WUGUBULE 20

1Hanyuma kanyhi nghawona malayika yunji yakutima kulawa ku wulanga, akuno yena ne funguwo ya kwikombo lyo wuninyina, akuno kanyhi yadinghuye ne manyolo mu muwoko wakwe. 2Malayika yuyo yakalibata lizoka, alilya lizoka lye katali, yo Ibilisi, hamba Setani, yakawa kuliwopa myaka elufu monga. 3Malayika yakawa kuligumila kwikombo lyo wuninyina, yakawa kuwudinda mulango wo kwinjilila kuko, kanyhi yakawunamatiza ne cinamatizo, ho lilece kugajiliza makungugo kanyhi, sunga kolo yakondya kupuluta i myaka yiyo elufu monga. Ninga kolo yikupuluta myaka yiyo ye elufu monga, yinojeye liwopolelwe kanyhi kwe cipango cidodo du. 4Nghawona magoda ge citemi hamonga ne wanhu wono wali wagekaliye. I wanhu wawo, wakapegwa vilungo vyo kuling'aniza. Nghawona kanyhi ne zinhumbula za wono wadumulwa mitwe yawo ku soko yo kumuganula Yesu, na ku soko yo kuyiganula nghani yo Mulungu. Wawano wo wawo wono si walihemba lilimu lililya hamonga ne cihwani calyo, kanyhi hamba si wawicilwa citanjilo mu mahanda go wusu wawo, hamba mu miwoko yawo. Wakawumipa kanyhi, no kutema hamonga na Kilisito myaka elufu monga. 5(Na awalya wanji wono wali wafwa, si wawumipa, sunga yimalice myaka elufu monga.) Awuno wo wuzuce wulongozi. 6Wena nyemo, kanyhi wamotile muno, wawo wose wono wakuhanga mu wuzuce wuwuno wulongozi. Hambi i lifwa lye kejete, nha lyowa lisina vilungo kanyhi muli wene, nawo wowa wakohani wo Mulungu na wa Kilisito, nawo wotemana hamonga nayo, myaka elufu monga. 7Ne myaka yiyo elufu monga kolo yikumalika, Setani nayo ho yalawopolelwa yalawile mu jela. 8Nayo kolawila mu jela, kanyhi yamule kugakonga i makungugo gose gono geyagaye kono'nze kose, wo wutya, Gogu na Magogu. Setani kowakongholela hamonga ho wehome, nawo wowa wenji wenha musawawa wa mu Mwejelele we lilenga. 9Wakeyagala mu'si yose, wakayipilima nghambi ye wanhu wo Mulungu hamonga ne likaya lyo Mulungu, lyono Mulungu yalyendile. Ninga moto wukatima kulawa ku wulanga wukawaticimiza wose wose. 10Na Setani mono yawakongaga, yakagumilwa mwi'lamba lyono likwaka moto we cibiliti, mumo mono molili alilya lilimu, hamonga no muwizi wo wulambi, nawo wowa kugazwa misi ne cilo, cibitilila ne cibitilila. 11Hanyuma nghawona ligoda liwaha lyo wutemi, yizelu, na mono yekaye mwi'goda lilyo. I yinze hamonga no wulanga, vikatiza ha mwande yo wusu wakwe, hamba si vyejelela lukulu kanyhi. 12Nane nghawona i wafu wawaha ne wadodo, wemile he'goda lyo wutemi, ne vitabu vikagubulwa. Hanyuma citabu cinji, i citabu co wumi, naco nhavivyo cikagubulwa. Iwafu wakaling'anizwa nha vyono genha metumo gawo, nha vyono yandikwe mu vitabu vivyo. 13I lilenga nalyo, likawalavya kunze, i wafu wose wono wali wali mugati yalyo, i lifwa hamonga ne yinze ye wafu, vikawalavya kunze iwafu wose wono wali wali mumo. Na wose wakaling'anizwa nha vyono genha metumo gawo. 14Hanyuma ilifwa hamonga ne yinze ye wafu, vikatagwa mwilamba lyo moto. Ne lilamba lilino lyo moto, lyo lifwa lye kejete. 15No munhu wo wose mono litagwa lyakwe si lyejela lyandikwe mu citabu co wumi, u munhu yuyo yagumilwa mwilamba lyo moto.

will be added

X\