WALUMI 1

1Baluwa yiyi, yikulawa kuli nene Pawulo, u mwitumami wa Yesu Kilisito, no mutumwa mono nasiwanulwa, no kucemwa, ku soko yo kuluganula u Luganuzi Luswanu lo Mulungu. 2Baho katali Mulungu, yawehuwiziza iwanhu u Luganuzi luluno Luswanu, mu nzila ye wawizi wakwe, mu Mandiko Gono Gelile. 3No Luganuzi luluno Luswanu, lukulonga za muli Mwanagwe u Muwaha wetu Yesu, mono ku muwili, yalelelwa mu lulelo lwa Dawudi, 4na ku soko yo wele wakwe wo Wulungu, yahomelelwa kwe vilungo viwaha vyono, u mwene yo Mwana wo Mulungu, ku so wuzuce wa muli wafu. 5Muli yuyo, ane mo natujila ilihewa lyo kuwa mwitumami. Na ku soko yakwe, ho niwalongoze iwanhu we makungugo gose, ho wasume kwihuwila, no kuwa na cihuliko. 6Nanye yo nyenye mono muli wamonga wawo, mwacemwa ho muwe wanhu wakwe Yesu Kilisito. 7Holeka, nghumwandicilenyi anye wose mono muli kuko ku Lumi, iwendece wo Mulungu, mono mwasiwanulwa Nayo ho muwe wanhu wakwe. Nghumulombelenyi ilihewa no mulamu, vyono vikulawa kuli Mulungu u Sogo yetu, no Muwaha Yesu Kilisito. 8Nghwamula kumulumba u Mulungu wangu, muli Yesu Kilisito so nyenye wose, vyono u wihuwilo wenyu wumanyice kononze kose. 9U Mulungu mono nghumwitumamila kwe nhumbula yangu yose, mu wuganula u Luganuzi Luswanu lo Mwanagwe, yamanyile vyono nghumukumbucilenyi, 10nhondo zose mu wulombe wangu. Nane nghumulomba u Mulungu hono yende, yamhele lulu icilejeho ciswanu co kuziza kuko kwenyu. 11Hambi nha nghusaka kumuwonenyi, ho nimugawilenyi icipegwa ce cimuhe no kumusikamyenyi. 12Nha cinji ho ciyisikamye anye na nene, wo wutya, uwihuwilo wenyu wosikamya ane, uwihuwilo wangu nawo womusikamyenyi nanye. 13Nyendile mumanye wandugu zangu vyono, kali kenji nali kulanjilila kuza kumulamusenyi, ninga sunga na lulu nghali nyimiywe. Nali nyende nhuje cambuzi muli nyenye, nha vyono nacituga mu wanhu wono si Wayahudi. 14Wo mulimo wangu kuli wanhu wose, kuli walya wono wajendeleye na wono si wajendeleye, kuli wono wasomile, na kuli wono si wasomile. 15Yo yikuleka nghusulumila kuluganula u Luganuzi Luswanu sunga na kuli nyenye nhavivilya, mono mwikaye kuko ku Lumi. 16Hambi nha si nghuluwonela cevu u Luganuzi Luswanu; hambi nhavyo vilungo vyo Mulungu, vyono vikuwakomboza wose wono wakwihuwila, lulongozi kuli Wayahudi, nha vivyo na kuli wono si Wayahudi. 17Hambi u Luganuzi Luswanu, nha lukulajila calinze, vyono u Mulungu yakuwanoza iwanhu, ho wavumilwe no mwene, ne nghani yiyi, yikuwa kunozezwa mu wihuwilo, ku wulawa ku mwamulizo, sunga ko ku ndumo. Nha vyono yandikwe, “Mono yakuvumilwa no Mulungu so wihuwilo, kowumipa.” 18Ilikuwo lyo Mulungu, ligubuywe kulawa ku wulanga ku soko yo wubi ne masutya ge wanhu, wono ku soko ye zinzila zawo izimbi, wakuyimila imbeka, ho yilece kumanyika. 19Vyono zo Mulungu zose zono zimanyice, zili calinze muli wene, hambi u Mulungu mweneco nha yazanzalika. 20Ku wulawa lululya lono u Mulungu yayiwumbila yinze, ivilungo vyakwe vye cibitilila, no wulungu-lungu wakwe, hamba viwe si vikwijela kwa meso, ninga vimanyice calinze. Ne wanhu wosuma kuzimanya izinghani zizo, ku soko ye vinhu vivyo vyono u Mulungu yaviwumba. Holeka wasina cinji cono wokwikojela! 21Ku soko hamba wawe wakondya kumanya vyono u Mulungu yali baho, ninga si wakumupela ililumbo lyono limunojeye, hamba si wamulumbaga. Langa wene waco, wehwesaga zo wulele du, ne mahala gawo vyono gasina cinji, gamemile wutitu. 22Wakwiwona nha wono wena mahala, kumbe ho walele. 23Wakuleka kumuhemba u Mulungu mono kekalaga cibitilila, wene wakuhemba ivihwani vyono vina futa yo munhu mono kafwizaga, na ye zindeje, na ye vilimu, hamba nzoka. 24Holeka u Mulungu nayo, yawaleka watyatye u wusulumizi wubi, wa mu zinhumbula zawo, no kwiyituma izinghani ze cevu weneco wose mu miwili yawo. 25Wakuyikawaniziza imbeka yo Mulungu ku wulambi, wakucipela lilumbo no kucihemba iciwumbwa, si nho u Muwumbi mweneco, mono yo yanojeye lilumbo cibitilila! Heya. 26Ku soko yiyo, holeka u Mulungu yakawaleka, ho wawutyatye u wusulumizi wubi. Sunga ne wacekulu nawo wakukawaniza inyituma yono vihwanile ne mumbwa ye miwili yawo, kuli zono si zihwanile ne mumbwa. 27Nha vivyo ne walume nawo, wakuleka kutyatya inyituma ye mumbwa yo mulume no mucekulu, wene walume wakwiyisulumila weneco wose. Walume kwa walume, wakwinozeza nghani za cevu, na ku soko yiyo, wakwiyiletela weneco u wulipicizwe wono wuwanojeye so metumo gawo mabi. 28Kanyhi vyono iwanhu wakalema kuwa hamonga no Mulungu, nayo Mulungu yawalecile mu mahala gawo go wajilile, ho wetume zono si wali wanojeye wazitume. 29Wamemile u wubalya we mawala gose, wubalabala, wusulumizi, simbili. Wamemile mvivi, wuwulaji, wugombe, wukonji, wuhile wubi, wungwele, wubi, wahesi, 30no kuwabalalila wayawo i makani mabi go wulambi, wo wanhu wono si wakwendeza hali Mulungu, wafyuzi, wasisi, kanyhi wevuni, wali vilungo muno muno mu wituma zimbi, kanyhi wasina cihuliko kuli walezi wawo, 31wasina mahala, si wafisilizaga ivilagane vyawo, wasina wuswanu, hamba lusungu du bwete kuli wayawo. 32Ninga wene kuno ho wamanyile i lilajilizo lyo Mulungu nha vyono, iwanhu wono wakwituma i makani gono genha gago, yiwanojeye kufwa. Hamba nhavivyo, si vyono wakwituma makani gago weneco du, ninga wakwendezwa kanyhi sunga na wono wetumaga imakani gago.

will be added

X\