1 Mosuma kumubocela kuli nyenye, u munhu mono yasoceye mu wihuwilo, ninga mulece kuwangana nayo kuli ze mahweso gakwe. 2 Hambi i wanhu nha wasutaniye, vyono yunji u wihuwilo wakwe, wakumukombola kulya cinhu co cose, ninga yunji mono yena u wihuwilo wono wusoceye, u mwene kalizaga mboga ze mahamha du. 3 No munhu mono kalizaga vyose, yalece kumubedegala ayulya mono si kalizaga vyose, nayo mono kalizaga mboga ye mahamha du, yalece kumuling'aniza ayulya mono kalizaga vyose, hambi u Mulungu nha yakondizye kumuvumila. 4 Hambi alu agwe wuli nani, mono kumuling'aniza u mwitumami wa yunji? Na hono yeme hamba hono yagwe, yo nghani yo Mutwawe, heya, kokwimywa no kusikamywa, hambi u Muwaha nha yadahile kumwimya. 5 U munhu yadahile kwihwesa vyono lizuwa linji lina nhunizo si nha lizuwa linji, munhu yunji kosuma kwihwesa vyono ivilo vyose viling'aniye. Ninga u munhu wo wose yatyatye nha vyono yakuwona mweneco mu mahala gakwe. 6 Mono yakulikumbucila lizuwa, yakulikumbucila ku soko yo kumukumya u Muwaha, nayo mono yakulya ndigwa yo wutunga, yakunoza nhavivyo so kumukumya u Muwaha, hambi nha yakumulumba u Mulungu. Nhavivyo mono si yakulya indigwa yo wutunga, yakunoza nhavivyo ku soko yo kumukumya Muwaha, nayo nhavivyo yakumulumba u Mulungu. 7 Hambi muli sese, nha hasina mono keyiwumipilaga mweneco, hamba hasina mono keyifwilaga mweneco, 8 Hambi hono ciwumipe, nha cikumuwumipilo Muwaha, hamba hono cifwe, cikumufwilo Muwaha, holeka hamba ciwumipe, hamba cifwe, cili wo Muwaha du. 9 Hambi Kilisito nha yafwa, kanyhi yakazuka, ho yawe Muwaha wa wose, iwomi ne wafu. 10 Alu so cici agwe wukumuling'aniza u muyago? Nagwe so cici lo wukumubedegala u muyago? Ase wose colokwima he 'goda lyo wuling'anizi lyo Mulungu. 11 Hambi i Mandiko nha gakutya, “Nha vyono ane nili mumi yakutya u Muwaha, munhu wo wose kofugamila, no munhu wo wose kovumila vyono yo nene u Mulungu.” 12 Holeka wose cololonga hali Mulungu munhu na zakwe. 13 Holeka cilece kwiling'aniza, langa ciyohaje ho cilece kuwa cikobazo hamba hadodo kuli muyetu, hamba kumupela soko yo kwituma wubi. 14 Mu wilunza hamonga no Muwaha Yesu, manyiye lukulu vyono, hasina cinhu cocose cono cisemunwa mu cihuma cayo, ninga hono munhu yehwese vyono cinhu co wutunga cisemunwa, hodu kuli mwene caweza cisemunwa. 15 Hono wumukalaze u muyago ku soko ye ndigwa yono wukulya, wo wutya imikalile yako si yikutongwa no wendo. Wulece kulumbila lukulu i ndigwa yako yiwe sokosoko yo kumwajiliza yunji, mono Kilisito yamufwila. 16 Holeka mulece kulumba i cinhu cono anye mukuwona ciswanu ho cibedegalwe. 17 Hambi wutemi wo Mulungu nha si wuli mu wulye no wung'we, langa wuli mu wiling'ano, no mulamu, ne nyemo mu Muhe Mono Yelile. 18 Na mono yakumwitumamila Kilisito nhavivyo, yakuwa kumwendeza u Mulungu, no kulumbwa ne wanhu. 19 Holeka yicinojeye cizibate nhondo zose izinghani zono ziletaga mulamu, na zono zikucitaza kwiyizenga sese wose. 20 Cilece kuwuhodanga u mulimo wo Mulungu, ku soko yo wiwanganile wa muli ze zindigwa. Ndigwa zose zelile, ninga si viswanu kulya indigwa yono yomunoza munhu yunji yagwile mu wubi. 21 Yili ciba kuleka kulya nyama, hamba kung'wa divayi, hamba kwituma nghani yo yose yono yosuma kumukobaza u nduguyo ho yagwe. 22 Holeka wukamise cono wihuwiye hagati yako no Mulungu wako. Yali ciba u munhu mono kolo yayidumula inghani yo kwituma, si yakucipingapinga iciselinji cakwe. 23 Ninga u munhu mono yakuwa no wukangamyanje kuli ndigwa yono yakulya, yuyo yakuhoswa hono yalye, ku soko ilitumo lyakwe lilyo, si lili mu wihuwilo ng'o. Na co cose cono si cili mu musinji wo wihuwilo, wo wubi.
