MATAYO 23

1Hanyuma yakawa kuwulonjela u winji we wanhu, hamonga ne wejizwa wakwe, yakatya, 2“Iwejizi wo Wulajilize ne Wafalisayo, wo wapejigwe u wulajilize wo kuwulolosa u Wulajilize wa Musa. 3Holeka munojeye anye mwibataje, no kwituma zose zono womulonjelenyi. Ninga mulece kwiga imetumo gawo, hambi na weneco nha si wakuzituma zizilya zono wakuziganula. 4Wene wawopaga imitegulo mizito, no kuwapiciza iwanhu mu mawega, ninga iweneco si wakusaka kugolola hamba cidole du bwete, ho wayidinghule imitegulo yiyo. 5Iwene izawo zose, wetumaga du ho wanhu wawawone. Hambi nha wendile kuvwala ha wusu wawo na mu miwoko yawo icitambala cono cihonele malajilizo, kanyhi wendile konjeleza ne masune mu majoho gawo. 6Kanyhi, wendile hanhu he lilumbo mu zindigwa ze zisikukuu, no kwikala mu magoda matambule mu matang'anilo go wuhembelo. 7Wendile muno muno ho walamuswe ne wanhu kwe cogopo mu zisokoni, no kucemwa kanyhi ne wanhu, ‘Mwijizi.’ 8Ninga anye, mulecele lukulu kucemwa ‘Mwijizi,’ vyono anye mwina mwijizi wenyu yumonga du, ninga anye wose muli ndugu. 9Hamba mulece kumucema munhu wo wose mukumutya, ‘Baba,’ bahano mono yinze, hambi u sogo yenyu, nha yumonga du mono yali ku wulanga. 10Hamba mulece kucemwa, ‘Walongola.’ hambi u mulongola wenyu nha yumonga du, nayo yo Kilisito. 11Nayo u muwaha muli nyenye, yimumojeye yo yawe mwitumami wenyu. 12Nayo mono yakwikumya mweneco, nha konyetywa, na mono yakwinyetya, yuyo langa yo kokumywa.” 13“Woyi he kuli'nye mo wejizi wo Wulajilize ne Wafalisayo, mo wakoci! Mono mukuwadindila iwanhu u mulango wo Wutemi wa ku wulanga. Nanye mo weneco si mukwinjila mugati, kanyhi hamba si mukusaka kuwakombola wono wakusaka kwinjila ho wenjile. [ 14“Woyi he kuli'nye mo wejizi wo Wulajilize ne Wafalisayo mo wakoci! Mono mukuwewonela iwacekulu wafwile, no kuwasolela ivinhu vyawo, akuno mukwinoza nha muli wanhu waswanu, so wulomba wulombe wutali muno muno. Na ku soko yiyi, holeka mopegwa wulipicizwe wuwaha.] 15“Woyi he kuli'nye mo wejizi wo Wulajilize ne Wafalisayo mo wakoci! Mono mukujenda mwi'lenga na mu yisi nghavu ho mutuje munhu monga yatyatye dini yenyu. Na kolo mwamutuga, mukumunoza kanyhi yawe yawunojeye u moto we Gehena kali kejete si nha nyenye mo weneco. 16“Woyi he kuli'nye, mo watonji wabofu! Anye mutezaga ati hono munhu yelahize kuli Nyumba yo Mulungu, si nghani yaye, langa hono yelahize kuli zahabu ye Nyumba yo Mulungu, baho langa yepela nghani. 17Anye mo wabofu, na mo walele! Alu ya hayi yono yine nhunizo mbaha, zahabu, hamba Nyumba yo Mulungu yono yikuyinoza zahabu yiyo ho yiwe yelile? 18Kanyhi mutezaga ati hono munhu yelahize ku cipegwa cono ciwicigwe mucanyha ye cikumbicilo, yuyo langa kepela nghani. 19Anye nyo wabofu, alu co ca hayi cono cina nhunizo mbaha, i cipegwa cico hambe cikumbicilo cono cikucinoza i cipegwa cico ciwe celile? 20Holeka mono yakwilahiza kuli cikumbicilo, yakwilahiza kuli cikumbicilo, na kuli vyose vyono viwicigwe mucanyha yayo. 21Na mono yakwilahiza kuli Nyumba yo Mulungu, yakwilahiza kuli Nyumba yo Mulungu nha vivyo sunga kuli mono yekaye mugati yayo. 22Na mono yakwilahiza kuli wulanga, yakwilahiza kuli ligoda lye nhojo lyo Mulungu, na kuli yuyo mono yekaye mwigoda lilyo. 23Woyi he kuli'nye mo wejizi wo Wulajilize ne Wafalisayo mo wakoci! Mono muwalifyaga iwanhu, zaka sunga na mu mahamha ge mhunjile swanu, ne binzali, ne zi nyanya, na akuno mukuzileka izinghani zimbaha zono zili mu Wulajilize, nha vyono iling'ani, lusungu no wihuwilo. Azi zo zali zinojeye anye muzikamise muno muno, hamba kuzisemwa azilya zinongozi. 24Lanjenyi ta, anye mo walongola wabofu! Mono muwusaga lihazi mu malenga, ninga kuno ho mukumela ngamiya! 25“Woyi he kuli'nye nyo wejizi wo Wulajilize ne Wafalisayo, mo wakoci! Anye mono mukwemaga kunze i cikombe ne bakuli, ninga mukuleka mugati mono mumemile ivinhu vyono mwavitujila mu nzila yo wuhizi no wubuguci. 26Agwe go Mufalisayo mubofu! Wamule wukweme mugati ye cikombe, holeka na kunze yayo nako kowa kwelile. 27“Woyi he, kuli'nye mo wejizi wo Wulajilize ne Wafalisayo mo wakoci! Anye, mono mwihwanile vitenjelo vibakwe swakala, vyono kunze vijelaga viswanu muno muno, ninga mugati, mbeka vimemile mafupa ga wono wafwa, ne takataka yose. 28Alu sunga na nyenye nanye iwanhu wakumuwonenyi mudeha nha muli wanhu waswanu, kumbe mugati yenyu, mumemile wukoci no wavu wose.” 29“Woyi he, anye mo wejizi wo Wulajilize ne Wafalisayo, mo wakoci! Hambi nha muzengaga ivitenjelo vye wawizi, no kuvihamba ivitenjelo vye wanhu waswanu. 30Akuno mukutya, ‘Ase mhali cali ciwe cili womi mu vilo vye wakuku zetu, si cali cilumbanize nawo no kuwawulaga iwawizi.’ 31Na ku soko yiyo, holeka mukuhomelela vyono anye nanye mo weneco kumbe, muli wana wa wawo wono wawawulagaga i wawizi, 32holeka alu muwufisilizaje mulimo wono wakondya kuwanza i wasogo zenyu! 33Anye mo wana we zinzoka, zono zina sumu! Alo mosuma nhawule kuwilega u wuling'anizwe wo moto we Gehena? 34Ku soko yiyo holeka ane nghumuletelenyi wawizi, ne wanhu we mahala, kanyhi ne wejizi, nanye mowawulaga no kuwatumbika wanji wa muli wene, na wanji mowakuna ne viboko mu matang'anilo genyu go wuhembelo, no kuwalondola londola mu matumbi gose. 35Na mu nzila yiyo, u wuhoswe wose ho womuzizenyi, ku soko ye sakami yose ye wanhu waswanu, yono yamwajika mu muhangha. Heya ku wulawa ha wuwulagwe wa Zekaliya, u mwana wa Balakiya mono mwamuwulajila mu Nyumba yo Mulungu haciligati ya Hono Helile ne cikumbicilo. 36Nghumulonjelenyi mbeka, vyono u lulelo lulu lotuga wulipicizwe ku soko ye zinghani zizi.” 37“Gwe Yelusalemi, Yelusalemi, mono wukuwa kuwawulaga iwawizi, sunga no kuwatowanga ne mabwe awalya wono watumwagwa u kwako. Kalinga kono nasakaga kuwakongholela iwanago kono kwangu, nha vyono nghuku yivikunyanjililaga viziyoziyo vyayo hasi ye mabawa gayo, ninga hamba si wenda yaye. 38Ale, holeka i Nyumba yo Mulungu wako nagwe yokwikala 'tongo. 39Heya, mbeka, nane nghumutyenyi vyono, si mosuma kumbona kanyhi, sunga mwi'daha lyono molotela, ‘Yo mumoti mono yakuziza Mwi'tagwa lyo Muwaha.’ ”

will be added

X\