WAFILIPI 2

1Alu wulenyi mikalile yenyu ya muli Kilisito, yikumupelenyi vilungo? Hamba wendo wakwe wukumusindamicenyi? Aluno ma, mwina wumonga no Muhe Mono Yelile, kanyhi mukwiwonela lusungu no kwikalalila nyenye wose? 2Ale muyifisilizizaje i nyemo yangu mu wuwa na mutima monga, wendo monga, nhumbula monga no wuhile wumonga. 3Mulece kwitumila nghani yo yose mu mutima wo wivu, hamba mu widunhumuzi wa bwete, mweze mwina winenenyhezi nyenye wose, na munhu wo wose yamuwonaje muyagwe yo yamucizize lilumbo sinha mweneco. 4Halece kuwa na yunji mono yakulondola cambuzi cakwe mweneco du, langa cambuzi co muyagwe. 5Muweze no wuwe wuwulya wono yali yena nawo Kilisito Yesu. 6U Mwene ku cihuma, nhondo zose yali Mulungu ninga si yehwesa vyono u wuwa sawa no Mulungu ceze nha cinhu cono cidahile kudindimilwa kwa vilungo. 7Ninga yakenda kuzileka zizo zose mweneco, yakasola u wuwe wo mwitumami, yakawa yenha wanhu yakehwana kotya wanhu. 8Yakenenenyheza, yakawa na cihuliko sunga ko ku wufwe, heya, wufwe wa mu musalaba. 9Holeka u Mulungu yakamukumya muno yakamupela i litagwa lyono licizize i matagwa gose. 10Ku so lilumbo lye litagwa lya Yesu ho vinhu vyose vya ku wulanga, na vya kono'nze na vya kusi ye yinze, vifugame hamwande yakwe, 11Na munhu wo wose yavumile vyono Yesu Kilisito yo Muwaha, mu lukumyo lo Mulungu Baba. 12Ale anye wendece wangu, lono nali nili hamonga nanye, mwahulikaga nhondo zose, sunga na lulu hambe nili kutali nanye, anye mujendelele ne cihuliko. Mweze kwituma milimo akuno mwina ne cogopo no wucicime ku soko ye mhonelo yenyu, 13hambi u Mulungu nha yo ketumaga u mulimo muli nyenye nhondo zose, no kumupelenyi u wusume wo kusaka no kufisiliza zose zono zili mu wulunji wo wuhile wakwe mweneco. 14Mwitumaje zose akuno musina wung'ung'ulice hamba wiwanganile, 15ho muwe wanhu waswanu, wono wasina yilema, kanyhi mweze watelevu nha wana wo Mulungu wono wekaye mu yinze yiyi yo wubi yono yajiliye. Mobulila muli wene, kotya i zinyelezi vyono zikuwa kuwumulika u wulanga, 16hono muyibate mukamile i nghani yo wumi. Nane baho ho notujila i nghani yo kwilumbila mwizuwa lilya lya Kilisito, hambi nha ho yolokwijelela vyono u wuhidimbazi wangu hamonga no mulimo wangu si vyajilila bwete. 17Ninga hamba ndavywe hamonga no wihuwilo wenyu wono lye kumbiko kuli Mulungu, hodu nosecelela muno kanyhi nosangalalana na nyenye wose mu nyemo yiyo. 18Holeka na nyenye nhavivyo, yiwanojeye musecelele no kusangalalana nane mu nyemo yenyu. 19Mu wilunze no Muwaha, nina witumbilo vyono nosuma kumutuma Timoteyo kuko kwenyu vilo vivi, ho sinyhimale nane kolo nghumanya zenyu. 20Hambi nha sina munhu yunji mono yenha yuyo, mono kozilanjilila zenyu nha yuyu. 21Hambi wanji wose nha wakulondola i zawo weneco, si nho kulondola za Yesu Kilisito. 22Nyenye weneco mumanyile vyono Timoteyo yakamile, u mwene na nene, cihwanile vyono yenha u mwana no sogwe, cali kwitumama hamonga ku soko yo Luganuzi Luswanu. 23Holeka nitumbiye vyono nomutuma yaze kuko kwenyu nila neza kuwona vyono zowa zinha. 24Nane nitumbiye muli Muwaha vyono si noleka kuza kuko kwenyu vilo vivi. 25Ninga nawona cinojele nimutumilenyi ndugu yetu Epafulodito, u mwitumami muyangu no mulewani muyangu, mono mwanhumila, nayo yakanhaza mu visakwa vyangu. 26Yena wuhile wuwaha wo kumuwonenyi nyenye wose, nayo yakukalala muno nha vyono mwahulika yali yatamigwe. 27Heya nha yali yatamigwe behi no kufwa. Ninga u Mulungu yamuwonela lusungu, kanyhi si mwene du, langa na nene, ho ndece kuwa mu wukalale wono wucizize. 28Holeka nghuhila muno nimutumilenyi, nanye kolo mukumuwona kanyhi, ho musecelele, nane u wuzinguce wangu wucepuce. 29Ale mumubocelaje na nyemo kotya ndugu muli Muwaha. Kanyhi yiwanojeye muwapelaje lilumbo wanhu wono wenha mwene, 30vyono yali yeza kufwa so mulimo wa Kilisito, ho yasume kumhela u wutazi, wono anye si mwasuma kumhela.

will be added

X\