WUGUBULE 5

1Hanyuma nghawona citabu mu muwoko wo kulume wa yuyo mono yali yekaye mwigoda lyo wutemi, ne citabu cico, cali candice mugati na kunze yayo, naco cali ciwopwe ne vinamatizo mupunghati. 2Kanyhi nghamuwona malayika we vilungo yakulonga ne'zi 'waha yakutya, “Nani 'mbi mono yanojeye kubena vivyo vinamatizo, sunga yacigubule ne citabu cico?” 3Ninga hamba si yejela munhu wo wose ku wulanga, hamba mono'nze, hamba hasi ye yinze, mono yasuma kucigubula citabu cico, hamba kucilanga za mugati. 4Holeka ane nghalila muno muno, vyono si hejela munhu mono yali yanojeye yacigubule no kucilanga za mugati yaco. 5Hanyuma yumonga wa muli wawalya wawaha yakanonjela yakutya, “Wulece kulila! Wulanje ta! Simba wo mulango wa Yuda, wo lulelo lwa Dawudi, yakondya kusuma. Nayo yo kosuma kuvibena vinamatizo vivyo mupunghati, no kucigubula cico citabu.” 6Hanyuma nghawona u Mwana we ngholo yemile haciligati ye ligoda lyo wutemi, yapilimwe mbavu zose na vivilya viwumbwa vyumi, hamonga na wawalya wawaha. Na yuyo Mwana we ngholo yakawa kwijela nha muwulagwe. Yali yena mahembe mupunghati, ne meso mupunghati, nayo yo myuhe mupunghati yo Mulungu, i myuhe yono yali yategulwa hanhu hose mono'nze yose. 7U Mwana we ngholo yakacisola citabu mu muwoko wo kulume wa yu yulya mono yekaye mwigoda lyo wutemi. 8Nayo yaza kucisola citabu cico du, avilya viwumbwa vine hamonga na walya wawaha makumi mejete na wane, wakagwa funama hamwande yo Mwana we ngholo. Nawo wose wali wena visumbi na bakuli za Zahabu, zono zali zimemile wuvumba, go malombo ge wanhu wo Mulungu. 9Nawo wakemba u lwimbo aluno lupya. “Agwe yo gwegwe mono wunojeye wucisole citabu cico, no kubena vinamatizo vyayo. Vyono agwe wakondya kuwulagwa, wukamugulila Mulungu ne sakami yako, wose we zimbeyu zose, we zinonga zose, ne wanhu wose ne zinghungugo zose. 10Yo gwegwe mono wawanoza wawe wutemi we wakohani, wamwitumamile Mulungu wetu, nawo wotema mono'nze.” 11Hanyuma nghalanga, nghahulika lizi lya wamalayika wenji muno wono si wakuwala, maelufu na maelufu. Wali wekaye walipilime ligoda lyo wutemi, navyo viwumbwa vine vyumi, hamonga na walye wawaha, 12wakalonga wenuye mazi gawo wakutya, “U Mwana we ngholo mono yawulagwe, yo yanojeye yabocele vilungo, wugoli, mahala, wusume, lukumyo ne lilumbo.” 13Nghavihulika viwumbwa vyose vya ku wulanga na vya mono'nze, na vya kusi ye yinze, sunga na vya mu malenga, viwumbwa vyose du vya mono'nze, vikutya, “Kuli mwene mono yekaye mwigoda lyo wutemi, na kuli Mwana we ngholo, viweze wumoti, ne lilumbo, no lukumyo, no wuwaha cibitilila ne cibitilila!” 14Na vilya viwumbwa vine vyumi, vikatya, “Heya vyo yiweze.” Na awalya wawaha wakagwa funama wakamuhemba.

will be added

X\