1 ከደ ቆሮንቶስ 1

1አራ ጳዉሎስ፥ ከማሄሻለማ ኤተ ባርኦኬ አረባ ከሰ ገትጋ አል ያሱስ ክርስቶስ፥ ከዱዌቦኳ ከሶስቴኔስ፥ ቢልቆተካ ሎርጋ አለአ 2ከገሙንፀ ደ ገዴራ አል ረባ ደ በኢካ ነኤበ ቆሮንቶስ፤ ቢልቆተካ ኤያሥ ኤያኳ ከደ በዪዥካሥ ከንዶጎ ያሱስ ክርስቶስ ኮዎማ፥ ደ ቢኦኬ ኤከምዱዋን መዪዥሠማ ከኮዎ ጸጋ ደ ቢኦከ ፄ ኤቶኳ ያሱስ ክርስቶስ ኖጎ ኮዎማ። አ ኤታለማም ኤቶኳኳ። 3ነድ ከአኻ አመገ ከመገማ አል ረባ በቦኳ፥ አል ኤታ ያሱስ ክርስቶስኳ። 4መዱጎክ በርኸካ መገ ላ ከረባለም ከፄኻ፥ ከፄ ባኸካዬሽ መገ አል ረባ ካኻ ከንዶጎ ያሱስ ክርስቶስ፥ 5ነዳ ነኮዎማ ከገሻ ከማምባለሠማኳ፥ በኸዸበከንዥገን ከንዶጎ ክርስቶስ ደ መኻ ኮዎማ። 6ኤተ ቢልደካ አይል ኸገሻ ከፄ ክርስቶስ፥ ዳ በከዥገካሽ ትማ ኖጎኻ፥ 7ከምፀቆሰኼ ሜተል ደ መኻ አል ገፉጫ ካኻኼ፥ መኸከኢ ነመዜኽ ማትጋሣ አል ኤቶኳ ያሱስ ክርስቶስ። 8አ ከመንዥገሥ አኻ ካሥ አል ኦከ መርሸማ፥ ኤከምደኻን ደ ማንዢግ መሸ ሠማ ኖካ ናል ኤቶኳ ያሱስ ክርስቶስኳ። 9መገሚለማ ረባ ኤተ በኦኬ አኻ፥ ኤከምደኻን ሜተል ከዱማ ከያሱስ ክርስቶስ፥ ኤተ በደካ ኤቶኳኳ። 10ኢዴበም፥ ከመገሸራ ካኻ ከፄ ኤቶኳ ያሱስ ክርስቶስ፥ ኤከማገሰኺልሰን ነዳ ነኤተ ከመገሸኻ ኮዎማ። ነድ ገሳንዛለኻ ከቁንዘኻ ኣሥ ሜተል። 11ኢዴበም፥ ቢገሸከሠንዥገን ካራ አደ መፀ ክሎኤ ኤበኢካ አማከለማ ኖጎኻ። 12መከላለም አለኣኳ፥ ናኻ በከለካ ጸጋ ሜታ፥ "አራ አል ጳዉሎስ፥" ሜታኳ "አራ አል አጶሎስ፥" ጀንዳ "አራ አል ጴጥሮስ፥" ጀንዳኳ "አራ አል ክርስቶስ።" 13ካ አምጹሸካይል ክርስቶሳኽ? ኢቱካን ጳዉሎስኳ ከፄኻ ነጋገድ ጃኽ? ኤያሥ ኤያ ማጩጻቋለኻ ከፄ ጳዉሎሳኽ? 14በርኸካ መገ ላ ከረባ፥ ነክርስጶስ ከጋዮስ ኤተ በደካ፥ ኤበርበፀካ መጩጸርቆን ናኻ ጸጋ ጀንዳ። 15ከለአ ከምፈለሸኼ አጸጋ ሜተል መከላ ካኻ፥ "በኸካጩጸካቆ ከፄ ጳዉሎስ።" 16ነደንኳ፥ በርጩጸኮቆንዥገን እምእስጢፋናስ ከደ መፃለማ፤ ነለአ ከገት አርገምካኼ ጀንዳ ኤተ በርጩጸኮቋኼ። 17ዳ በከትገኬሥ ክርስቶስ አራ፥ ኤከማቲርሰን ሰ ማገ ላ አል ረባ፥ አትገኬንኼ ከምጩጾቆማኼ። መሸ ክርስቶስ ነጋገድ ጃ ኤከምበፃ መዳ መገ ፥ አራቲከሰኼ ሰ ማገ ላ አል ረባ ከመገመኻ ካል ጸጋኼ። 18እገሻ ኤተ በከለካ "በሸካ ክርስቶስ ነጋገድ ጃ" በኢካ ኤመንተሞቋ ከጸጋ ደ በኢካ ነንዶ መቴያ፥ ካኳ ደ በኢካ ነንዶ መብዳኸን፥ በካትገካሥ መዥጋ አል ረባ። 19በከለካ አረባ ነመዪዥሥ ሎርጋ፥ "ከምቴረሥ መገመኻ አል ደ መገመኻ፥ ከማርከኽ ከኔያ መገመሸማ አል ደ መገመሸማኳ።" 20ነጓብ ባሸካዬኽ ደ መገመኻ? ነጓብ ባሸካዬኽ ደ መትገሥ ማቶቋ አል ሙሴኳ? ነጓብ ባሸካዬኽ ደ መገመሽ እገሻ አል ኤበ እኔያ አለአ? በትገከሠንዥገን አረባ፥ ኤበደካ መገመኻ አል ኤበ እኔያ አለአ ከመንተሞቋ። 21ረባ በጦካ ከመገመኻለማ፥ ኤከምበፃ ጸጋ መፈለሽ መገማ አ ከመገመኻ አል እልቆማም። ካ ከገሻ ኤተ ቢላቲከስ አይል፥ ከኤተ በዪርካ አጸጋ ኤመንተሞቋኳ፥ በሄከሽ ረባ ከመብዶቆ ጸጋ ደ በገምኪላ። 22በሎቆኪል ዶጎ ዪሁዳ ዳ አል ገተምዛ፥ በኣጎካ ደ ግሪክኸን መገመኻ። 23ቢላቲከስ አይልኸን ክርስቶስ ኤተ ቢቱካ ነጋገድ ጃ፤ አለኣኳ ከዶጎ ዪሁዳ ደ መሥ፥ ከሾከ ጸጋ ጃጀንዳኸን መንተሞቋ። 24ከደ በኦካ አረባኸን፥ ነድ ዶጎ ዪሁዳ፥ ደ በበፀካ መዳ ሾከ ዪሁዳኳ፥ ቢላቲከስ ክርስቶስ፥ ኤበደካ መዥጋ አል ረባ ከመገመኻ አል ረባኳ። 25ዳ ኤተ በኮከሥ መንተሞቆ ረባ፥ በንተርኮቆ ነመገመኻ አል ጸጋ፤ ዳ ኤተ በኮከሥ መሌአ ረባኳ፥ በንተርኮቆ ነመዥጋ አል ጸጋ። 26ዪርኻና ኢዴበም፥ ኖከ በኦካ አረባ አኻ ኤበኸደካ ጸጋ ሾከ ኣባ። ጎ በበኻለኻ ኤገሳንዘ ጸጋ ደ መገመኻኼ፥ ጎ በበኻለኻ ነሾከ እምበቦቆ ጸጋኼኳ። 27ከመዪፆቆ ደ መገመኻ በሽለከሥ አረባ ኤተ በዪርካ ጸጋ አል ኤባ አል እኔያ ኤተሞ፤ ከመዪፆቆ መንዥግ ጸጋኳ በሽለከሥ አረባ ኤተ በዪርካ ኤበ እኔያ ኤመሌኤማ። 28በሽለከሥ ረባ ኤተ በዪርካ ጸጋ አል ኤበ እኔያ ከዱ ገናሠማ በ ከሣኳ። ከምቴሥ ኤተ በዪርካ ኤበ እኔያ ከበቦቆማ፥ በሽለከሥ ዳ ኤተ ቢከለካ "አኢካንኼኳ።" 29ካ መሾጎኼ ጸጋ ሜተል ኤለአ ነታሰ ረባኼ። 30ረባኳ በጦካ፥ ኤከምደኻን አኽ ከያሱስ ክርስቶስ ሜተም፥ በጦካ ኤከምዳን ክርስቶስ ከመገመኻሎኳ። ካሥ አ በከዪርካ አረባ አኳ ከመዪዥሠማ፥ በኮከዪዥካሥ ከአ። ኤተ ባንዠኪል አኳኳ፥ ኣሥ አ። 31ከለአ ከምዳ ኤያሥ ቢቆተካ ነመዪዥሥ ሎርጋ፥ "ኤተ ከማኣጓ መሾጓ፥ ነከሾጎ ከረባ።"

will be added

X\