WALUMI 9

1Nghulonga mbeka, nakondya kwilunza na Kilisito, nane si nghulonga wulambi. Iciselinji lono cikutongwa no Muhe Mono Yelile, cikunghangaziza inghani yiyi nhavivyo. 2Nghusaka kutya nhavi. Ninga wukalale wuwaha, no wusungu si wakulonga, mu nhumbula yangu, ku soko ye wanhu wangu, wono cili sakami monga na nene! 3Hono yali yiwe so cambuzi cawo, nali nyende niwe mulijitwe, no kusiwanulwa na Kilisito. 4Wawo wo wanhu wa Isilayeli, wono u Mulungu yawasiwanula wawe wanagwe, nayo yakawapela no lukumyo lwakwe, vikalagana nawo, yakawapela lilajilizo lyakwe, wihuwilo we mbeka no wihuwizo wakwe. 5Wene wo wezukulu we wakoko, nayo Kilisito ku lubavu lo wunhu wakwe, yalawilila mu mbeyu yawo. U Mulungu mono yatemile muli vyose, yalumbwe cibitilila, Heya. 6Ninga si vyono nghutya, uwihuwizo wo Mulungu wuwelile, hambi nha si wanhu wose wa mu Waisilayeli, wono wo wahagulwa wo Mulungu. 7Hamba si wose we mbeyu ya Abulahamu, wanagwe we mbeka. Langa nha vyono gakulonga i Mandiko Gono Gelile. “Muli Isaka mo yolocemelwa imbeyu yako.” 8Wo wutya, si wana wo muwili wo wana wo Mulungu aa, langa wawalya du, wono waleleywe mu cilagane co Mulungu, wo wocemwa wanagwe. 9Hambi icilagane ceneco nha coci. “Nolokuziza kwinha nhavivi, nayo Sala kolosawa mwana wa cilume.” 10Ninga si yiyo du, langa na Labeka nayo, yatuga wana we metundu kuli sogo yawo yumonga, yo Isaka u Sogo yetu. 11Ninga ho Mulungu yejele vyono yena welecele wo kuhagula, na lono wawalya iwana we metundu wakali si nalelwa, na lono wakali si namanya kuhagula iziswanu ne zimbi. 12Labeka yalonjelwa vyono, u mwana mulongozi komwitumamila ayulya mono kotyatya mu nyuma. Holeka u wuhaguzi wo Mulungu, wuwezaga nha vyono yakuhila mweneco, hamba si metumo ga munhu. 13Nha vyono gakulonga i Mandiko Gono Gelile, “Namwenda Yakobo, ninga Esawu namusula.” 14Hambi cilonje ya hayi? Alu u Mulungu yasina iling'ani? Aa ng'o! 15Hambi nha yamulonjela Musa, “Nomuwonela lusungu munhu wo wose mono nghusaka kumuwonela lusungu, kanyhi nomunenela munhu wo wose mono nghusaka kumunenela.” 16Holeka zose zili mu lusungu lo Mulungu du, hamba si zili mu wuhidimbale wo munhu, hamba si zili mu wuhile wo munhu. 17Hambi i Mandiko Gono Gelile nha gakulonga nhavi kuli Falawo, “Nakunoza wuwe mutemi, ho vilungo vyangu vimanyicile muli gwegwe, ne litagwa lyangu limanyice kononze kose.” 18Holeka yili calinze, vyono u Mulungu kamuwonelaga lusungu munhu wo wose mono mweneco du yakusaka kumuwonela lusungu, na hono mweneco yasace kumunoza munhu yawe yali cibede, kanozaga nhavivyo. 19Lunji kombuza wutye, “Alu hono zili nhavivyo, u Mulungu kosuma nhawule kumuhosa munhu? Alu nani 'mbi mono kosuma kuwimila u wuhile wakwe?” 20Alu agwe go munhu, wuli nani gwegwe ho wijelele kumupitula u Mulungu? Wule, nyungu nayo ma, yosuma kumuwuza cinji mono yayiwumba yikutya, “Nhawule wukamumba nhavivi?” 21U muwumbi kalitumamilaga ililongo nha vyono yakusaka mweneco, yadahile kuwumba nyungu nyejete mwi'bilingwa limonga, yimonga so witumilwe we lilumbo, ne nyagwe nayo so witumilwe wono si we lilumbo. 22Nhavivyo vyo yinha kuli Mulungu. Yakasaka yalilajile ilikuwo lyakwe, no kuvimanyiza ivilungo vyakwe. Ninga yakawa mukangalizi muno, yakuwakangalila walya wono wali yo soko ye likuwo lyakwe, wono wali wanojeye wongomezwe. 23Yakasaka kanyhi kuwulajila u winji wo lukumyo lwakwe, lono yacijidila ase mono cali yo soko yo lusungu lwakwe, ase mono yali yakondya kuciwikaniza ho cilubocele u lukumyo lwakwe. 24Vyono ase yo sese mono cacemwa nayo, si vyono kulawa muli Wayahudi du, langa sunga ku wulawa mu wono si Wayahudi yaye. 25Hambi nha vyo yakulonga mu citabu ca Hoseya: “Nolowacema, ‘wanhu wangu,’ Wono si wali wanhu wangu. Nayo ‘Mwendece,’ mono si yali mwendece! 26Na hono hatezagwa ‘Si muli wanhu wangu!’ Baho wocemwa I Wana wo Mulungu mumi!” 27Nayo u muwizi Isaya, yakumulonjela Isilayeli yazozize, yakutya, “Iliwalo lye wanhu wa Isilayeli, hamba liwe kotya musawawa wa mwi'lenga, ninga wacefu du wono woloponywa, 28hambi u Muwaha nha si koleka kuyileta mbela i ning'aniza yakwe yono yikwilaniciye kuli yinze yose.” 29Nha vyono Isaya yalonga ha mwamulizo, “Hono u Muwaha mono yali vilungo, yali yalece kucisigaziza wanji wa muli wanhu wa Isilayeli, mhali cakondya kuwa nha Sodoma, mhali cawa kotya Gomola.” 30Hambi colongaci kanyhi? Yili nhavi: iwanhu wono si Wayahudi wono si wepiganza kuwulondola u wuvumilwe hali Mulungu, wanozwa wavumilwe hali Mulungu mu nzila yo wihuwilo. 31Ninga i wanhu wa Isilayeli wono walondolaga u wulajilize, wono wuletaga u wuvumilwe hali Mulungu, si wawutuga. 32Ku soko ya hayi? Ku soko i wene wali wetumbiye metumo gawo, siwetumbila u wihuwilo. Wakekobala mu libwe lyo wikobale, 33nha vyono gakutya i Mandiko Gono Gelile: “Langa ta, nghuwika mu Sayuni, libwe lyo wikobale, Ne litalawe lyono lyowagwisa! No munhu mono komwihuwila yuyo mono lyo libwe lilyo, yuyo si kolokozwa soni.”

will be added

X\