MATAYO 27

1Wali weza kwela, hakali mitondo muno muno, i wakohani wawaha wose, hamonga ne wanyamhala we wanhu, wakawumba mahala kuli Yesu ho wamuwulaje. 2Wakamuwopa ne manyolo wakamusola, wakamutegula kuli Pilato u muwaha we yisi. 3Ale, baho Yuda mono yamugaluka Yesu, yaza kuwona vyono Yesu yakondya kuling'anizwa, hodu, yakanena, yakawagomolela i Wakohani wawaha, zizilya zipesa makumi madatu. 4Yakawa kuwalonjela yakutya, “Nye, ane sutya, vyono nimulavizye u munhu mono yasina yisutya, ho yawulagwe.” Ninga iwene wakamutya, “Ale ko kwako, alu ase cina nghanici?” 5Nayo Yuda hodu, yakawa kuzigumila zizilya zipesa hasi mu Nyumba yo Mulungu, yakawa kulawila kunze, yakawa kubita kwinyonga. 6Nawo i wakohani wawaha, wakazisola zipesa zizilya, wakatya, “Si viswanu yaye ziwikwe mu ciwutwa ce zisawo ze Nyumba yo Mulungu, ku soko vyono pesa za cifo ca Sakami.” 7Holeka wakelumbaniza, wakagula mugunda wo muwumbi, ho hawe hanhu ha wuziko we wajenzi. 8Holeka ku soko yiyo u mugunda wuwo, wukucemwa, mugunda we sakami. 9Izinghani zo muwizi Yelemiya, vyo zaficilicila nhavivyo, zono yatya, “Wakasola i zipesa makumi madatu, i cifo ca ayulya mono i wanji wa mu wana wa Isilayeli wamuwajila. 10Nazo wakazigula mugunda wo muwumbi, nha vyono yalajiliza u Muwaha.” 11Yesu yakategulwa hali muwaha we yisi. Hodu, u muwaha we yisi nayo, yakawa kumuwuza yakutya, “Alo yo gwegwe go Mutemi we Wayahudi?” Nayo Yesu yakamutya, “Nha kulonga gwegwe.” 12Ninga i wakohani wawaha, hamonga ne wanyamhala, lono wamusitakaga, u mwene Yesu, hamba si yapitula cinji co cose. 13Holeka Pilato yakamuwuza, yakutya, “Alo ho si wukuhulika i masitaka gago gose, gono wakukusitaka?” 14Ninga u mwene Yesu si yapitula nghani hamba monga bwete, sunga yuyo u muwaha we yisi yakezina muno muno. 15U muwaha we yisi yali yazoweye mwipango lye sikukuu ye Pasaka, kuwawopolela i Wayahudi mufungwa monga mono wamusakaga. 16Na mwidaha lilyo, kwali koyuli mufungwa yumonga litagwa lyakwe yali Balaba. 17Holeka iwanhu wali weza kwikongholela hamonga, Pilato yakawawuza, yakatya, “Alu mukusaka nimuwopolelenyi wa hayi, muli wawa iwejete, Balaba, hamba Yesu mono kacemwaga Kilisito?” 18Nayo yalongaga nhavivyo ku soko na mweneco yali yamanyile vyono wamuleta Yesu kuli mwene ku soko yo wivu wawo du. 19Nayo Pilato lono yali yekala mwigoda lyakwe lyo wuling'anizi u mugolece wakwe yakamutegulila nghani, yakutya, “Wayiko, wulecele lukulu kwiyinjiza mu zinghani zo munhu yuyu muswanu, ku soko no muyago, izuwali ngazika muno muno mu ndoto, ku soko yakwe.” 20Ninga i wakohani wawaha hamonga ne wanyamhala, wakawalonjela iwanhu, wamusace Balaba yo yawopolelwe, ninga Yesu yawulagwe. 21Nayo u muwaha we yisi, yakawawuza yakatya, “Alu wa hayi, muli wawa i wejete, mono mukusaka nimuwopolele?” Nawo wakatya “Balaba.” 22Nayo Pilato yakawatya, “Alu ho nimunoze nhawule Yesu mono kacemwaga Kilisito?” Wose wakatya, “Yatumbikwe mu musalaba!” 23Pilato yakawawuza yakutya, “Ku sokoci?” Alo cono yasutizye ci cici? Ninga iwene ho wakacila kuzoza muno muno, wakutya, “Yatumbikwe mu Musalaba!” 24Hodu nayo Pilato yaza kumanya vyono si kosuma cinji, na vyono mazozo gali geza kwanza, hodu u mwene yakasola malenga, yakezuguza miwoko yakwe hali wanhu wose akuno yakutya, “Ane ta, sina nghani yo yose kuli ze lifwa lyo munhu yuyu, yo nghani yenyu nyenye nyo weneco.” 25Nawo iwanhu wose wakatya, “Isakami yakwe yiweze muli sese, hamonga ne wana wetu!” 26Hodu, Pilato yakawa kuwawopolela Balaba, kulawa mu jela, ninga yakawa kumulavya Yesu ho yatumbikwe mu musalaba. 27Hanyuma iwasilikale wo muwaha we yisi, wakamwinjiza Yesu mwi'kulu, wakamwikongholela ciwumbi cose. 28Baho wakamuwopola i vivwalo vyakwe, wakamuvwika musweko we liwala lyo lugandu, 29wakatawa cipombelo ce mamivya, wakamuvwika mu mutwe, wakamwibatiza ne lidete mu muwoko wakwe wo kulume. Wakafugama ha mwande yakwe, akuno wakumuzwajiza wakutya, “Lamucenyi go Mutemi we Wayahudi!” 30Wakamufunyila mate, wakalisola lidete lililya, wakamutowela mu mutwe wakwe. 31Wali weza kukondya kumuzwajiza, hodu wakawa kumuwopola wuwulya musweko, wakamuvwika kanyhi myenda yakwe, wakawa kumutegula wakamutumbice mu musalaba. 32Nawo lono wabitaga wakamwagana munhu yunji mono yakucemwa Simoni munya ku Kilene, wakamudindimiza yuyo ho yawudinghule u musalaba wa Yesu. 33Nawo wali weza kufika i hanhu hono hakucemwa Goligota, nhunizo yayo, “Ihanhu he cipala co mutwe.” 34Wakamupela Yesu divayi yono yihangahanjile ne hungwi ho yang'we. Ninga mwene Yesu yaza yijeza du, yakalema kuying'wa. 35Wakamutumbika mu musalaba, hanyuma wakagawana myenda yakwe, mu nzila yo kuyitowela kula. 36Wakekala baho akuno wakumudima. 37Na hacanyha yo mutwe wakwe, wakawika u wusitakwe wakwe wono wali wandicigwe nhavi, “Ayu yo Yesu u Mutemi we Wayahudi.” 38Ne wahizi wejete, nawo wakatumbikanwa hamonga nayo, yumonga ku lubavu lwakwe lo kulume, no muyagwe kulubavu lwakwe lo kucekulu. 39Ne wanhu wono wapulutaga baho, wakawa wakuzugunza i mitwe yawo, akuno wakutya, 40“Alu 'gwe! Si watezaga vyono kosuma kuyimwagula i Nyumba yo Mulungu, no kuyizenga kanyhi mu vilo vidatu du? Ale ta, luno wiponyaje go mweneco. Hono agwe wuli Mwana wo Mulungu, ale wutime mu musalaba!” 41Nha vivilya sunga i Wakohani wawaha, ne wejizi wo Wulajilize, ne wanyamhala, wose wakamuzwajiza wakutya. 42“He! Yawaponyaga wanji ninga alu kuwiponya mweneco, hamba si yakusuma yaye! Ati u mwene yo mutemi we Wayahudi! Heya, yatime le, mu musalaba, nase ho cimwihuwile. 43Yali yamwitumbiye u Mulungu, akuno yakutya, ati u mwene yo Mwana wo Mulungu, ale ta, u Mulungu yamuponyaje, hono yawe yendezwe nayo.” 44Sunga na awalya wono wali watumbikanwe hamonga nayo, wakamuliganga. 45Na mu wulawa mu saa sita mu misi, sunga mu saa tisa, yisi yose yikawa mu wutitu. 46Na mu saa tisa, Yesu yakalila ne lizi yiwaha, yakatya, “Eli, Eli, lamasabakatani?” Inhunizo yayo, wo wutya, “Mulungu wangu, Mulungu wangu, so cici wukundeka?” 47Ninga wawalya wono wali wemile behi na baho, waza kuzihulika zizo, wakatya, “Nye, yakumucema Eliya.” 48Yunji muyawo yakamangha, yakasola sifongo, yakalizabika mu siki, yakalisomeceza mwidete, yakamupela ho yang'we. 49Iwanji wakatya, “Ta mulece ciwone hono Eliya kokuza yamuponye.” 50Baho, Yesu yakalila kanyhi kwe lizi yiwaha muno muno, na hobaho hodu yakawa kufwa. 51Hobaho du nalyo i libupa lyo mwenda lya mu Nyumba yo Mulungu likawa kudemuka hejete, kuwulawilila kucanyha sunga ko kusika yayo, ne yisi yikacicima, ne mabwe gakatulika, 52ne vitenjelo vikagubuka, sunga ne wanhu wenji wo Mulungu wono wali wafwiza, wakazukulwa, 53nawo lono wali wazuka, wakalawila mu vitenjelo, wakenjila mwi'kaya lyono lyelile, wakejela kuli wanhu wenji. 54Hodu, yuyulya u muwaha we wasilikale igana, sunga na wawalya wono wamudimaga Yesu, wali weza kuwona u wucicime we yisi, sunga na zose zono zejela, Oo! Wakogopa muno muno, wakatya, “Mbeka u munhu ayu, yali Mwana wo Mulungu.” 55Na baho hali howali wacekulu wenji wono walanjililaga, akuno wemile kutali. Wawo wo wawalya wono wamutyatya Yesu ku wulawilila ku Galilaya, akuno wakumwitumamila. 56Na muli wawo, mwali moyuli na Malyamu Magadalena, na Malyamu u nyina wa Yakobo na Yusufu hamonga no nyina we wana wa Zebedayo. 57Yaza kuwa cinyamihe, yakaza munhu yunji mugoli, munya Alimataya, ilitagwa lyakwe, Yusufu. Nayo yali nhavivilya mwijizwa wa Yesu. 58Yuyo, yakamubitila Pilato, yakalomba yapegwe u muwili wa Yesu. Nayo Pilato yakalajiliza, wamupele. 59Nayo Yusufu, yakawusola u muwili wuwulya, yakawupalinjiza mu sanda swanu ye bafuta, 60yakawuwika mu citenjelo cakwe i cipya, cono yali yacitulile mwi'talawe. Hanyuma, yakabidusiza libwe yiwaha, ha mulango we citenjelo, hodu yakawa kubita. 61Malyamu Magadalena na ayulya Malyamu yunji, wali wekaye baho vidomile ne citenjelo. 62Imitondo yaco, nha cinji ilizuwa lyono lyali vityatyizye ne lizuwa lyo Wiwikanize, i wakohani wawaha, hamonga ne Wafalisayo, wamubitila Pilato, 63wakamutya, “Gwe muwaha, cikumbuciye vyono ayulya u mukonji yalonga lono yakali mumi vyono ati, ‘Vilaza kupuluta vilo vidatu, nozuka kanyhi.’ 64Holeka wulajilize i citenjelo cidimwe muno, sunga mwizuwa lye kadatu, iwejizwa wakwe walece kumuhiza, na hanyuma wawe kuwalonjela wanhu, nha vyono kazuka. No wulambi wuwuno we ndumilizo, nhondo wowa wubi muno muno si nha awulya u wulongozi.” 65Nayo Pilato yakawatya, “Ale, nha mwina nawo i walindilizi, holeka mubite mukacilindilize, munghango nha vyono mumanyile.” 66Nawo wakabita, wakacilindiliza citenjelo, wakaliwicila ilibwe lya ha mulango citanjilo, wakamuwika no musilikale u mulindilizi.

will be added

X\