WUGUBULE 17

1Yumonga wa muli wa walya wamalayika mupunghati wono wali wene mabakuli, yakanyiziza, yakanonjela yakutya, “Ta wuze! Nane nokulajila u wulipicizwe wono yapejigwe ayulyo u musenyha muwaha, i likaya alilya liwaha, lyono lizenjigwe behi ye makolongo menji. 2Ne watemi wa kono'nze wasenyha nayo, na wono wekaye kono'nze wakawa wang'wela so wung'wa i divayi yo wusenyha wakwe.” 3Hanyuma nghasolwa no Muhe, yakanhegula sunga ko ku nyika. Na kuko, nghawona mucekulu yekaye mucanyha ye lilimu yidunghu. Ne lilimu lilyo lyali lyandicigwe matagwa ge nhovu hose, mu muwili walyo wose, nalyo lyali lina mitwe mupunghati ne mahembe yikumi. 4No mucekulu yuyo yali yavwalile civwalo ce liwala lyo lugandu ne ndunghu, kanyhi yali yehambile zahabu, ne mabwe go wuguzi wukamu ne zilulu. Na mu muwoko wakwe yali yebate cikombe ca zahabu, cono cali cimemile makomaza, hamonga ne makani mabi, gono gakuwulajila wusenyha wakwe. 5Nayo yali yandicigwe litagwa lya fumbo mu cihanda co wusu wakwe, ne litagwa lilyo lyali, “Babiloni i liwaha, u nyina we wasenyha, na we makani gose ge cikomaza ga mononze.” 6Nghamuwona mucekulu yuyo yagalile i sakami ye wanhu wo Mulungu, ne sakami ye wanhu wono wawulagwa ku soko yo kumuganula Yesu. Nane nali muwona, nghezina wizine wuwaha muno muno. 7Ninga malayika yakanonjela yakutya, “Alo, nhawule lu, wukwizina? Ale, ane nokulonjela i nhunizo ye zinghani ze cinyele zo mucekulu yuyu, na ze lilimu lilyo lyono limudinghuye, lyono lina mitwe mupunghati ne mahembe yikumi. 8I lilimu lilyo lyono wuliwene, lyono lyali lyumi hamwamulizo, ninga aluno lyakondya kufwa. Ninga hamba nhavivyo, lili behi lyonanuka kulawa kwikombo lyo wuninyina, ninga lyokongomezwa. Na wono wekaye kono'nze, wokwizina, heya, wanhu wose wono i matagwa gawo si gandikwa mu citabu co wumi ku wulawa mwamulizo we'nze, wokwizina muno muno kolo wakuliwona i lilimu lilyo lyono ha mwamulizo lyali lyumi, hanyuma likafwa, na aluno likwijela kanyhi! 9“Ninga baha, hakusaka mahala no wizuce! Vyono yiyo i mitwe mupunghati, go matunda mupunghati, no mucekulu yuyo yekaye mucanyha yago. Ne mitwe yiyo kanyhi, wo watemi mupunghati. 10Muli watemi wawo mupunghati, i wahano wakondya kongomela, no monga yakali yatemile, na ayulya yunji, yakali si yanafika yaye, nayo kolo yeza kuza, kokwikala cipango cidodo du. 11Ne lilimu lilyo lyono lyali lyumi ha mwamulizo, alu si lyumi kanyhi, yo mutemi wo munana, ninga nayo yo yumonga na awalya i watemi wo mupunghati, ninga nayo yakubita ku wajilile. 12“Ne mahembe gagalya yikumi gono wugawene, wo watemi wono wakali si natema yaye. Ninga wopegwa vilungo vyo kutema saa monga du, hamonga na lililya lilimu. 13Na wawa wose vyono wali yikumi, wose walonjeye kumonga, nawo wolipela lilimu lililya vilungo no wulajilize wawo wose. 14Nawo wokwihoma no Mwana we ngholo, ningo Mwana we ngholo, hamonga na wawala wono yawacema, kanyhi yakawahagula, i wanhu wehuwilwa, kowasuma wawo, vyono u mwene yo Muwaha we wawaha, kanyhi yo Mutemi we watemi.” 15Kanyhi malayika yakanyitya nhavi, “Agalya malenga gono wugawene bahalya hono yali yekaye yu yulya musenyha, go makungugo, iwanhu we mawala gose ne zinonga zose. 16Ne mahembe gagalya yikumi gono wugawene, hamonga ne lilimu lililya, vyose vyomusula yuyo musenyha. Nawo womusolela vinhu vyose vyono yena navyo, womuleka yali cipwi, kanyhi wololya nghuli yakwe no kumuticimiza mu moto. 17Hambi u Mulungu nha katajila mu zinhumbula zawo, wuhile wo kuwufisiliza wuhile wakwe, vyono welumbaniza weneco wose, no kulipela i lilimu u wulajilize wawo wo kutema, sunga kolo i nghani yo Mulungu yikuficilicila. 18“No mucekulu yuyulya mono wumuwene, lyo alilya likaya liwaha lyono liwatemile watemi wa kononze.”

will be added

X\