1 ከደ ቆሮንቶስ 11

1ኤያሥ በርሁለካ አር መኮ ክርስቶስ፥ ሁለኻ ኽኳ መኳለም 2በርመከሽ አኻ ከፄ በኸሳንዘከሥ አራ ነዳ ነኮዎማ፥ በኸካኢካ ከመትገሣ ኤተ በራተገርኮቆ አር ካኻ። 3በራኣጎካ እኽላኳ ኤከምገመኻ ኤበጨካ ክርስቶስ ገፋሌያ ኒልቆ ጉንዛ፥ ጉንዛኳ ኒልቆ እገፋ፥ ኤበጨካ ረባኳ ገፋሌያ ኒልቆ ክርስቶስ። 4ኖከ በዴረካ አጉንዛ ረባ ነገሙንፀ ደ ገዴራ ኤያሥ ኤያ ኤበገሸካ ሰ መዪርጓ፥ ኤከማጉንዶቆኳ ከምዪፆቆ እልቆማ። 5ኖከ በዴረካ አእገፋ ረባ ነገሙንፀ ደ ገዴራ ኤያሥ ኤያ ኤበገሸካ ሰ መዪርጓ፥ ኤከምበፃ ማጉንዶቆኸን፥ ከምዪፆቆ እልቆማ። እገፋ አ ኢያሃቸካኼ ከጋፋ ኤተ ኒደሥ ቤቆማኼ። 6ኤከምበፃ አእገፋ ማጉንዶቆ፥ ነደሥ ቤቆማ፤ መንሮቆ ቤቆማ ኤያሥ ኤያ መደሠማ ኤከምዪፆቆ አኸን፥ ናጉንዶቆ። 7ከፄ በደካ ጉንዛ መኮሥ ረባ በትገከሥ ገሂን ረባኳ፥ ከምደካኼ አማጉንዶቋኼ። ጋፋኸን በትገከሥ ገሂን ጉንዛ፥ 8ከፄ ነማጦሸማ በፐኬሥ ጋፋ ነጸገ ጉንዛ፥ አፐኬሠንኼ አጉንዛ ነጸገ ጋፋኼ። 9በዘዘኬ አረባ ጋፋ ከፄ ጉንዛ፥ አዘዘኬንኼ ጉንዛ ከፄ ጋፋኼ። 10ከፄ አለአ ከፄ ሰ ገትጋ አል ጎዛኳ ከምደካ ከጋፋ አማጉንዶቋ። ከምትገከሥ ከለአ ኤበጨካ ገፋሌያ ከመገሻ ነገሙንፀ ደ ገዴራ። 11ነደንኳ፥ ነመኢያሎኳ ከኤታ ያሱስ ከማጹሸኲልኼ ጋፋ ነጉንዛ፥ ከማጹሸኲልኼ ጉንዛኳ ነጋፋኼ። 12ኤያሥ በፐኬሥ ጋፋ ነጉንዛ፥ ኤያሥ ኤያ በፖቆኬ ጉንዛኳ አጋፋ። ዳ ኮዎማኸን በዎኬ ኖጎ ረባ። 13ኸኸሥ ሠኣኽ ኪልቆኻኳ! ጋፋ በላ ማጉንዶቆን መዴረካ ከረባ ነገሙንፀ ደ ገዴራ ከምገሸለካኽ? 14አትገከሠኼያኽ አመኢ መዘዛ፥ ኤበደካ ከጉንዛ አመጎ ሥ ቤቆማ ከገዪፆቋ? 15ከጋፋኸን በደካ አመጎ ሥ ቤቆማ ገሂን። በከኸኬ ኤከማጉንደኮቆን ከቤቆማኳ። 16ኤበኣጎካ ጸጋ ማከለማ ከለአ፥ አይላኸን ገሙንፀ ደ ገዴራ አል ረባኳ፥ ኢልጨካንኼ ነለአ መኢያ ጀንዳኼ። 17ነዳ ኤተ በርዸካ ከመገሸርሥ ካኻ እኽላ፥ አርጨካንኼ ዳ ኤተ ከመመርከሽ አኻ። ኖከ በኸሙንፀኮቆ ከገዴራ፥ ነመጦ ገሸለማ ከፄ በደካ በቦቆ ኤተ ከምሸ ሣ። 18በርገሰኮቆንዥገን ነመሲቆማ፥ ኖከ በሙንፀኮቆ ገሙንፀ ደ ገዴራለኻ ኤበኢካ አመምጹሻ ኖጎኻ። ነኤተ በርገሰኮቆ ነለአ፥ በርገምኪላ ኤበደካ ሜታ ሜታ ኸገሻ። 19ኸማ፥ ከምዳ ካኻ አመምጹሻ ኖጎኻ፥ ኤከማገሙዊለን ናኻ እምዎዴ ኤበደካ ደ ኸገሻ ከመገሚለማኳ። 20ኖከ በኸሙንፀኮቆ አኽ፥ ኤተ በኸሰካ መዪዥሥ ደ መሳ አል ኤታኼ። 21ኖከ በኸሰሰካኳ፥ ጸጋ ኮዎማ በላ መዜኸን ጃጀንዳ፥ በሰካ ኣሥ አለማ። ሜተል በሸኪል ኤዴበና፥ ሜተልኳ በደከኻ። 22ኣሤ አለአ? አኸጨካንኼያኽ መፃ ኤተ ከምሰኻን ከምፈኻንኳ አኽ? አኸ ከሣ አኽ ገሙንፀ ደ ገዴራ አል ረባ፥ አኸዪፀኮቋ አኽ ደ ባንዢገካ ዳ ሜተላኽ? ኣሤ ከምከለራን አር ካኻ? መርሽ አኻኽ? ከመርሸኼ አር አኻ ነለኣኼ። 23መትገሣ ኤተ በራተገርኮቆ አር ካኻ ኣሥ ኤተ በርርኬቆ ኖጎ ኤቶኳ፤ አኳ፥ ያሱስ ኤታ ናሥ መጎኳ ኤተ ቢያተገሮቆን አ ቢኸና፥ ቤሮቆ እጋ፥ 24ቤከኽ መገ ላ ከረባ፥ ቤንፂቆ እጋኳ ቤከል፥ "አለአ ጸገም፥ ኤተ ቢኸካ ካኻ፤ ጦኻ አለአ ከፂናለም።" 25ኤቢሰስ ነቸቻኳ፥ ቤሮቆ ሸፓ ቤከል፥ "ሸፓ አለአ ማገሲል ኽኻ ኤተ በደካ ከመሃለም። ኖከ ከምፈኻ ና፥ ጦኻ አለአ ከፂናለም።" 26ካ ኖከ ከምሰኻ እጋ አለአ ከምፈኻ ነሸፓ ነለአ፥ ከምትገኸሥ መሸ ክርስቶስ ካሥ አል ኦከ ከምኮሌ አ ከምዌ። 27ከፄ አለአ፥ በላ መኸካን ገሂን ኤተ በሰካ እጋ አ፥ በፈካ ነሸፐ ኤታኳ፥ ከምዳ ገንሣ ነጸገ ኤታ ከመሃለማኳ። 28ከለአ ጸጋ ኮዎማ ነሎቆሥ ጸገማ ናዪርሥኳ፤ ነለአ ነቸቻ ነሰ እጋ አ፥ ነፍ ነሸፓ ናኳ። 29ጸጋ ሜታ በላ ማጹሺለን ጸገ ኤታ ነዳ ነጀንዳ፥ ኤከምሳ እጋ አ፥ ከምፋ ነሸፓ ናኳ፥ ከምሮቆ መኸሣ ኪልቆማ ነመሰማ ነመፈማለማኳ። 30ከፄ አለአ ኖጎኻ በበኽ ጸጋ መሌኤማ መንሰሠማኳ፥ በሸሸከንዥገን አጃጀንዳኳ። 31ኤበምኢ በኮዪርከሥ ጸጎኳ ነገሲቋ፥ በምኸከሠኼ አረባ ካኳኼ። 32ከምኸሥ አኤታ እኽላ ካኳ ከምኮሌቆ አኳ ከንዶዋ፥ ኤከምበፃ መኻሥ ካኳኳ ከኤባ አል እኔያ ከግዢ ግዥ። 33ካ ኢዴበም፥ ኣንዜኸኽ ኖከ ከማሙንፀኾቆ ከመስ መዪዥሥ ደ መሳ አል ኤታ። 34ማሙንፆቋለኻኳ ኤከምበፃን መሮቆን መኸሣ ከጸገኻ፥ ኤተ በሸኪል ኤዴበና ነሰ ነመፃለማ። ከፄ ዳ ጃጀንዳኳ፥ ኖከ ከምዎሬ ከመገርሥ ካኻ።

will be added

X\