WALUMI 6

1Alu citye nhawule? Cijendelele ne mikalile yo wubi, ho lihewa lyo Mulungu lyonjezece? 2Aa, ng'o! Ase cakondya kufwa kuli zo wubi, alu ho cojendelela kanyhi nhawule kwikala mu mikalile yo wubi? 3Hambi nha mumanyile, vyono ase wose mono cabaputizwa, no kulunzwa na Kilisito Yesu, cabaputizwa no kwilunza ne lifwa lyakwe. 4Holeka calunzwa ne lifwa lyakwe, lono cabaputizizwa, cikazikanwa nayo, nha vyono Kilisito yazukulwa muli wafu ko lukumyo lo Sogo yo munhu, ale nhavivyo nase, ceze kujendela mu mikalile mipya. 5Hambi nase hono ciwe cilunzize nayo mwifwa nho mweneco, cokwilunza nayo nhavivyo mu wuzukulwe mu wafu nho mweneco. 6Cimanyile vyono, u munhu wetu muhuma, vyatumbikanwa hamonga na Kilisito, u muwili wo wubi ho wuhodangwe, ho cilece kuwa kanyhi wawanda wo wubi. 7Hambi u munhu mono yafwiye, nha yakondya kuwuswa mu vilungo vyo wubi. 8Holeka hono ciwe cakondya kufwa hamonga na Kilisito, cihuwiye vyono cowumipana nayo kanyhi. 9Hambi nha cimanyile vyono Kilisito yakondya kuzukulwa muli wafu, hamba si kolofwa kanyhi, ilifwa lisina vilungo kanyhi kuli mwene. 10Hambi vyono yafwa, kamonga du, u wubi wusina vilungo kanyhi kuli mwene, nalu yakuwumipa hamonga no Mulungu. 11Holeka nanye nhavivyo, mwiwonaje nha vyono mufwiye kuli zo wubi, langa nha wono mukuwumipa hamonga no Mulungu, muli Yesu Kilisito. 12Ale u wubi wulece kutema kanyhi mu miwili yenyu yono yifwizaga, muwe kuhulika imasulumizi gayo kanyhi. 13Hamba mulece kuvilavya ivilunzwa vyenyu hamba cimonga, ho ciwe ciya co kwitumamilwa no wubi. Langa nyenye weneco mwiyilavyaje kuli Mulungu, muwe nha wanhu wono muzukuywe mu wafu, mumulavizyaje u Mulungu imitima yenyu yose, ku so wiling'ano. 14Hambi uwubi nha si womutemenyi kanyhi, ku soko vyono si muli mu Wulajilize, langa muli mwi'hewa. 15Alu cilonje citye wule? Citumaje wubi hongo, vyono si cili mu Wulajilize, langa mwi'hewa? Aa, ng'o. 16Mumanyile vyono, hono mwiyilavye nyo weneco kuli yunji, no kuwa wawanda wakwe, na mbeka mukuwa wawanda wa yuyo, hono muwe wawanda wo wubi, ndumilizo yayo wufwe, na hono wuwe wawanda we cihuliko, ndumilizo yayo, mukunozwa ho muvumilwe hali Mulungu. 17Ninga, hamba yiwe mwali muli wawanda wo wubi baho katali, ninga alu, nghumulumba u Mulungu vyono, mwahulika no kwibata zose zono mwejizwa no kuzibocela. 18Mwawopolelwa kulawa mu vilungo vyo wubi, mukawa wawanda wo wiling'ano. 19Ahano nghulonga imilonjele ye wanhu, so wusocele wenyu nyenye weneco. Ninga nha vyono lululya, mweyilavya nyenye weneco ho muwitumamile wavu no wuhodanji wo wavu, ale, alu kanyhi vyo mwiyilavyaje nhavivyo nyo weneco, muwitumamile uwiling'ano, ku so wele. 20Hambi lono mwali mukali muli wawanda wo wubi, mwewonaga nha vyono si munojeye kuwa muli we ling'ani. 21Alu mwatuga cambuzi mu cici, kuli zizo zono mukuziwonela cevu alu? Ku soko mudumilizo wa zizo, nha yifwa. 22Ninga alu mwakondya kuwopolelwa ku wulawa mu vilungo vyo wubi, alu mwaweza wetumami wo Mulungu, ne cambuzi cono mwina naco alu, wo wele, no mudumo wayo, wo wumi we cibitilila. 23Hambi u musahala wo wubi nha yifwa, langa icipegwa cono yakulavyo Mulungu, wo wumi we cibitilila mu wilunza na Yesu Kilisito u Mutwa wetu.

will be added

X\