1 ከደ ቆሮንቶስ 13

1ኤከምፈለርሽ መገሽ ሰ ሾከ ኤማንጀ ጸጋ ኤያሥ ኤያ ሰ ሰ ገትጋ አል ጎዛ፥ ኤከማንዢገራ ማሄሻኸን፥ አራ ኤሶ ኤተ ናሉጎ ኤያሥ ኤያኳ ኤሰረማ ኤተ ናከል ድል ድል። 2ኤከምጨራ ደ መኸ መገሽ መዪርጓ፥ ከምገመራ ገጸፃ ኮዎማ፥ ከምጨራ መገመሻ ኮዎማኳ፥ ኤያሥ ኤያ ኤከምጨራ በቦቆ መገሚላ ኤተ ከምችደርኮቆ ዶላኳ፥ ኤከማንዢገራ ማሄሻኸን፥ አራ መገ ። 3ኤከመንዘ ራ ደ መጫለም ኮዎማ ከደ ዢጋ፥ ከማተገርዾቆ ጸገም ከምኸራ ኤከምጥጦቆ ማንጃ፥ ኤከማንዢገራ ማሄሻኸን፥ ከምዳኼ ካራ ሜተልኼ። 4ማሄሻ ኤተ መቀሞቆማ ማገ ለማኳ፤ ማሄሻ አንሠካይልኼ፥ አሸኮጎኼ፥ አቶኮከሠኼ ጸገማኼ። 5ማሄሻ አደካኼ ደ ገዪፆቋኼ፥ አኣጎካኼ ዳ ኤተ ከምገ ካሥ እልቆማኼ፥ አቱካኼ፥ አንዘ ከኸኼ ገንሠማ ነጸገ ጸጋኼ። 6ማሄሻ ባገ ካይል ከኸገሻ፥ አገ ካይልኼ ከገንሠ ዳኼ። 7ማሄሻ በንቱገከኽ ዳ ኮዎማ፤ ማሄሻ በገምኪል ዳ ኮዎማ፥ በካጦኪል ከኮዎማ፥ በቀመኮቆ ኮዎማኳ። 8ማሄሻ ከምቴያኼ፤ በኢካን አደ መኸ መገሽ መዪርጓ፥ ከምቴያ አኳ፤ በኢካን አመገሻ ከሰ ኽኻ፥ ከምከራ አኳ፤ በኢካን መገመሸማኳ፥ አኳ ከምቴያ። 9ዳ ኤተ በኳምባለከሥ አኳ ዱፀን፥ መዪርጓ ኤተ በኮገሸካ አኳኳ ዱፀን። 10ኖከ ከምዌ አመትቶቆማ፥ ከምቴያ አዱፀን አለአ። 11ኖከ ቤርድ ኢዳ፥ ቤርገሽ ኤያል ኢዳ፥ ቤርሳንዘሥ ቤርዪር ኤያል ኢዳኳ። እኽላ ኤበርደካ ከመዥገኽ ጸጋ፥ በርበፀከሸንዥገን መንደ ኢዳ። 12አኳ እኽላ በኮገምከሥ ኤያል ጸጋ ኤተ ናዪርሥ ነምፑ ሶ ናገመሥ ዳ፥ ኤተ በናሻኸን በላ ማምባለሠን ዳ አ፤ ኖካ ናኸን ከምገምኮሥ ከኾኳ እልኸማ። ዳ ኤተ በርገምከሽ አራ እኽላ ዱፀን፤ ኖካ ናኳ ከምገመርሽ አርኳ ዝንዜን፥ ኤያሥ በገምካ አረባኳ አራ ዝንዜን። 13ከምተራ ዳ ኮዎማ፤ ኤተ ከምፀቋኳ ኣሥ ዳ ኦካግ፤ እማምኳ መገሚላ፥ ማጦዪላ፥ ከማሄሻኳ። ኤተ በሙቸኮቆ ነማም ነለኣኳ፥ አማሄሻ።

will be added

X\