WALUMI 2

1Holeka go munhu, wusina cikojelo, mono wukuwaling'aniza iwayago, hamba wuwe vyono winha. Hambi hono wukuwaling'aniza i wanji, nha wukwilijita go mweneco, ku soko vyono na gwegwe go mweneco, nha wukwituma zizo zono wukuwaling'aniza iwayago. 2Nase cimanyile vyono, i ning'aniza yo Mulungu yo ye mbeka mbeka kuli wono wakwituma makani ge nhavivyo. 3Holeka agwe go muyangu mono wukuwalin'aniza wono wakwituma imakani gaga, akuno kanyhi na gwegwe go mweneco go wukwituma, wukwihwesa lu kolokwilega ku ning'aniza yo Mulungu? 4Hamba lunji wukuwubedegala u wuswanu wakwe, ne ngola yakwe, no wukangalile wakwe, hamba si wukumanya vyono u wuswanu wuwo wo Mulungu, wukukutonga ho wusume kunena? 5Ninga so wukamu ne cibede ca mu nhumbula yako, wukwiwicila go mweneco ilikuwo, kwi'zuwa alilya lyono ilikuwo lyo Mulungu lyono lina i ning'aniza ye ling'ani lyologubulwa. 6Mwi'zuwa lilyo, u Mulungu, kolomulipa munhu wo wose nha vyono genha imetumo gakwe. 7Awalya wono wakulondola u lukumyo ne lilumbo vyo Mulungu no wusangalale, no kuwulondola uwumi, wawo wotuga u wumi we cibitilila. 8Ninga awalya wanji wono wakulema izinghani ze mbeka, langa wakutyatya izimbi, u Mulungu kolowamwajila ilikuwo no wukali wakwe. 9U munhu wo wose mono yakwituma izimbi, kotuga magazo no wusungu. Lulongozi gowatuga Wayahudi, hanyuma sunga ne wanhu wono si Wayahudi nhavivilya. 10Ninga u Mulungu kowapela u lukumyo ne lilumbo no mulamu, awalya wono wakwituma iziswanu, lulongozi Wayahudi, hanyuma sunga ne wanhu wono wi Wayahudi nhavivilya. 11Hambi u Mulungu nha yasina wusiwanule kuli munhu wo wose. 12Hambi wose wono wakwituma wubi akuno si wawumanyile u Wulajilize wa Musa, nha wolokwajilila du, hamba wawe si wawumanyile u Wulajilize. Nawo wono wakwituma wubi kuno ho wawumanyile no Wulajilize, nawo wololing'anizwa mu Wulajilize. 13U munhu, si kosuma kuvumilwa hali Mulungu, so kuwuhulika bwete du Wulajilize, langa mono yakuwituma Wulajilize. 14Nha cinji, iwanhu wono si Wayahudi, wasina u Wulajilize wa Musa, ninga lono wakwituma zono zili mu Wulajilize, nha vyono wakutongwa ne viselinji vyawo, ale weneco waweza cipimo co Wulajilize, hamba wawe si wawumanyile u Wulajilize. 15Imijendele yawo weneco, yikulajila vyono u mulimo wo Wulajilize, wandicigwe mu zinhumbula zawo. Ne viselinji vyawo, vikuyihomelela inghani yiyi nhavivyo, vyono hanji imahweso gawo gakuwahosa, na hanji gakuwatetela. 16Holeka nha vyono lwinha u Luganuzi lulu Luswanu lono nghumuganulilenyi, nhavivyo vyo lyolowa ilizuwa lyono u Mulungu koloziling'aniza zose ze cinyele ze wanhu, muli Yesu Kilisito. 17Alu nagwe ma, Agwe go mweneco wukwiyitya wuli Muyahudi, kanyhi wuwitumbiye u Wulajilize, no kwiwona nha vyono agwe wuli wo Mulungu, 18na mu Wulajilize mo wukumanyila u wuhile wo Mulungu, nagwe kosuma kuhagula iziswanu, 19kanyhi wukwiwona nha wuli mutonji we wabofu, no wuzelu kuli wono wali mu citi, 20wukwiwona nha wuli mulanjilizi we walele, na mwijizi wa walya wono wakali si nakangala. Na mu Wulajilize, wina wumanye wose we mejizo ne mbeka. 21Alu agwe wukuwejiza wanji, nha wule alu si wukwiyijiza nagwe go mweneco? Wukuwaganulila wanji walece kuhiza, ninga kumbe gwegwe go mweneco wukuhiza. 22Wukulonga wukutya, “Mulece kusenyha.” Na akuno gwegwe go mweneco wukusenyha, si wuvyendile vihwani vye milungu, ninga go mweneco wukwiwikaniza kuhiza mu zinyumba ze milungu. 23Akuno wukwiyitya ati wina u Wulajilize wo Mulungu. Alu si wukuwona vyono, so wubena lilajilizo, wukumubedegala u Mulungu? 24Nha vyono i Mandiko Gono Gelile gakulonga, “I wanhu wono si Wayahudi wakulitovula ilitagwa lyo Mulungu ku soko yenyu nyenye mo Wayahudi!” 25Ninga u walame wako wowa wina cambuzi, hono uwitume u Wulajilize. Ninga hono wukuwubena u Wulajilize, yali yiwe yili ciba, hono wali wikale si walame. 26Hono munhu mono si Muyahudi mono si yalame, hono yetume u wuhile wo Wulajilize, imbeka kowa nha mono yalame. 27Iwanhu wono si Wayahudi, wokuling'aniza agwe go Muyahudi kotya nha wuli mubena Wulajilize, hamba wuwe wina imandiko go Wulajize, na kanyhi walame, na kumbe wene ho wakwituma zo Wulajilize, hamba wawe si walame yaye. 28Nha cinji wo wutya, si vyono Muyahudi wo wose, yaweza Muyahudi wa mbeka, hambi munhu nha si kawezaga Muyahudi wa mbeka, ati ku soko vyono yalame mu muwili. 29U Muyahudi wa mbeka, yo yulya u Muyahudi wa mugati, yuyulya mono yalame mu nhumbula. Ne nghani yiyi, yo nghani ya Muhe, hamba si nghani ya mandiko go Wulajilize. No munhu we liwala lilyo, yakutuga lilumbo, si muli wanhu, langa muli Mulungu.

will be added

X\