WUGUBULE 4

1Hanyuma ya zizi, nghalanga, nghawona mulango wono wuli mwazi ku wulanga. Ne lizi lililya lyono nalihulika hamwamulizo, lyono lyali nha mulilo wa ndulele, likatya, “Wuze ahano hono kacanyha, nane nokulajila zinghani zono zilejela hanyuma.” 2Ho baho baho du nghawa mu Muhe. Kumbe kuko ku wulanga holili yigoda lyo wutemi, na mucanyha yalyo, yali yekaye yunji. 3Nayo yuyo mono yali yekaye mwi'goda lilyo, ku wulangwe, yali yehwanile alimasi, ne libwe yidunghu yiswanu muno. Kanyhi kwali kolili licilalyambwa lye mvula, lyono likung'alala, na kuwulanje, linha lili dedede, nalyo likawa lipilime ligoda lyo wutemi mbavu zose. 4Hakawa hogali magoda makumi mejete na mane gono gali galipilime ligoda lyo wutemi, na mu magoda gago, wali wekaye wawaha makumi mejete na wane, nawo wali wavwalile vivwalo vizelu, na mu mitwe yawo, wali wavwalile mikumbo ya zahabu. 5I mamuli, ne lizi, hamonga ne madidimo mawaha, vyalawaga baho he'goda lyo wutemi. Sunga ne zitala mupunghati zo moto, nazo zakaga baho he'goda lyo wutemi. Ne zitala zizo, yo myuhe mupunghati yo Mulungu. 6Na ha mwande ye ligoda lyo wutemi, hali ho cili cinhu cinji cono cihwanile malenga ga cilole, ne malenga gago gakawa gakung'alala kotye'bwe lyono likung'alala muno muno. Na mu mbavu zose ze ligoda lilyo lyo wutemi, mu wupilime walyo, kwali kovili viwumbwa vine vyumi. Ne viwumbwa vivyo vikawa vimemile meso, ku mwande na ku nyuma. 7I ciwumbwa cilongozi cali cihwanile simba, ce kejete kotya ng'ombe, na ce kadatu cali cina futa kotya ya munhu, naco ce kane, cali cinha kotya numba yikuguluka. 8Ne viwumbwa vivyo vyose vyono vine, vyali vina mabawa mutandatu mutandatu, kanyhi vyali vimemile meso, mugati na mudeha. Navyo vikalaga vikwimba hamba kuceha cilo ne misi, vikutya, “Welile, welile, welile, yo Muwaha Mulungu u Mudaha vyose mono yali, mono hoyuli, na mono yakuza.” 9Na lono viwumbwa vivilya vine vyembaga zinyimbo zo kumukumya, na ze cogopo, hamonga no kumulumba yuyo mono yekaye mwi'goda lyo wutemi, mono kekalaga cibitilila ne cibitilila, 10awalya i wawaha makumi mejete na wane, nawo wakagwa ha mwande ya yuyo mono yekaye mwi'goda lyo wutemi no kumuhemba yuyo mono kekalaga cibitilila ne cibitilila, nawo wakuyiwika mikumbo yawo ha mwande ye ligoda lyo wutemi akuno wakutya, 11“Agwe yo gwegwe go Muwaha nago Mulungu wetu, mono wunojeye lukumyo, ne lilumbo ne vilungo, hambi nha yo gwegwe muwumbi we vinhu vyose, na ku so wuhile wako, vyose vikawa, na vyose vyapegwa wumi no kuwumipa.”

will be added

X\