WUGUBULE 12

1Hanyuma cikejela citanjilo ciwaha ku wulanga. Baho hali hoyuli mucekulu mono yali yavwicigwe lizuwa, no mwezi wukawa wuli hasi ye magulu gakwe, no mukumbo we zinyelezi yikumi na nyejete, zikawa mucanyha mu mutwe wakwe! 2Nayo mucekulu yuyo, yali yena'nda, nayo yakazoza muno ku soko ye nghunga no wusungu wo kusawa mwana. 3I citanjilo cinji kanyhi cikejela ku wulanga. Kukawa na nzoka mbaha, ndunghu, yono yina mahembe yikumi, ne mitwe mupunghati, ne mitwe yiyo yikawa yina mutwe, no mukumbo wayo. 4Lizoka lilyo likazikwejenha zinyelezi za mu mwanya, libimha lye kadatu, no mucila walyo, no kuzigumila kono'nze. Nalyo likema behi no mucekulu yuyo mono yali yeza behi no kusawa mwana, liwikanizize lukulu ho limumele mwana yuyo, baho du lono yakulelwa. 5Nayo mucekulu yuyo yakalela mwana wa cilume, mono kotema muli makungugo gose no kuwadimila nghome ya cuma. Ninga u mwana yuyo, yakasukulwa no kutegulwa kuli Mulungu, kwi'goda lyakwe lyo wutemi. 6Yuyo mucekulu nayo, yakamanyhila ku nyika, kono Mulungu yali yamuwiciye hanhu ha wutule, hanhu hono kosuma kudimwa mu vilo elufu monga, na magana mejete, na makumi mutandatu. 7Hanyuma kukawa ne milewo ku wulanga, Mikayeli ne wamalayika wakwe, wakawa wakwihoma na lilyo lizoka. Nalyo lizoka hamonga ne wamalayika walyo, vikehoma na Mikayeli ne wamalayika wakwe. 8Ninga lizoka likasumwa, no kuwulagwa, baho hakawa hasina kanyhi cilejeho co cose ku so lizoka ne wamalayika walyo co wikala ku wulanga. 9Holeka ilizoka lilyo liwaha, likagumilwa kunze. Ne lizoka lilyo, yo nzoka yi yilya ye katali, yono kanyhi yicemwaga Ibilisi hamba Setani, mono kawakongaga we yinze wose. Heya likagumilwa kono'nze hamonga ne wamalayika walyo wose. 10Hanyuma nghahulika lizi yiwaha likulawilila ku wulanga, likutya, “Alu mhonelo yono yikulawa kuli Mulungu, yakondya kuza! I vilungo no wutemi wo Mulungu wetu, wakondya kwijela. Na Kilisito wakwe kawulajila u wulajilize wakwe! Hambi ayulya mono kawasonjeza i wandugu zetu, mono yemile hali Mulungu, mono kawasonjezaga misi ne cilo, alu kagumilwa kononze. 11Nawo iwandugu zetu wakamusuma ku so sakami yo Mwana we ngholo, na kwe vilungo vye nghani yono wayiganula, kanyhi wawuwona no wumi wawo si cinji, hamba wafwe. 12Holeka musangalale anye nyo wulanga, hamonga na vyose vyono vili mumo. Ninga woyi he kuli'nye nyo yisi ne lilenga, hambi Setani nha kamuzizenyi akuno yena ne likuwo yiwaha, hambi nha yamanyile vyono vilo vyakwe vyono visigaye vyaza vicefu.” 13Nalyo lizoka lyali lyeza manya vyono lyagumilwa hono hasi mono'nze, likanza kumusepa yu yulya mucekulu mono yalelo mwana we cilume. 14Ninga mucekulu yuyo, nayo yakapegwa mabawa mejete ga numba, ho yaguluce yabite yakekale kutali ne lizoka lilyo, yabite yakekale ku nyika, hanhu hakwe hono kosuma kudimwa viswanu mu myaka midatu na myezi mutandatu. 15Nalyo lizoka lilyo likadeka mu nyuma yo mucekulu yuyo, no kulavya malenga menji nhe kolongo mu mulomo walyo, nago malenga gago gakahuluma no kumutyatya munyuma u mucekulu yuyo, ho gamukwenghweleze no kumutegula kutali. 16Ninga yinze yikamutaza mucekulu yuyo, yinze yikadiguka no kwahama nha mulomo, yikagamela malenga gago gose gono galawa mu mulomo we lizoka lilyo. 17Holeka lizoka lilyo likawa kumusimbila yuyo mucekulu, hodu likawa kwibitila, likawa kubita no kwihoma na wanji we mbeyu yo mucekulu yuyo wose wono wakukamisa malajilizo go Mulungu, kanyhi wehuwilwa mu mbeka yono yaziza muli Yesu. 18Nalyo lizoka likawa kwima he 'sangha lye lilenga.

will be added

X\