከማትጋሥ መደዳ አል ጸጋ ኮዎማ ከማገማይል፤ ከማትገካሥ ከማንጃ፥ ከምዻምባ ማንጃኳ መደዳ አል ጸጋ ኮዎማ ኤበደካ ኣሤያ። 14መደዳ አል ጸጋ ሜተም ኤተ በደኮቆ አ ኖቆማ፥ ኤከማሻኽ በላ መጥጦቆን ማንጃ፥ ከምሮቆ መዣ አ በናለማ። 15ኤከምጥጣቆ መደዳለማኸን፥ ከምቴያ በናለማ፤ ከምብዳ ጸጋ አ ኪልቆማኳ፥ ነደንኳ፥ ኤጸጋ ኤተ ናፔሥ ኒል ማንጃ። 16አኸገምካኼያኽ ኤበኸደካ መዪዥሥ መፀ ረባ፥ ኤበኢካ አገፉጨ ረባኳ ኒልኻ? 17ኤከምቴሥ ጸጋ መዪዥሥ መፀ ረባ፥ ከምቴሥ ረባኳ አ። መዪዥሥ መፀ ረባ ኸገሻ መዪዥሠማ፤ አኳ አኻ። 18ማጠኸኼ አጸጋ ሜተል እልቆማኼ። ናኻ ጸጋ ሜተል ኤመኢያ አል ኤበ እኔያ አለአ ኤከምኦሥ ጸገማ ኤደ መገመኻ፥ ኤከምዳን ኸገሻ ኤተ መገመኻ፥ ነድ ከኤተ በዪርካ ኤበ እኔያ ከተሞ። 19መገመኻ አል ኤበ እኔያ አለአ ኖጎ ረባ መንተሞቋ። በቆተካንዥገን ነመዪዥሥ ሎርጋ ኤተ በከለካ፥ "አ በራቆካ ደ መገመኻ ካሥ ከመንጠኸማ ከአለማም።" 20ኖጎ ጀንዳኳ፥ "በገምካ አረባ ገሳንዘ ደ መገመኻ ኤበደካ መገ።" 21ካ፥ መሾጎኼ ጸጋ ሜተል ከዳ ኤተ በፈለከሽ አጸጋ መደማኼ። ዳ ኮዎማ አለኻ፤ 22ነድ ጳዉሎስ ከአጶሎስ፥ ኤያሥ ኤያ ጴጥሮስኳ፥ ኤባ አል እኔያ፥ መኢያ ከመሻኳ፥ ዳ ኤተ በኢካ እኽላ ከዳ ኤተ ከምዌ ነንኳ፥ ዳ አለአ ኮዎማ አለኻ። 23አኻኸን አል ክርስቶስ፥ ክርስቶስኳ አል ረባ።

will be added

X\