1 ከደ ቆሮንቶስ 10

1ኢዴበም፥ በራኣጎካ ኤከምገመኻን፥ ኤቤኢ አኩንዱ ኒልቆ እምበፈጎኳ ኮዎማ ቤቼስ እንዶዋ ከማም። ቢያንደሪል ኮዎማምኳ መዌኽ ኤያያ። 2ኮዎማምኳ ከመዳ ካል ሙሴ፥ ቢያጩጻቆንዥገን ከኩንዱ ከኤያያኳ። 3ቢሰከንዥገን ኮዎማም ኣሥ ደ መሳ ሜተል፥ ኤተ በኸኬ አረባ ነጎዛ፤ 4ቢፈከንዥገን ኮዎማምኳ ኣሥ ደ መፋ ሜተል ኤተ በኸኬ አረባ፤ ቢፍ ኣያ ኤተ በጸቀኽ አረባ ነታንተርሳ ነሜታ ኤተ ቤንሁልሽ እማም። ታንተርሳ አኳ ክርስቶስ እልቆማ። 5ኤበደካ ኤለኣኳ፥ ኤካገዪለንኼ ረባ ኮጎ በበኻለማምኼ፤ ቤዋሻቆ መሻለማምኳ ነኸ እኔያ። 6ኤያሥ ቢአጀብ እማም ገንሠማ፥ በ ጻንደኮቆ ዳ አለአ ኮዎማ አኳ፥ ኤከምበፆኳ አኳኳ መአጀብኳ ገንሠማ። 7ኤያሥ ቢደካ ነማም አጃጀንዳ፥ መዴረኻኼ አኽኳ እምሙሳኼ። ኤያሥ በቆተካንዥገን ነመዪዥሥ ሎርጋ፥ "ጸጋ ኮዎማ ቢኢከሽ ከመሰማ ከመፈማኳ፥ ቢፈርከሥ ቢጸካ ከምሙሳ።" 8ኤያሥ ቢድ ነማም አጃጀንዳ ጎሲያ፥ መዶኳኼ አኳኳ ጎሲያኼ። ከፄ አለአ ቤከር ናሥ ኦካ ነሜታ አጸጋ ኤግቸማ ማቁስ እል ግቸማ አሤር ኖቆማ ግቸማ ሜታ ከአሤር (23000)። 9ኤያሥ ቢዻምብ ነማም አጃጀንዳ ቁንዘ ረባ፥ ቤቀሽ አሆላ እማም ቢሸሻ፥ መዻምበኮቆ ቁንዘኼ አኳኳ ኤታኼ። 10ኤያሥ ቢገሺል ነማም አጃጀንዳ ሰማም ነጸገ ረባ፥ ቤቴሥ እማም አሰ ገትጋ ኤተ በርኬቆ መሻ፥ መገሸኺልኼ አኽኳ ሰኻ ነጸገ ረባኼ። 11በደከንዥገን ዳ አለአ ኮዎማ ኖጎማም፥ ኤከምጻንዶቆ አኳ፤ በቆተካንዥገን አለአ ካኳ ደ በኮኢካ ነመርሽ ኤበ እኔያ ነለአ፥ ኤከምዜኮኮኸን ጸጎኳ። 12ካ ጸጋ ኤተ በኢካ ኤዳ ቤኢቾጓ፥ ነዜኽ ጸገማ ኤከምበፃ መፋታን። 13አዎኬንኼ ከደኽላ ነጸገኻ አማዻምባ ኤተ በደካ ነጸገጸጋ በቦቆ። ረባ ከፄ በደካ መገሚለማ፥ ከምበፀሸኼ ኤከማዻምበኻ አኽ ነመዥጋለኻ ከበቦቆኼ፤ አ ከምኻ ካኻ መዥጋ ኤተ ከምፈለኸከሽ መቀሞቆ ማዻምባ አ፥ ከምቲሥ እንዶዋ ኤተ ከምፐኸከሥ ነማዻምባኳ። 14ከለኣኳ ኢዴበም፥ ሃተኻሥ ነመዴራ ከምሙሳ። 15በርገሸካ ካኻ ከደ ማምባለሠማ፤ ኸኸሥ ካሥ እልቆኻ ዳ ኤተ በርገሸከሥ አርኳ። 16ዪርኻ ሸፓ ኤተ በኮከርኮቆ መዪዥሥ ደ መኻ፥ ኤተ በኮከንኸካ መገ ላ ከረባ ከፄማ፤ ኖከ በኮምፈካ ና፥ በኮንዘ ኪል ነመሃ ክርስቶስኼያኽ? እጋ ኤተ በኮንፂከቆኳ ኖከ በኮንሰካ ና፥ በኮንዘ ኪል ነጸገ ክርስቶስኼያኽ? 17ከፄ በኢካ ኣሥ እጋ ሜተል፥ ኤከምፈጎኳኸንኳ፥ ዳ በኮከንዘ ኪል ነጋ ነሜታ ና፥ አኳ ኤጸገጸጋ ሜታ። 18ዪርኻና ሾከ እስራኤል! ደ በሰካ ነደ መኻ ኤተ ቢከኸካ ከረባ፥ ቢንዘ ኪል ነመደዳ አል ሸ ሲላኼያኽ? 19ኣሤ መከላለም አለአ? ከምዪርኳ በጫ ኤተ ቢሸኮቆ ከምሙሳ ኤዳ በጨካ በናኽ? ኤያሥ ኤያኳ መከላለም በጨካ ሙሳ መኢያኽ? 20እምበአ፥ ለማና ኤተ ቢሸኮቆ ቢከኸካኳ፥ ከገንሠ ሙሳ ቢኸካ፥ ከረባኼ። አራኸን አራኣጎካኼ ኤከማገሰኺልስ ከገንሠ ሙሳኼ። 21ከምፈለኸሸኼ መፈማ ነሸፐ ኤቶኳ ናል ያሱስ፥ ካል ገንሠ ሙሳኼ። ከምፈለኸሸኼኳ መንዘ ላ ነደ መሳ ናል ኤቶኳ፥ ካል ገንሠ ሙሳኼ። 22በላ ማመሠን ረባ ካኳ፥ ከምፈለኮሽ አኳ መንስ አኽ? አኮጨካ መዥጋ ነጸገማኽ? 23በኸከለካ "አጻንደካቆኼ ሜተል ዳ ኮዎማኼ፤" ነደንኳ፥ አገሸልካኼ ዳ ኮዎማ ከጸጋኼ። ኸማ፥ አጻንደካቆኼ ሜተል ዳ ኮዎማኼ፥ ነደንኳ፥ አተጸከሠኼ ዳ ኮዎማ ገሙንፀ ደ ገዴራኼ። 24ናኣጎ ጸጋ ኮዎማ ዳ ኤተ ከምገሸላ ከጃጀንዳ፥ ማኣጎዳኼ ኤተ ከምገሸላ ካሥ እልቆማኼ። 25በላ ማጤኻ እል፥ መሎቆኺል ኤቢርኬቆ ነጓብኳ፥ ከምፈለኸሽ መሰ በጫ ኤተ ቢኮደኮቆ ኒል ሱጋ ኮዎማኳ። 26ኤያሥ በከለካ መዪዥሥ ሎርጋኳ፥ "ኤባ አል እኔያ ከዳ ኤተ በኢካ ኒለማ ኮዎማኳ፥ ኣሥ አል ረባ።" 27ጸጋ ኤተ በበፀካ መዳ ኤተ ገዴራ ሜታ፥ ኤከምኦዋ አኻ ከመስ ዳ ከመፃለማ፥ ኤከማኣጎኻ አኽኳ መዻ፥ በላ ማጤኻ እል መሎቆኺለን ሰኻ ዳ ኤተ ከምሩዌቆ ካኻ ኮዎማ። 28ኤከምከላ ጸጋ ሜታኸን ካኻ፥ "በጫ አለአ ቢሸኮቆ ከምሙሳ፥" መሰኻኼ ከፄ በገሸከሥ አመዣ አ ካኻ፥ ከመተጸማኳ ከፄ ከምደሥ መዪዥኽ እላ። 29መከላለም "መዪዥኽ እላኳ፥" በላ መዳን አሉ፥ አለማ። ኤያበማ በከኸከሠን አእል ጀንደ ጸጋ ነመፈለሽ መሰ ዳ አለም ኮዎማ? 30ኤከምሰራ ጓለም ከመኸ መገ ላ ከረባ፥ አጨካኼ ጸጋ ሜተል ዳ ኤተ ከመከልከሥ አራ ነዳ ኤተ በርሰካ አር ከመገ ላ። 31ካ ኤመሰኻ ከምፈኻኳ፥ ኤከምደኻ ዳ ጀንዳኳ፥ ደኻ ኮዎማ ከገሂን አል ረባ። 32ነድ ከዶጎ ዪሁዳ ከደ በበፀካ መዳ ሾከ ዪሁዳኳ፥ ኤያሥ ኤያ ከገሙንፀ ደ ገዴራ አል ረባኳ፥ መደኻኼ ከደ መሥኼ። 33ደኻ ኤያሥ በርደካ አር። አራ ካሥ ዳ ኤተ በርደካ አር ኮዎማ በራኣጎካ ማገርኪል ጸጋ ኮዎማ። ኤከምብዳን ጸጋ ኮዎማ በራኣጎካ ኤተ ከምገሸላ ከጸጋ ከኮዎማ፥ አራኣጎካኼ ኤተ ከምገሸላ ኪልቆምኼ።

will be added

X\