1 ከደ ቆሮንቶስ 16

1ከመገሸራ እኽላ ከፄ ለማና ኤተ ቢሙንፀኮቆ ከመተጸሥ ደ ገዴራ አል ዬሩሳሌም። ጦኽ አኽኳ ኤያሥ በርገሸከሥ ከገሙንፀ ደ ገዴራ አል ገላቲያ። 2ኖከ ከምዎሬ አር ኮጎኻ ኤከምበፀኻ ማሙንፀኾቆ ለማና፥ ኮዎኻ ኪልቆኻ ኪልቆኻ ነኤሙሳ ነኤሙሳ ኤያሥ በኸዸበካ በነ መደዳ አሙንፀኾቆ ለማና፥ ጦኸሥ። 3ኤከምዎሬ አር ነን፥ ከምኸርካ ሎርጋ ከጸጋ ደ በኸገምኪላ አኽ፥ ከምትገራ እማም ኤከምዹካን ከለማን ማተጸሣለኻ ከዬሩሳሌም። 4ኤከምኢያ በጨካ አመዻለምኳ በና፥ ከምዽላ ደ ኮዎዊላ። 5ኤከምተርዺል ማቀዶኒያ፥ ነቾጎ መዻለም ከምዎሬ ኮጎኻ። ማቀዶኒያኸን ከምተርዺል። 6ኢገም ከምፀ ራቆ ኖጎኻ ከምዳ፥ ከምፐሪል መደማኳ ኖጎኻ። ና ነቸቻ ከምፈለኸሽ መዪቶቆ አራ ካሥ ጎ ከምዸራ። 7እኽላኸን ነቾጎ እንዶዋለም አራኣጎካኼ መዪርዾቆ አኻኼ፤ ነለአ ነቸቻ ኤመከላ ኤታኸን፥ ከማጦሪል ኤከምፀ ራቆ ኖጎኻ። 8ካሥ ዚፈ ጴንጠቆስጤኸን ከምፀ ራቆ ናሥ ኤፌሶን ነገአ። 9ኤከምፈጋኸን ደ በንሰካ አራኳ፥ በኮርካሰንዥገን በቢል እንዶዋ ካራ ነገአ ከመደ መደዳ ኤተ በጨካ ኸማ። 10ኖከ ከምዌ ጢሞቴዎስ ኮጎኻ፥ ሄኸሽ ኤከምኢሸን ኖጎኻ በላ መቆቋሠን፤ አኳ ኤያሥ አለም በኢካ ነመደዳ አል ኤቶኳ። 11መሠኼ አጸጋ ሜተል አኼ። አራኳ ከኢዴባ ከደ መደዳ ከጀንዳ ከፄ ቢልኢካ ነመዜኽ አ፥ ኤከምኮሌን አ ኮጎም፥ ዪተኼቾጎ ከመገማ። 12ዱዌቦኳ አጶሎስ፥ ኤከምዌ ከመዪርቆ አኻ ከኢዴባ ከጃጀንዳ በረኮለኪል በርሎቆከሥ አ፤ አኸን አሄከሸንኼ ሜተል ኤከምዌ ኮጎኻ እኽላኼ፤ ኖከ ከማገ ከሣኳ ከምዌ። 13ኣምበንኻሥ፥ በላ ማኦቸኻኸን ዥገኻ ነመገሚላ፥ እንዥገኻቆ እት፥ ደኻ መዥገማኳ። 14ዳ ኤተ ከምጦኻ ኮዎማ፥ ነድ ከማሄሻ። 15ኢዴበም፥ በኸገምካ ኤቢደካ አደ መፀ እስጢፋናስ ነኣካያ ደ ገዴራ አል መሲቆማ፤ እማም ቢኸካ ጸገማም ኤከምዱዋን ዳ ከጸጋ አል ረባ። ከምሎቆርከሥ አኻ፥ 16ኤከማገሰኻሥ ከማም፥ ኤያሥ ኤያ ከደ በተጸከሥ እማም በሌኤካ ከማምኳ። 17ዳ በኸከሃለከሽ አኽ መዌያኸን፥ በራገ ካይል ነመዌ እስጢፋናስ፥ ፎርቱናጦስ፥ ከኣካይቆስ ደ ቢዎኬ ኤጎኻ። 18እማም ኤያሥ ቢቤከኽ እልኻ፥ ቢቤከኸንዥገን እለምኳ። ኸኸካ ገሂን ከሾከ ጸጋ ከለአ። 19ገሙንፀ ደ ገዴራ አል እሲያ ቢትገካ ዳገ ካኻ። ኣቂላ ከጵሪስቃ ከደ ገዴራ ደ በሙንፀኮቆ ነመፃለማም ኮዎማኳ ቢትገካ ጎከሠ ዳገ ካኻ። 20ኢዴባ ደ ገዴራ ደ በኢካ ነገአ ኮዎማ፥ ቢትገካ ዳገ ካኻ። ኣፅምኻ ኤመኢ ደ ገዴራ፥ ኣሎቆኸሥ ዳገ። 21አራ ጳዉሎስ በርቆተካ መቆታ አለአ ካሥ ኤለም ካኻ፤ "ዳገለም ነድ ከአኻ።" 22ኤተ ከምበፃ መሄሽ ኤታ፥ ማሆተማ! "ማራናታ!" መጨገሰማ መከላ፥ "ኤቶኳ፥ ዌ!" 23መገ አል ኤቶኳ ያሱስ ነድ ከአኻ። 24ነድ ማሄሻለም ከኮዎኻ ከንዶጎ ያሱስ ክርስቶስ።

will be added

X\