WALUMI 7

1Wandugu zangu, nitumbiye vyono muzimanyile zizi, hambi nha nghulonga na wanhu wono wawumanyile wulajilize. Vyono u Wulajilize, wumutemile u munhu, mu vilo vyakwe vyose vyono yakali mumi. 2Nha cinji, u mucekulu mutolwa, nha yawopigwe mu wulajilize no mulume wakwe, mu vilo vyose vyono u mulume wakwe yakali mumi, ninga u mulume wakwe hono yafwe, hodu u wulajilize wa kuli mulume wakwe si womutema kanyhi u mucekulu yuyo. 3Langa umucekulu yuyo hono wekalane no mulume yunji lono umulume wakwe yakali mumi, kocemwa musenyha, ninga hono umulume wakwe yawe yakondya kufwa, umucekulu yuyo si kowa yatemigwe kanyhi no wulajilize, na hono yatolwe no mulume yunji, hamba si kocemwa musenyha yaye. 4Ale nanye wandugu zangu, ku lubavu lo Wulajilize, nanye nhavivyo mwakondya kufwa, vyono anye muli vilunzwa vyo muwili wa Kilisito, alu mwaweza muli wakwe, u mwene mono yazukulwa muli wafu, ho cisume kwikala imikalile yono yina cambuzi mu wu mwitumamila u Mulungu. 5Hambi lono cekalaga mu mikalile ye cimunhu-munhu, uwusulumizi wubi wono wazizaga mu Wulajilize, nha wetuma mulimo mu miwili yetu sunga ko ku wulelela lifwa mikalo. 6Ninga aluno cili welecele, si ciwopigwe kanyhi no Wulajilize, vyono cakondya kufwa kuli lubavu lwe nghani yiyilya yono yikacinoza ase ho ciwe wawanda. Alu cikwitumila imikalile mipya yo Muhe, hamba si mu wuhuma wo Wulajilize wono wali wandicigwe. 7Wulenyi, cosuma kutya Wulajilize, wubi? Ng'o si wubi yaye! Ninga hali hawe hasina Wulajilize, ane si nali niwumanye wubi vyono co cici. Hamba si nali manye u wusulumizi wubi co cici, hono Wulajilize wali wuwe si wuteye, “Wulece kusulumila.” 8Ninga naza kulihulika ililajilizo lilyo, baho uwubi ho wukatujila icilejeho co kwitumila imawala gose go wusulumizi muli'ne. Hambi hono hasina Wulajilize, u wubi wukuwa co cinhu cono cifwiye, 9nane ha mwamulizo, nekalaga mumi hono hasina Wulajilize, ninga ililajilizo lyali lyeza kuza, uwubi wukawumipa, 10ane no mweneco nghafwa. U mulimo we lilajilizo wali kuleta wumi, ninga kuli ane likaleta wufwe. 11Hambi wubi nha wukacituga icilejeho cono caziza mwilajilizo lilyo, wukanghonga no kumbulaga. 12Holeka Wulajilize weneco welile, sunga ne lilajilizo lyeneco nalyo lyelile, kanyhi lili ling'ani, kanyhi, yiswanu. 13Alu wo wutya, cico iciswanu, hongo lyawa yifwa kuli'ne? Aa, ng'o, langa yili nhavi, uwubi ho wijele calinze vyono wubi, wuketumamila acilya iciswanu ho liwe lyo yifwa lyangu. Ninga uwubi wukelajila vyono wubi muno, mu nzila ya lilyo ililajilizo. 14Cimanyile vyono, Wulajilize wo we cinya muhe, ninga ane nili wa mu muwili, muguzwa mu wuwanda wo wubi. 15Hamba si niyimanyaga yono nghwituma, ku soko yono nghuyisaka niyitume, yo si nghwituma, langa cicilya cono nicisulile, co nitumaga. 16Alu, hono niwe nghwituma zono si nghuzisaka, wo wutya, nghulumba vyono u Wulajilize kumbe wuswanu. 17Alu kumbe si nene mono nghwituma nhavivyo, langa wo wubi wono wikalaga muli nene. 18Manyile vyono mugati yangu, musina yinji yo yose swanu, hambi ane nha nili munhu du. Ku soko vyono, hamba niwe nghusaka kunoza nghani swanu, si nosuma kwituma. 19Ku soko vyono hono, nghusaka kwituma yiswanu yono nghuyisaka, hobaho nghuyituma yimbi yono si nghuyisaka. 20Holeka kumbe vyono nghwituma zono zisimajiye na vyono nghusaka, wo wutya yo si nene mono nghwituma zizo, langa wo wuwo wubi wono wuli muli nene. 21Holeka nakondya kumanya vyono zinha, vyono ane nghusaka kwituma swanu, ninga kumbe yiyilya yimbi yono si nghuyisaka, yo nghwituma. 22Holeka ane mu nhumbula yangu, nghulisangalila ililajilizo lyo Mulungu. 23Ninga nghuwona, vyono ko wuli wulajilize wunji mu vilunzwa vyangu, wono vikulewana no wulajilize wa mu mahala gangu, wuwo wukunoza niwe muwanda wo wulajilize wo wubi, wono wukwituma mulimo mu vilunzwa vyangu. 24Waco no muciwa nene! Alu mono komhonya mu muwili wuwu wono wukunhegula kwifwa, nani mbi? 25Ninga, u Mulungu yalumbwe, mono yakusumila, muli Yesu Kilisito Mutwa wetu. Ale nhavivyo vyo ninha, vyono nene no mweneco mu mahala gangu, nghuwitumamila u Wulajilize wo Mulungu, ninga mu muwili, nghuwitumamila u wulajilize wo wubi.

will be added

X\