WALUMI 3

1Hambi Muyahudi yawacizize cici iwanhu wanji wono si Wayahudi? Hamba kwalama kwina cambuzici? 2Heya, kocili cambuzi mbavu zose, inongozi, u Mulungu yawakoza i Wayahudi inghani yakwe. 3Ninga ho yowa wule hono wanji wayawo si wali wehuwilwa? Hambi inghani yiyo yowuwusa u wihuwilwa wo Mulungu? 4Aa, ng'o! Hambi u Mulungu nha kekalaga mwihuwilwa cibitilila, hamba yiwe iwanhu wose walambi. Nha vyono gakulonga i Mandiko Gono Gelile, “Gwe go Mulungu, ho hose hono wukulonga, Zinghani zako zo ze ling'ani, Na mu ning'aniza, agwe wukuwa kusuma.” 5Ninga hono u wubi wetu wuwe wukuhomelela, vyono u Mulungu ketumaga kwe ling'ani, alu colonga cici kanyhi? Hambi cosuma kutya yasina ling'ani lono yakucifunda? (Aha nghulonga cimunhu-munhu.) 6Hamba hadodo! Yali yiwe yili nhavivyo, u Mulungu yali yasume nhawule kuyiling'aniza yinze? 7Na lunji kotya, “Hono u wula wihuwilwa ku lubavu lwangu, wo wukumulajila u Mulungu vyono yo mwihuwilwa muno, no kumupela lukumyo, holeka si nali nojeye ning'anizwe nha nili muhodanji.” 8Yili sawa na vyono watezaga, “Citume vibi ho cituje i ziswanu!” Nhavivyo vyo wanji wakucivila, no kucisonjeza, wakutya ati vyo cikwijiza. Ninga walekaje! Woling'anizwa vyono yiwanojeye! 9Alu colonga cici kanyhi? Hambi ase co Wayahudi cili waswanu si nha wono si Wayahudi? Hamba hadodo! Hambi nha nakondya kulonga ku wulawa ha mwamulizo vyono, i Wayahudi ne wanhu wono si Wayahudi, wose wali mu wubi. 10Nha vyono gakulonga i Mandiko Gono Gelile. “Hasina we ling'ani hamba monga. 11Hasina munhu mono yakwizuka, hamba mono yakumulondola u Mulungu. 12Wose wapatuka, wose wena vilema, hasina mono yakwituma ziswanu, hasina hamba monga. 13Imimelo yawo yinha icitenjelo cono cili mwazi, ne zinimi zawo zimemile wukonji, na mu milomo yawo, mukulawa zinghani zono zina sumu kotya ya nzoka. 14Mu milomo yawo mumemile malijito makali. 15Imigulu yawo yili mu lumangho kuwita sakami, 16na ho hose hono wobita, waletaga wuhodanji no wugaye. 17Ne nzila yo mulamu, si wayimanyile, 18hamba ne nghani yo kumogopa u Mulungu, yili musina muli wene.” 19Cimanyile vyono, u Wulajilize wuli baho ku soko ya wono wali hasi yo Wulajilize wuwo, ho walece kuwa na cikojelo co cose. Ne yinze yose yili hasi yo wuling'anizwe wo Mulungu. 20Hambi nha hasina munhu wo wose, mono kosuma kuvumilwa hali Mulungu so wibato 'lajilize, ku soko u mulimo wo Wulajilize, wene wukuwa kumulajila du munhu vyono yetumile wubi. 21Ninga alu, inzila yo Mulungu yo kuwanoza iwanhu ho wavumilwe hali mwene, yakondya kwanzalikwa calinze, yo nzila yono si yikwitumbila u Wulajilize. Uwulajilize ne wawizi, vyose vikuyihomelela inghani yiyi. 22U Mulungu yakuwanoza iwanhu, ho wavumilwe hali mwene mu nzila yo wihuwilo wawo, muli Yesu Kilisito: Nayo u Mulungu, ketumaga nhavivyo kuli wose wono wakwihuwila, hamba hasina wusiwanule wo wose. 23Iwanhu wose wetumile wubi no kucepucilwa no lukumyo lo Mulungu. 24Ninga so lihewa lyo Mulungu du, iwanhu wose wakunozwa wali ling'ani, no kuvumilwa hali mwene mu nzila ya Yesu Kilisito mono yawakomboza. 25U Mulungu yamulavya mwene, ku so sakami yakwe, yawe nzila yo kuwawusiza iwanhu u wubi wawo, so wihuwilo wawo wa kuli mwene. Yanoza nhavivyo, ho yelajile vyono u Mwene yo we ling'ani. Baho ikatali u Mulungu yakangalilaga hamba si yehwesaga zo wubi we wanhu, 26ninga alu, mwidaha lili yakwihoma no wubi we wanhu, ho yasume kulajila ze ling'ani yakwe. Na ku soko yiyo u Mulungu mweneco yakuwa kulajila vyono u mwene yo we ling'ani, na vyono yakumunoza munhu wo wose mono yamwihuwiye Yesu, ho yasume kuvumilwa nayo. 27Hambi cosuma kwilumbila ya hayi? Hasina! Ku soko ya hayi? Hamba vyono cikuwufisiliza u wulajilize? Aa, ng'o, langa ku soko vyono cihuwiye. 28Hambi u munhu nha kanozwaga yavumilwe hali Mulungu so wihuwilo, du, hamba si so kufisiliza u wuhile wo wulajilize. 29Alu ma, u Mulungu yo Mulungu we Wayahudi du, hamba wa wanhu wose, sunga na wono si Wayahudi nhavivyo? Na katuti yo we wanhu wose, sunga na wono si Wayahudi nhavivyo. 30Mulungu yo yumonga, nayo kowanoza i Wayahudi wavumilwe hali mwene so wihuwilo wawo, ne wanhu wono si Wayahudi nawo, so wihuwilo wawo. 31Alu cikuwitumamila u Wihuwilo ho ciwuwembule u Wulajilize? Aa, ng'o, langa cikuwukamya u Wulajilize.

will be added

X\