MATAYO 28

1Ilizuwa lye Sabato lyaza kupuluta, na lono lizuwa lyali behi no kusosomoka mwizuwa lye Jumapili, Malyamu Magadalena hamonga na Malyamu ayulya yunji, wakabita ku cilanga citenjelo. 2No wucicime we yisi wukaza kwa nhinicizo muno, na Malayika wo Muwaha yakatima ku wulawa ku wulanga, yakaliwusa i libwe lililya, nayo yakalikalila mucanyha yayo. 3No wulangwe wakwe, yejelaga yenha limuli, ne vivwalo vyakwe, vyali vizelu swee, kotya seluji. 4Ne walindilizi we citenjelo wakacicima muno so woga wuwaha, wakawa kotya nha wafwiye. 5Ninga Malayika yuyulya yakawatya i wacekulu wawalya, “Anye, mulece kogopa! Ane manyile vyono anye mukumulondola Yesu, mono yatumbikwa mu musalaba. 6Ninga alu, yali hasina ahano, hambi nha kazuka nha vyono yalonga mweneco. Ale, muze muhawone ihanhu hono wali wamuwicile. 7Holeka alu, mubite mbela mbela, mukawalonjele iwejizwa wakwe, vyono yazuka muli wafu, sunga na lulu, komulongolelenyi ku Galilaya, na kuko ko momuwonela. Ale, ane nakondya kumulonjelenyi.” 8I wacekulu wawo, nawo akuno wena no woga, hamonga ne nyemo mbaha, wakawuka mbela mbela ha citenjelo, wakamangha, wakabita wakawalonjela i wejizwa wakwe. 9Lulo du baho Yesu yakawa kwitang'anila nawo. Nayo yakawalamusa, yakawatya, “Lamucenyi.” Nawo i wacekulu wawo, wakamubitila, wakafugama hali mwene, wakayibata imigulu yakwe. 10Nayo Yesu yakawalonjela yakawatya, “Ale, mulece kogopa! Ninga aluno mubite mukawalonjele wandugu zangu, vyono wabite ku Galilaya, nawo ko wombonela kuko.” 11Iwacekulu wawalya nawo lono wabitaga, i walindilizi we citenjelo wanji nawo, wakabita kwi'kaya, wakawaloloseza i wakohani wawaha, muli zose zono zijeye. 12Wakawa kwikonghola hamonga ne wanyamhala, wakelumbaniza wakawa kuwapela wawalya wasilikale mapesa menji muno muno, 13akuno wakuwatya, “Anye nhondo mutye nhavi, ‘Iwejizwa wakwe waza ne cilo ase lono cali cigonile, wawa kumuhiza.’ 14Na hono u muwaha we yisi yayimanye inghani yiyi, ase colongana nayo du, sunga cimanye vyono anye si motuga wugazwe.” 15Nawo i walindilizi wawo wakazibocela i zipesa zizilya, wakanoza nha vyono wafundwa. Ne nghani yiyo, yikatandala kuli Wayahudi sunga nalu. 16Nawo wa walya iwejizwa we likumi na monga, wakabita ku Galilaya sunga ko kwi'tunda lililya lyono Yesu yawalajiliza. 17Nawo waza kumuwona, wakamuhemba, hamba yiwe wanji muli wene, wali wena mahwele. 18Nayo Yesu yakaza sunga behi nawo, yakawatya, “Ane mhegwa u wulajilize wose, wa ku wulanga, sunga na wa kono'nze. 19Holeka, alu, mubite, mukawanoze i wanhu we makungugo gose, wawe watyatyi wangu, muwabaputizizaje mwitagwa lyo Sogo yo Munhu na lyo Mwana, na lyo Muhe Mono Yelile. 20Kanyhi, muwejizaje, webate i malajilizo gose gono namupelenyi. Nane nili hamonga nanye vilo vyose, heya, sunga ko ku ndumilizo ye vilo.”

will be added

X\