1 ከደ ቆሮንቶስ 2

1ኢዴበም፥ ኖከ ቤርዌ ኮጎኻ ከማቲስ ገጸፃ አል ረባ ካኻ፥ ኤርደንኼ ከበበኽ ሳ ከገሸ መገመኻኼ። 2ኖከ ቤርኢ ኖጎኻ ቤርገም ኣሥ ያሱስ ክርስቶስ ኤተ ቢቱ ነጋገድ ጃ፥ ቤርሪለንዥገን ኤከምበፀራ መገመራ ዳ ጀንዳ። 3ቤርዌ ኮጎኻ ከመሌአ፥ ከገጤያ፥ ከበቦቆ ማሰሲያሣኳ። 4እገሻለም ከማቲሳለምኳ ቤትገሥ ኤቤድ አመዥጋ ከገፉጨ ረባኳ ኒለም፥ ኤርደንኼ ከሰ መገመኻ ኤተ በቼ ቁንዘ ጸጋኼ። 5ካ በኢከቾጎ መገሚላለኻ ነመዥጋ አል ረባ፥ አኢከቾጎኼ ነመገመኻ አል ጸጋኼ። 6ነደንኳ፥ ከመገመኻ ቢለገሸካ ኖጎ ደ ባካኻ። መገመኻ አለኣኸን አል ኤበ እኔያ አለኣኼ፥ አል መዥግ ገፉጫ አል ኤበ እኔያ አለኣኼኳ። እማም አለኣኳ ደ ከምቴያ። 7መገመኻ ኤተ ቢለገሸካ አይል፥ ገጸፀ መገመኻ አል ረባ፥ ኤተ ቤያጸፃቆ ኖጎ ጸጋ። ረባ በላ መዘዜን ኤበ እኔያኳ፥ ቤገ ሥ ገጸፀ መገመኻ አለአ ኤከመንዞኲለን ነገሂንለማ። 8ኣምባለከሠንኼ ጥሳ አል ኤበ እኔያ አለአ መገመኻ አለኣኼ፤ ቢማምባለከሥ በደካ፥ ቢምቱካንኼ ኤታ አል ገሂን ነጋገድ ጃኼ። 9ነደንኳ፥ ኤያሥ ቢቆተካ ነመዪዥሥ ሎርጋ፥ "ዳ ኤተ በገ ከሥ አረባ ከደ በሄከሽ አ አገምከሠንኼ አኸ ጸጋ ሜተል፥ አገሰኮቆንኼ አፄ ጸጋ፥ አዸበከሠንኼ አገሳንዘ ጸጋኼኳ።" 10በትገኬሥ አረባኳ አለአ ካይላ ከገፉጫለማ። ገፉጫ አለኣኳ በዪርኪል ዳ ኮዎማ፥ በዸበከሥ መሃቶቆ ገሳንዘ ረባኳ። 11ኤተ በገምካ አል እል ጸጋ ኣሥ ገፉጫ ኤተ በኢካ ኒል መዣ ና፥ አፈለከሸኼ ጸጋ ጀንዳ መገመማኼ፤ ኤያሥ ኤያ ኤተ በገምካ አል እል ረባኳ ኣሥ ገፉጫለማ፥ አኢካንኼ ሜተልኼ። 12አይላኸን ኤከምገሚላን ደ መኻ ኤተ ባኸካዬሽ ካይላ ኖጎ ረባ፥ ቢልርኮቆ ገፉጫ አል ረባ፥ ኢልርኮቆንኼ ገፉጫ አል ኤበ እኔያኼ። 13ካ ቢልጨገከስ አይል መደዳ አል ገፉጫ ከደ በዸበካ ገፉጫ፤ ሳ ኤተ ቢለገሸከሥ አይል፥ በፐኬሥ ነመትገሣ አል ገፉጫ አ፥ አፐኬሠንኼ ነመትገሥ መገመኻ አል ጸጋኼ። 14ጸጋ አል ኤበ እኔያ ኤተ በበፀካ መሮቆ መዪዥሥ ገፉጫ፥ አሄከሸኼ ደ መኻ ኤተ ከምዌ ነገፉጨ ረባኼ፤ ከምኢካ አደ መኻ አ ኤመንተሞቋ፤ ከማምባለሥ ደ መኻ አለአ ከፄ በደካ አመጨ መዪዥሥ ገፉጫ፥ ከምፈለሸኼ ማምባለሠማኼ። 15ኤተ በጨካ ገፉጫኸን ከምፈለሽ ዳ ኮዎማ መዪራ ማጹሺለን፥ ኤተ ከምፈለሽ መዪራ ማጹሺል ጸጋ አኸን፥ አኢካንኼ ሜተልኼ። 16ኤያሥ ቢቆተካ፥ "ኦዴ በገምካ ቁንዘ ኤታ? ኦዴኳ ከምፈለሽ መገሸካ?" አይላኸን ቢልጨካ ቁንዘ ኤታ።

will be added

X\