WALUMI 4

1Alu colonga cici kuli za Abulahamu u sogo yetu? 2Hono yiwe Abulahamu yanozwa ling'ani so metumo gakwe, yena zo kwilumbila. Ninga si kosuma kwilumba kuli Mulungu. 3Hambi i Mandiko Gono Gelile gakutya wule? “Abulahamu yamwihuwila Mulungu, Nayo Mulungu yakamuvumila kuwa we ling'ani.” 4Mono yakwituma, kalipwaga musahala, no musahala wuwo si cipegwa, langa yo ling'ani yakwe. 5Ninga kuli munhu mono si yakwitumbila imetumo gakwe mweneco, langa yamwihuwiye u Mulungu mono kawanenelaga iwabi, u Mulungu nayo kawulumbilizaga u wihuwilo wo munhu yuyo, no kumunoza yavumilwe hali mwene. 6Na kuli ze nyemo yo munhu yuyo, mono u Mulungu yakumunoza ho yavumilwe nayo, hamba kulanga ze metumo gakwe, Dawudi yakutya, 7“Wamoti wono waneneywe masutya gawo no wubi wawo wufunicizwe. 8Yo mumoti munhu mono u Muwaha si yakuwukumbucila u wubi wakwe.” 9Alu wumoti wuwu wuli muli wono walame du, hamba sunga na muli wono si walame? Ninga wuli sunga na kuli wono si walame nhavivilya. Hambi nha cikutya, “Abulahamu yehuwila, nayo u Mulungu yakamuvumila no kumutya yali ling'ani.” 10Alu Abulahamu yavumilwa lono yali yakali si nalama, hamba lono yali yakondya kwalama? Yavumilwa lono yali yakali si nalama, hamba si lono yali yakondya kwalama ng'o. 11Abulahamu yalama hanyuma yayo, na mu walame wuwo, cali citanjilo cono cakangazaga vyono, u Mulungu yali yamuvumila vyono yali ling'ani, ku soko yo wihuwilo wakwe wono yali yena nawo, sunga na lono yali yakali si nalama. Holeka Abulahamu yaweza sogo wa wose wono, hamba wawe si walame, ninga wamwihuwiye u Mulungu no kunozwa ling'ani. 12Nhavivyo kanyhi u mwene, yo sogo wa wose wono walame, ninga si vyono walame du, langa vyono wakuyityatya inzila yiyilya yo wihuwilo, yono no Sogo yetu Abulahamu yayityatya lono yali yakali si nalama. 13U Mulungu yamwihuwiza Abulahamu ne zindelo zakwe, vyono yo kolowa muhala yinze. No wihuwizo wuwo, si wanozwa vyono Abulahamu yawitumaga u Wulajilize, ng'o, langa vyono yehuwila, yakavumilwa kuwa ling'ani. 14Hambi hono yiwe wono wopegwa u wihuwizo wo Mulungu wo wawo du wono wakuwituma u Wulajilize, alu haco u wihuwilo waweza wusina cambuzi co cose, hamba no wihuwizo wo Mulungu, waweza si cinji kanyhi. 15Hambi u Wulajilize nha wukozaga yikuwo, ninga hono hawe hasina u Wulajilize, hasina kanyhi hamba wusutye. 16Ku soko yiyo holeka, inghani yiyi yili mu wihuwilo, na holeka no wihuwizo wuwo wuli so wanhu wose, si kuli walya du wono wakuwituma Wulajilize, langa wuli na kuli walya wono wakuwumipa so wihuwilo nha vyono Abulahamu. U mwene yo sogo yetu sese wose. 17Nha vyono Mandiko Gono Gelile gakulonga, “Nghuwika ho wuwe sogwe we zinghungugo nyinji.” No wihuwizo wuwo wo we mbeka hali Mulungu mono Abulahamu yamwihuwila. U Mulungu mono yakuwawumifya i wafu, na kanyhi kavitambulaga i vinhu vyono vili hasina, navyo vikuwa. 18Ninga Abulahamu yehuwila kanyhi yaketumbila, kuli zono zali nghamu ku witumbile, nayo holeka yakawa sogwe we makungugo menji, nha vyono gakutya i Mandiko Gono Gelile, “U lulelo lwako, wowa wenji kotya zinyelezi.” 19Yali mukombi mono yali yaficile kotya nha myaka yigana limonga, ninga u wihuwilo wakwe hamba si wacepuka, hamba yawe yali yamanyile vyono, u muwili wakwe wali kotya nha wufwiye, no mugolece wakwe Sala nayo yali mugumba. 20Ninga Abulahamu yali yasina wukangamyanje ku so wihuwizo wo Mulungu, yakatuga vilungo ku soko yo wihuwilo, nayo yakamukumya u Mulungu. 21Yali yamanyiye lukulu vyono, u Mulungu kosuma kuzifisiliza zono yehuwiza. 22Holeka nayo Mulungu yakamuvumila vyono yali ling'ani. 23Na lono yikulongwa vyono “Yamuvumila,” si yikulongwa kuli mweneco du. 24Ne nghani yiyi yili na kuli sese nhavivyo mono camwihuwila u Mulungu mono yamuzukula Yesu, u Mutwa wetu, muli wafu. 25U mwene yalavywa ho yawulagwe ku soko yo wubi wetu, kanyhi yakazukulwa, ase ho cisume kuvumilwa hali Mulungu.

will be added

X\