WUGUBULE 15

1Hanyuma, nghawona citanjilo cinji ku wulanga, citanjilo ciwaha muno, kanyhi ca wizine. Baho hali na wamalayika wali mupunghati, wena magazo mupunghati ge ndumilizo. Ne likuwo lyo Mulungu lyomalicila mu magazo gago mupunghati. 2Nghawona cinhu cihwanile lilenga nha cilole, lyono lihangahanjile no moto. Nghawawona ne wanhu wa walya nhavivyo, wono walisuma lilimu lilya, hamonga ne cihwani calyo, i lilimu lyono litagwa lyalyo likutambulwa mu nzila ye liwalo lililya. Ne wanhu wawo wali wemile he'lenga lye cilole, akuno wena ne masumbi gono Mulungu yawapela. 3Nawo wembaga u lwimbo lwa Musa u mwitumami wo Mulungu, no lwimbo lo Mwana we ngholo, wakutya, “Muwaha Mulungu, u Mudaha vyose i metumo gako ga wizine muno muno! Gwe go Mutemi we makungugo, zinzila zako zo zo wiling'ano kanyhi za mbeka! 4Go Muwaha, alo nani'mbi mono si yakogopile gwegwe? Hamba nani'mbi mono si yakulikumya ilitagwa lyako? Agwe yo gwegwe mono welile du wuli wene. Ne makungugo gose gokuza kwako ho gakuhembe, hambi i metumo gako, nha gali ling'ani kanyhi gejeye ne wanhu wose.” 5Hanyuma ya zizo, nghawona wuhembelo ku wulanga wudiguywe, wuli mwazi, na mugati yayo, molili lihema lyono likulajila vyono mbeka u Mulungu yali baho. 6Ale, wamalayika wawalya mupunghati wono wena magazo mupunghati, wakalawa mumo mu wuhembelo, akuno wavwalile vivwalo vya bafuta, vyono vikung'alala muno muno, wena ne misipi ya zahabu mu zimhambaga zawo. 7Hanyuma ciwumbwa cinji ciyagwe ne viwumbwa vivilya vine vyumi, cikawapela wawalya wamalayika mupunghati, mabakuli ga zahabu gono gamemile likuwo lyo Mulungu, mono kekalaga cibitilila ne cibitilila. 8U wuhembelo wukamema lyosi lyono lyaletwa no lukumyo ne vilungo vyo Mulungu, hasina hamba munhu wo wose mono yasuma kwinjila mu wuhembelo, sunga gaze gakondye kumalika magazo mupunghati mawaha, ge wamalayika wawalya mupunghati.

will be added

X\