MATAYO 5

1Nayo Yesu yaza kugawona imapuga ge wanhu, yakabita kucanyha ye litunda yakekala hasi. Iwejizwa wakwe wakamuziza, 2nayo yakawa kwanza kuwejiza yakatya, 3“Wamoti wono wakwiwona nha waciwa hali Mulungu, hambi u wutemi wo Mulungu nha wawo. 4Wamoti wono wena wukalale, hambi nha wosindamikwa. 5Wamoti iwapolo, hambi nha wopegwa yinze. 6Wamoti wono wena nzala ne nyhilu, yo kwituma zo wuhile wo Mulungu, hambi u Mulungu nha kowegutya. 7Wamoti wono wena lusungu kuli wanji hambi nawo nha wowonelwa lusungu no Mulungu. 8Wamoti wono wena nhumbula nzelu, hambi nha womuwona u Mulungu. 9Wamoti wono wakwituma so wulondola mulamu, hambi nha wocemwa wana wo Mulungu. 10Wamoti wono wakugazwa ku soko yo wituma zo wuhile wo Mulungu, hambi u Wutemi wa ku wulanga nha wawo! 11“Muli wamoti nyenye, kolo wanhu wakumulijenyi, no kumugazenyi, no kumuvilenyi, kanyhi no kumulonjenyi makani mabi ku soko vyono muli watyatyi wangu. 12Musecelele, kanyhi muwe musangalaye, hambi nha mwina wuhumbilizwe wenyu wuwaha ku wulanga. Hambi nha vivyo nha vyo wanhu wawagaza i wawizi wono wamulongolelenyi. 13“Anye mwinha muli mwino mu yinze! Ninga u mwino hono wususulice, wogomolezezwa na cici kanyhi ndaso yayo? Awo wukuwa si wukwiliye cinji kanyhi, langa wutagwaga kunze no kukanyanjilwa ne wanhu. 14“Anye muli wuzelu we yinze! Kaya yono yizenjigwe mwi'tunda mucanyha, siyosuma kwihundika. 15Hamba ne wanhu si wakolelezaga tala no kuyigubiciza ne nhoto, langa yiwikwaga hacanyha, ha wuwiko wayo, ho yiwamulicile wose wono wali mumo mu nyumba. 16Nha vivyo vyo yinojeye no wuzelu wenyu wumulice hali wanhu, ho wagawone imetumo genyu maswanu, nawo wamulumbe u sogo yenyu wa ku wulanga. 17“Mulece kwihwesa vyono ane naza ho niwupate u Wulajilize wa Musa, hamba lunji ne mejizo ge wawizi. Ane si naza ho nizipate zizo, langa naza ho nizisikamye. 18Nghumulonjelenyi mbeka, vyono sunga u wulanga ne yinze zilapuluta, ninga hasina hamba nghani ndodo, hamba cipinga cidodo co Wulajilize cono cowuswa, sunga kolo zose zakondya kufisilizwa. 19Holeka muli wose mono kobena ililajilizo hambe lidodo sinha gose, no kuwejiza ne wanji wetume nha vivyo, yuyo yo kowa mudodo muno mu wutemi wa ku wulanga. Ninga mono kosuma kuzibata, sunga no kuwejiza iwanji, yuyo kowa muwaha mu wutemi wa ku wulanga. 20Holeka nghumulonjelenyi nghutya, u wuswanu wenyu, hono wulece kuciza awulya we Wafalisayo ne wejizi wo Wulajilize, nanye si mokwinjilila lukulu mu wutemi wa ku wulanga.” 21“Mwahulika vyono iwanhu we katali walonjelwa nhavi, ‘Wulece kuwulaga munhu! Nayo mono kowulaga, yimunojeye yaling'anizwe.’ 22Ninga ane nghumutyenyi, muli wose mono yakumuwonela likuwo u nduguye, yuyo yimunojeye yaling'anizwe. Nayo mono yakumubedegala u nduguye, yuyo kotegulwa ku wuling'anizwe. Na mono yakumutya u nduguye ‘Go mulele gwe,’ yuyo yanojeye yenjile mu moto we Gehena. 23Ale, hono wuwe wukulavya icilavywa cako ha cikumbicilo, na kuno hono wukumbucile vyono u nduguyo yena nghani na gwegwe, ale, 24wucilekaje icilavywa cako, ha mwande ye cikumbicilo, wubite wamule mukelamule no nduguyo, hanyuma ho wuze, wukacilavye icilavywa cako. 25“Mwilumbanizaje mbela mbela na mono yakukusitaka lono mukali nayo mu nzila, lono mukubita kuli mahakama. Na hono wulece kulanjilila, mono yakukusitaka, kokuwika mu miwoko ya hakimu, nayo hakimu, kokuwika mu miwoko ye wasilikale, nagwe kudindilwa mu jela. 26Mbeka nghukulonjela, vyono sikolawaniziza lukulu mumo sunga kolo weza kukondya kulipa sendi ye ndumilizo.” 27“Mwahulika vyono iwanhu walonjelwa, ‘Wulece kusenyha!’ 28Ninga ane nghumulonjelenyi vyono, umunhu mono komulanga mucekulu sunga yamusulumile, yuyo yakondya kusenyha nayo mu nhumbula yakwe. 29Holeka, hono iliso lyako lyo kulume likusutizye, ale, wuliwusaje wulitaje kutali. Yili ciba muno kuli'gwe, wajilize cilunzwa cimonga co muwili, si nho kutagwa u muwili wako wose mu moto. 30Na hono u muwoko wako wo kulume wukukusutizya, ale, wuwudumulaje no kuwutaga kutali. Yili ciba muno wajilize cilunzwa cimonga co muwili, si nho u muwili wako wose wutegulwe mu moto we Gehena.” 31“Kanyhi yalongwa vyono, ‘Mono komuleka u mugolece wakwe, ale yamupelaje talaka.’ 32Ninga ane nghumutyenyi, mono komupela u mugolece wakwe talaka, langa hono si ku soko yo wusenyha, yuyo yakumwambuza du yasenyhe, no munhu yunji hono yamutole u mucekulu mono yapejigwe talaka, nayo yakusenyha.” 33“Mwahulika kanyhi iwanhu we katali vyono walonjelwa, ‘Wulece kukawaniza uwilahize wako, langa yikunojeye wuwufisilize u wilahize wako kuli Muwaha.’ 34Ninga ane nghumulonjelenyi nghutya, mulece kwilahiziza lukulu mwi'tagwa lya cinji co cose, hamba ku wulanga, hambi nha lyo ligoda lyo lukumyo lyo Mulungu, 35hamba cinji ca kono'nze, hambi nha wo wukanyago we magulu gakwe, hamba ku Yelusalemi, hambi nha yo kaya yo Mutemi muwaha. 36Hamba wulece kwilahiza mu mutwe wako, hambi nha sikosuma kulunoza u luvwili lwako lumonga, luwe luzelu hamba lutitu. 37Hono wutye, ‘Heya’ ale yiweze ‘Heya du!’ Na hono wutye, ‘Ng'o’ ale yiweze mbeka ‘Ng'o.’ Na yo yose yono yitimile zizo, yilawaga kuli ayulya u Mubi.” 38“Mwahulika vyono yalongwa, ‘Liso na liso liyagwe, lino na lino liyagwe.’ 39Ninga ane nghumutyenyi, wulece kumulipiciza u munhu mubi. U munhu hono yakutowe kofi mu luzagasa lo kulume, ale wumupitusizaje no luzagasa luyagwe. 40Munhu hono yakutegule kuli mahakama, ho yakusolele shati yako, wumulecelaje yasole ne likoti lyako. 41No munhu hono yakudindimize wumudinghulile u mutegulo wakwe mu cihinzo ca kilometa monga, agwe wumudinghulilaje wumufise kilometa nyejete. 42Nayo mono yakukulomba, wumupelaje, kanyhi wulece kumulemeza mono yakusaka kukukopa cinji.” 43“Kanyhi mwahulika vyono yalongwa, ‘Wumwendaje u muyago ninga wumusulaje u mulugu wako.’ 44Ninga ane nghumutyenyi, ‘Muwendaje iwalugu wenyu, kanyhi mweze kuwalombela wono wakumugazenyi nyenye, 45ho musume kuwa wana wo Sogo yenyu mono yali ku wulanga. Hambi u Mwene nha kawamulicilaga ilizuwa lyakwe iwanhu waswanu ne wabi, no kuwatonyezeza imvula iwanhu waswanu ne wabi.’ 46Alu motuga wuhumbilizweci hono muwe kuwenda du wono wakumwendenyi nanye? Hasina! Ku soko sunga ne watoweza kodi nawo wanozaga nhavivyo. 47Na lono muwe mukuwalamusa iwandugu zenyu du, wulenyi mowa mwanoza cinhu cijenzi? Ne wanhu wono si wamumanyile u Mulungu, nawo nha wanozaga nhavivyo. 48Holeka mweze mukwilaniciye, nha vyono u Senyu wa ku wulanga yakwilaniciye.”

will be added

X\