1 KORINTUS 14

1Lolohe mao limongoli tolianga boyito wawu usahayi mao timongoli mo'otapu karuniya monto Roh lo Allahuta'ala lebe-lebe lomao karuniya mopotunggulo wahyu lonto Allahuta'ala. 2Ta hemobisala to delomo baha-bahasala deli, dila hemobisala wolo manusiya, bo hemobisala wolo Allahuta'ala. Diyaluwo ngota mao ta mongarati lo u hebisalaliyo, sababu wolo Roh lo Allahuta'ala tiyo hemopotunggulayi lo pasa-pasaliyala u rahasiya. 3Bo ta hemopotunggulo wahyu lonto Allahuta'ala, tiyo hemobisala ode manusiya. Loiyaliyo boyito hemomongu, hemonasehati wawu hemohiburu manusiya. 4Ta hemobisala to delomo baha-bahasala deli hemomongu batangaliyo lohihilawo; bo ta hemopotunggulo wahyu lonto Allahuta'ala, tiyo hemomongu jama'ati. 5Otohilau alihu timongoli nga'amila mowali mobisala to delomo baha-bahasala deli. Bo lebe mao leto wau motohilawo alihu timongoli mowali mopotunggulo wahyu lonto Allahuta'ala. Sababu ta hemopotunggulo wahyu boyito lebe ohunaliyo popobandingiyo mao wolo ta hemobisala to delomo baha-bahasala deli, ngopohiya wonu tawu boyito mowali momituwa mayi baha-bahasala boyito, sambe jama'ati mowali bonguloliyo. 6Mongowutata ngoimani, wonu wau monao mayi ode olimongoli wawu hemobisala to delomo baha-bahasala deli, diyaluwo mao hunaliyo olimongoli, ngopohiya wonu wau momituwa mayi ode olimongoli niyati lo Allahuta'ala, ilimu, wahyu wawu pongajari. 7Tutuwawuwa wolo pilakasi u dila o nyawaliyo, bo o tingohiyo odelo tulali wawu kecapi. Tawu dila mowali mongarati lahu wolo u hepomanyanyi lo tulali wawu kecapi boyito wonu dila mopatato lahuliyo. 8Wonu torompet dila mopatato tingohiyo, diyaluwo mao ta sadiya monao ode popateya. 9Odito olo wonu timongoli mobisala to delomo baha-bahasala deli. Wonu timongoli dila mopohuna mayi loloiya u mopatato, diyaluwo tawu ta mowali mongarati lo u heloiya limongoli. Loiya limongoli boyito dila ohunaliyo openu bo ngointi mao! 10To duniya boti ngohuntuwa tililahepa lo bahasa; openu boli odito, diyaluwo tuwawu mao u dila o pituwaliyo. 11Bo wonu wau dila motota lo pituwa lo bahasa boyito, wau mowali tawu deli tota hemopohuna lo bahasa boyito wawu tiyo mowali tawu deli olo to olau. 12Odito olo timongoli, timongoli memangi hepongusahawa mo'otapu karuniya monto Roh lo Allahuta'ala. Bo lebe mao leto timongoli musi mongusaha mopohuna lo nga'amila karuniya boyito momongu jama'ati. 13Uwitolo sababuliyo ta hemobisala to delomo bahasa deli, tiyo musi mohile ode Allahuta'ala alihu mo'otapu karuniya momituwa bahasa boyito. 14Wonu wau hemodua to delomo bahasa deli, roh ulau u hemodua wawu pikirangiu dila mongarati wolo-wolo. 15Wonu odito, utiye u ma pohutuwou: Wau ma modua wolo roh ulau, bo wau olo ma modua wolo pikirangiu. Wau ma momanyanyi wawu momuji Allahuta'ala wolo roh ulau, bo wau olo ma momanyanyi wawu momuji Allahuta'ala wolo pikirangiu. 16Wonu yio mosukuru wolo roh ulemu, tawu ta dipo motota wolo-wolo ta mo'odungohe olemu, dila molametayi amin to sukurumu boyito, sababu tiyo dila mongarati lo u hebisalamu boyito. 17Openu boli sukurumu boyito mayilaba piyohiyo, bo tawu boyito dila mowali mobongu imaniliyo. 18Wau mosukuru ode Allahuta'ala deu wau mowali mobisala to delomo bahasa deli lebe mao limongoli nga'amila. 19Bo to jama'ati wau lebe motohilawo molanggula loiya limo lotahe u ongaratiyanto mowali pongajari popobandingiyo mao wolo loiya helihu-lihuwa to delomo bahasa deli. 20Mongowutata ngoimani, timongoli dila hepomikirangi odelo ta kekeingo. Bo pomikirangi mola odelo ta dudulamango, ngopohiya to delomo pasali lo umohutu u moleto, timongoli musi mowali odelo ta ukekeingo. 21To kitabi woluwo tula-tuladu odiye, ”Moli tawu ta o bahasa deli wawu moli tunggilo tawu deli Wau ma mobisala ode umati boti. Openu odito, timongoliyo dila modungohe ola-U.” Odito Pirimani lo Allahuta'ala. 22Sababu uwito, bahasa deli yito tuwota ode ta dipo paracaya, dila ode ta ma paracaya. Wawu karuniya mopotunggulo wahyu lonto Allahuta'ala tuwota ode ta o imani, dila ode ta dila o imani. 23Sababu uwito, wonu nga'amila jama'ati heambuwa wawu timi'idu tawu hepobisalawa to delomo bahasa deli, lapatao lomaso mayi tawu-tawuwala ta dila motota wolo-wolo meyambo tawu-tawuwala ta dila o imani, timongoliyo ma moloiya deu timongoli boti hebiyonga. 24Bo wonu nga'amila ta hebisalawa hepopotunggula lo wahyu lonto Allahuta'ala, lapatao lomaso mayi ta dila motota wolo-wolo meyalo ta dila o imani, tiyo ma otuhata lo u ilodungoheliyo nga'amila wawu ma motoloela nga'amila dusaliyo. 25Totonulala rahasiya to delomo hilaliyo ma mowali mopatato oliyo, tunggulo tiyo ma mosujudu molubo Allahuta'ala wawu ma moloiya odiye, ”Otutu Allahuta'ala woluwo to wolota limongoli.” 26Wolo uodito mongowutata ngoimani, utiye patuju lo u hebisalau ode olimongoli: Wonu timongoli moibadati, woluwo ta momanyanyi, tawu wuwewo mongajari, woluwo ta mopotunggulo niyati lo Allahuta'ala. Wawu tawu wuwewo mobisala to delomo bahasa deli wawu tawu wuwewo poli momituwa mayi bahasa boyito. Bo unga'amila boyito musi popohunala momongu jama'ati. 27Wonu woluwo ta mobisala to delomo bahasa deli, mowali dulota meyalo pulito dataliyo towulota, mogagantiya wawu musi woluwo ta momituwa mayi bahasa boyito. 28Wonu diyaluwo ta mowali momituwa mayi bahasa boyito, ta hepobisalawa lo bahasa deli boyito musi motipo'oyo to ibadati boyito, bo mowali mobisala ode batangaliyo lohihilawo wawu ode Allahuta'ala. 29Ode olimongoliyo ta lo'otapu karuniya nabi, mowali dulota meyalo towulota ta mopotunggulo wahyu lonto Allahuta'ala wawu tawu wuwewo motimbangi u hebisalaliyo mayi boyito. 30Bo wonu woluwo ta lololimo potunu lonto Allahuta'ala to wolota lo ta woluwo teto, ta hemopotunggulo wahyu boyito musi moberentipo. 31Memangi ngota-ngota timongoli nga'amila mowali mopotunggulo wahyu lonto Allahuta'ala, alihu nga'amila mowali mobalajari wawu mo'otapu nasehati. 32Nabi mowali mongaturu rohliyo tou mopotunggulo wahyu lonto Allahuta'ala. 33Sababu Allahuta'ala dila motohilawo lo u ambulati, bo u a'aturu. Odelo u woluwo to nga'amila jama'ati lo tawu-tawuwala ta tilulawoto Allahuta'ala, 34to delomo timi'idu ibadati mongobuwa musi motipo'oyo. Timongoliyo dila mowali mobisala wawu musi mota'aluku odelo u ma tula-tulade to delomo kitabi lo Tawurat. 35Wonu woluwo u ohila pobalajari limongoliyo, timongoliyo mowali mohintu to hiyali mongoliyo lohihilawo to bele, sababu dila o adabu mongobuwa mobisala to delomo ibadati. 36Pirimani lo Allahuta'ala lotuhutayi dila loli olimongoli wawu dila pilopotungguliyo bo ode olimongoli wambao. 37Wonu woluwo tawu ngota ta hemonganggapu batangaliyo lo'otapu karuniya mopotunggulo wahyu lonto Allahuta'ala meyambo karuniya rohani wuwewo mao, musi otawaliyo deu nga'amila u tiluladu'u mayi ode olimongoli boti parenta lo Eyanto. 38Bo wonu woluwo ta dila satuju lo unga'amila boti, lipata lomao tiyo. 39Wolo uodito mongowutatu'u, usahayi mao timongoli mo'otapu karuniya mopotunggulo wahyu lonto Allahuta'ala wawu dila mao enteli limongoli ta mobisala to delomo baha-bahasala deli. 40Bo pohutuwa mao limongoli unga'amila boti wolo adabu wawu a'aturu.

will be added

X\