WALUMI 11

1Alu nghuwuza nghutya, u Mulungu yawakumhila kutali iwanhu wakwe? Aa, ng'o. Hambi na nene nha nili Muisilayeli, we mbeyu ya Abulahamu, wo mulango wa Benyamini. 2U Mulungu si yawakumhila kutali iwanhu wakwe wono yali yawasiwanuye kulawa na katali. Muzikumbuciye mwene za Eliya, vyono gakulonga i Mandiko Gono Gelile, mwipango lyono yamung'ung'ulicilaga u Mulungu, ku soko ye Waisilayeli. 3“Gwe Muwaha, wawawulaga iwawizi wako, wawumwagula no wukumbicilo wako. Nane nasigala nili wene du, nawo wakusaka kumbulaga?” 4U Mulungu yamupitula Eliya yakamutya nhawule? Yamutya nhavi, “Nisigazize wanhu elufu mupunghati, wono wakali si namuhemba Baali.” 5Nhavivyo vyo yinha, sunga mwi'daha lili, wali baho wono u Mulungu yawasiwanula ku so lihewa lyakwe. 6U wuhagule wakwe wukulawilila mwi'hewa lyakwe, hamba si ku soko ye metumo gawo. Hambi hono u wuhagulwe wakwe wali wuwe wuli mu wulanga imetumo ge wanhu, kwaco ilihewa lyakwe si lyali liwe yihewa lya mbeka. 7Alu ma? Iwanhu wa Isilayeli, si wacituga cono walondolaga, langa iwahagulwa wo wacituga. Wanji wakanozwa kuwa wakamu. 8Nha vyono gakutya i Mandiko Gono Gelile. “U Mulungu yazinoza izinhumbula zawo ziwe nghamu, Sunga nalu, si wakusuma kuwona kwe meso gawo. Hamba kuhulika kwe makutu gawo.” 9Nayo Dawudi yakutya, “U wulilo wawo wuweze mutego wo kuwagwiza weneco, wagwe no kulipicizwa. 10Ne meso gawo gatukuwazwe, walece kuwona. No kuwaleka weyinamizye mu wugaye nhondo zose!” 11Nane nghuwuza nghutya, alu i Wayahudi wekobala ho, sunga wakajililila lukulu wose? Aa, ng'o, vyo si vinha! Langa ku soko yo wugwe wawo, imhonelo yiwaziza i wanhu wono si Wayahudi, i Wayahudi ho wawawonele wivu. 12Holeka hono u wugwe wawo, wuwaletela we yinze wugoli wo wumoteswe wuwaha, ale nhavivyo wuwe wawo wo kuwa wasina i mikalile miswanu ye cimuhe, wuwaletela wumoteswe wuwaha iwanhu wono si Wayahudi. Holeka yili calinze muno, vyono wukwilanicile wawo, woleta uwumoteswe winji muno. 13Ninga nghumulonjelenyi anye mono si muli Wayahudi, Vyono ane naweza nili mutumwa kuli wanhu wono si Wayahudi, nghwiyilumbila u witumami wangu, 14ho sume kuwanoza i Wayahudi wayangu, wamuwonelenyi nyenye wivu, nane ho sume kuwaponya wayawo wanji. 15Hambi hono yiwe u wulemwe wawo wukayiletela iyinze u wilamule no Mulungu, alu ho yowa wule mu cipango cono wovumililwa no Mulungu? Iwafu wolozuka! 16Hono i cibegulwa cilongozi co mukate ciwe casiwanulwa, hodu, no mukate wose wasiwanulwa wakondya; nayo imilela yo mubici hono yiwe miswanu, ne manhambi gayo gawezaga maswanu nhavivilya. 17Heya, ninga imanhambi ganji go muzeyituni wa mu mugunda gadumulwa, ne hanhu hayo, ilinhambi lyo muzeyituni wa mu mbago likalumbicizwa. Nanye mo wanhu mono si muli Wayahudi, yo nyenye mono lyo linhambi lilyo lyo muzeyituni wa mu mbago, aluno mukuhanga ivilungo ne mele, vyo muzeyituni wa mu mugunda. 18Holeka mulece kuwabedegala awalya wono wadumuligwe nhe manhambi! Hamba muwe mwina inghani yo kwilumbila, ninga mweze kukumbucila vyono, yo si nyenye mo weneco, mono mukuyisikamya yiyo imilela, langa imilela yo yikumusikamyenyi anye. 19Lunji kowa kutya, “I manhambi gapanyulwa, ane ho numbicizwe i hanhu hayo.” 20Sawa, gapanyulwa ku soko yo wula wihuwilo, ninga agwe wimile ku soko yo wihuwilo wako. Ninga wulece kwilumba, langa wogope. 21Hambi hono u Mulungu yawe si yawawonela lusungu i Wayahudi, wono wenha lye nhambi linghalaco, alu wukwihwesa vyono kokuwonela lusungu agwe? 22Ale, weze kukumbucila vyono, u Mulungu muswanu kanyhi mukali. U mwene mukali kuli wono wagwa, ninga mwene muswanu kuli gwegwe, hono wujendelele mu wuswanu wakwe, hono si nhavivyo, nagwe kodumulwa. 23Ne Wayahudi nhavivyo, hono wawulece u wuwe wawo wo kuwa wasina wihuwilo, wolumbicizwa kanyhi. Hambi u Mulungu nha yena wusume wo kuwalumbiciza kanyhi. 24Nanye mo wanhu mono si muli Wayahudi ku cihuma, mwinha linhambi lyo muzeyituni wa mu mbago, ninga mwawuswa kuko, no kulumbicizwa mu muzeyituni wa mu mugunda, i hanhu hono si henyu ku cihuma. Ninga i Wayahudi ku cihuma, wo wenha u muzeyituni wa mu mugunda, na yowa nghani mhelu kuli wene, ku wulumbicizwe kanyhi mu mubici wuwo u wawo. 25Wandugu zangu, nghuhila muyimanye imbeka yiyi yono hundikwe, ho mulece kwiwona nha muli we mahala. I cibede ce Wayahudi, cali ca cipango cidodo du, sunga kolo iwanhu wono si Wayahudi wamuziza u Mulungu. 26Baho nhondo ho lyopona ilikungugo lyose lya Isilayeli, nha vyono i Mandiko Gono Gelile gakulonga. “U Muponyi kololawa mu Sayuni Kolowuwusa u wubi wa Yakobo. 27Aci co cilagane cono nocinoza kuli wene Mu cipango cono nowuwusiza u wubi wawo.” 28Ninga i Wayahudi, vyono wakululema u Luganuzi Luswanu lo Mulungu, waweza vili sili no Mulungu, ninga so cambuzi cenyu anye mo wanhu mono si muli Wayahudi. Ninga vyono wahagulwa no Mulungu, holeka wakali vyo wendece wo Mulungu ku soko ye walezi wawo. 29Hambi u Mulungu, nha si kawonaga vyono vibi, lono yakondya kuwapela iwanhu ivipegwa vyakwe no kuwasiwanula. 30Baho katali, nanye mono si muli Wayahudi mwali mwamubeza u Mulungu, ninga aluno mwakondya kulutuga u lusungu lwakwe, ku soko ye cibede cawo. 31Na nhavivyo kanyhi, ku soko yo lusungu lono mwapegwa anye, i Wayahudi aluno weza kumubeza u Mulungu, ho nawo walubocele u lusungu lo Mulungu nhavivilya. 32Hambi u Mulungu nha yawadindila wose ku cibede cawo, ho yasume kuwawonela u lusungu wose. 33O, lecenyi u wugoli ne mahala no wumanye wo Mulungu, si wakulonga! Ne zining'aniza zakwe si za kulonga! Sunga ne zinzila zakwe si zimanyikaga yaye. Nha vyono gakulonga i Mandiko Gono Gelile. 34“Hambi nani mono yasuma kulimanya i lihala lyo Muwaha? Hamba nani mono kosuma kuwa mulanjilizi wakwe? 35Hamba lunji nani mono yamula kumupela cinji, nayo ho yagomolelwe kanyhi cinhu cico?” 36Hambi i vinhu vyose nha vilawaga kwakwe, na vyose vikawa so vilungo vyakwe, na ku soko yakwe. U lukumyo lweze kuli mwene sunga cibitilila! Heya.

will be added

X\