WAFILIPI 4

1Holeka wandugu zangu wendece, nina nyhilu muno yo kumuwonenyi, hambi anye nha yo nyenye nyemo yangu, no mukumbo wo lukumyo lo wusume wangu. Holeka nyo wendece wangu, vyo yinojeye kuli anye, mweze mukamile muli Muwaha. 2Anye Ewudiya na Suntike, nghumulombenyi dedede mujele kuwa mwilumbanizize kumonga kotya munhu no mwanakwawe, muli Muwaha. 3Nagwe go mwitumami muyangu mwihuwilwa, nghukunena wuwatazaje wadala wawo, hambi nha wetuma wahidimbaye u mulimo wo kuluganula u Luganuzi Luswanu, hamonga nane na Kelementi, hamonga ne wetumami wayangu wanji wose, wono i matagwa gawo, gandicigwe mu citabu co wumi. 4Holeka musecelelele nhondo zose, muli Muwaha! Kanyhi nghutya, Musecelele! 5Muweze wapolo kuli wanhu wose. U Muwaha yali behi. 6Mulece kwihwelela muli cinji co cose, langa mu wulombe wenyu, mumulombaje u Mulungu i visakwa vyenyu, mumulombaje akuno mukumulumba mu zinhumbula zenyu. 7No mulamu wo Mulungu wono wucizize u wumanye wose we wanhu, womukamisenyi zinhumbula ne mahala genyu mu wilunza na Kilisito Yesu. 8Ze ndumilizo wandugu zangu, mugamemyaje mahweso genyu ne zinghani ziswanu zono zili mbeka, swanu, na ze ling'ani, zono zilenguce, zono zikwendeza na ze cogopo. 9Mwitumaje zono mweyijiza, na zono mwabocela kulawa kwangu, i zinghani zangu, ne metumo gangu. Nayo u Mulungu wo mulamu, kowezana nanye. 10Mu wilunze wangu no Muwaha, yikawa nyemo mbaha kuli'ne, kanyhi mukatuga ne cilejeho co kulajila vyono mukali mukunghumbucila. Na hono cilonje i mbeka, munghumbucilaga vilo vyose, ninga du, si mwatuga cilejeho co kuyilajila nghani yiyo. 11Si nghulonga nhavivi yiwe nha kotya nghusaka cinji, hambi nha neyijiza kuwa nyheye ne vinhu vyono nina navyo, 12hono viwe vinji hamba vicefu. Nizoweleze kuwa nyheye no wuwe wo wose, ne hanhu hono nili hoyuli; u wuwe wo kuca no wuwe we nzala, no wuwe wo kuwa na vinji kuciza no wuwe wo wucepucilwe. 13Nosuma kuwa mu wuwe wo wose, hambi Kilisito nha yo kamhelaga i vilungo. 14Ninga anye mwanoza viswanu so wuhanga nane mu magayo gangu. 15Nanye nyo Wafilipi mumanyile vyono yo nyenye muli wene mono mwanhaza ha mwamulizo wo wuganule wangu wo Luganuzi Luswanu, lono nawukaga kuwulawa ku Makedoniya, yo nyenye du muli wene mono mwali hamonga nane mu cambuzi na mu wambuce wangu. 16Na lono nali kuko ku Tesalonike akuno nghuhila wutazi, anye mukandetela, kanyhi hamba si kamonga. 17Mulece kwihwesa nha vyono nyendile kubocela vipegwa du, langa nghusaka i cambuzi conjelezwe mu viwutwa vyenyu. 18Ale, nakondya kuvibocela vinhu vyose vyono mukamhela, kanyhi vicizize kuciza na vyono navihilaga. Alu nina navyo vyose ku soko Epafulodito yakondya kundetela i vipegwa vyenyu. Vipegwa vivino vikuwa nha vilavywa vye mhunjile swanu, likumbiko lyono likuvumilwa no kumwendeza u Mulungu. 19Holeka u Mulungu wangu ku soko yo wugoli wakwe wuwaha mu nzila ya Kilisito, komupelenyi i visakwa vyenyu vyose. 20Ale u lukumyo lweze kuli Mulungu wetu no Sogo yetu, cibitilila ne cibitilila. Heya. 21Nghumulamusenyi anye mo wanhu wose wo Mulungu mono muli wa Kilisito Yesu. We zindugu wono wali hamonga nane wakumulamusenyi. 22I wanhu wose wo Mulungu wono wali baha, na ko muno wono wali Mwikulu lyo Mutemi, wose wakumulamusenyi. 23Ilihewa lyo Muwaha Yesu Kilisito liwezane nanye wose.

will be added

X\