MATAYO 21

1Nayo Yesu lono yali yasejelela ku Yelusalemi, no kufika ku Betifage mwitunda lye Mizeyituni, yakawatuma wejete wa muli wejizwa wakwe, 2yakawatya, “Mubite sunga kucitumbi acilya cono cili ha mwande yenyu, na kuko, moyagana ndogowe, mbope, yili hamonga ne nyana yayo. Ale muziwopolelaje mundetele. 3Na hono munhu yunji yamuwuzenyi soko yono yikuleka mukuziwopolela, mutye vyono, ‘U Muwaha yakuzisaka,’ nayo komulecelenyi lwa kamonga du.” 4Ne nghani yiyi yikanozwa nhavivyo, ho zifisilizwe azilya zono zalongwa no muwizi lono yatya, 5“Mulilonjele ilikaya lya Sayuni, Wulanje u Mutemi wako yakukuziza! Mupolo, kanyhi yali mucanyha ye ndogowe.” 6Nawo iwejizwa wakawa kubita no kunoza nha vyono walajilizwa na Yesu. 7Wakawa kuyileta yiyilya i ndogowe hamonga ne nyana yayo, wakawa kuyijeleka i myenda yawo mucanyha yazo, nayo Yesu yakawa kwikala mucanyha yayo. 8Ne lipuga liwaha lye wanhu, wakayitandika i myenda yawo mu balabala, ne wanhu wanji, wakatema i manhambi ge mibici, nawo wakagatandalika nha vivyo mu balabala. 9Ne mapuga ge wanhu wono wali wamulongoleye, sunga na walya wono wamutyatyaga, wakazoza ne mazi mawaha wakutya, “Yalumbwe u Mwana wa Dawudi! Yalugutwe yuyo mono yakuziza mwitagwa lyo Muwaha! Yalumbwe u Mulungu kucanyha!” 10Nayo Yesu lono yenjilaga mu Yelusalemi, i likaya lyose likamema sasamo. Sunga ne wanhu wakawa kuwuza wakutya, “Alu, nye, Yuyu yo nani?” 11Iwanhu wanji wa mwipuga lililya lye wanhu wakatya, “Ayu yo muwizi Yesu, mono yakulawilila ku Nazaleti mu yisi ya Galilaya.” 12Hodu, Yesu yakawa kwinjila mu Nyumba yo Mulungu yakawa kuwawinjila kunze, iwanhu wono waguzaga no kugula ivinhu mugati ye Nyumba yo Mulungu, yakazigwisa zimeza za wono wakawaga zipesa, sunga ne magoda ga wono waguzaga zinziwa. 13Akuno yakuwatya, “Yandikwe mu Mandiko Gono Gelile nha vyono, ‘I Nyumba yangu yocemwa, nyumba yo kulombela.’ Ninga alu anye, mwayinoza kuwa mhango ye wahizi.” 14Nawo iwabofu, na we vilema, wose wakamubitila kuko ku Nyumba yo Mulungu, nayo Yesu yakawaponya. 15Ale baho, nawo wakohani wawaha, hamonga ne wejizi wo Wulajilize wali weza kugawona i mapoto gono Yesu yanozize, hamonga ne wadodo wono wazozaga mu Nyumba yo Mulungu wehindile, wakutya “U lukumyo lweze kuli'gwe, go Mwana wa Dawudi,” wene wakasimba. 16Hobaho wakamutya Yesu, “Alu ho siwukuhulika vyono wakutya?” Nayo Yesu yakawatya, “Heya nghuhulika! Alu anye, mukali si nagasoma lo Mandiko gaga Gono Gelile? Gono gakutya, ‘Kuwejiza iwana wadodo, sunga ne wagalika wose, ho wakulavizye lilumbo lyono likwilaniciye!’ ” 17Hodu baho, yakawa kuwaleka, u mwene yakalawila kunze ye likaya, yakabita ku Betaniya, yakagona kuko. 18Nayo Yesu lono yawuyaga mwitumbi, hakali mitondo muno yakadabuka. 19Yakawuwona mukuyu wunji ha mhelo ye nzila, yakawubitila, ho yahepe imikalo yayo, ninga yakawagana wusina mikalo hamba hadodo, langa go mahamha du gali wene. Hodu yakawa kuwulonjela yakawutya, “Wulecele lukulu kulela kanyhi mikalo cibitilila!” Hobaho baho du, no mukuyu wuwo wukawa kunyala. 20Nawo iwejizwa waza kuwuwona, wakezina muno muno, wakatya, “Alu nhawule u mukuyu wuwu wunyala lwa kamonga du?” 21Yesu yakawapitula yakawatya, “Nghumulonjelenyi mbeka, vyono hono muwe no wihuwilo wono wusina mahwele, si mosuma kunoza nha vivi du, langa mosuma sunga na hono mulilonjele ilitunda lili mutye, ‘Wukulice wukegumile mwi'lenga,’ nayo vyo yowa nha vivyo. 22Na hono muwe no wihuwilo du, co cose cono mocilomba mu wulombe wenyu, cico mocituga.” 23Yesu yakenjila kanyhi mu Nyumba yo Mulungu yakawa yakwijiza mumo, na lono yejizaga, i wakohani wawaha, hamonga ne wanyamhala we wanhu wakamuwuza, wakutya, “Alu mwene, wukwitumila zizi zose mu wulajilize wa hayi? Hamba yo nani mwene mono yakupelile u wulajilize wuwuno?” 24Nayo Yesu yakawapitula yakatya, “Alu nane nomuwuzenyi yiwuzo limonga na hono mumhitule, ale, nane ho nomulonjelenyi vyono nghwitumila zizi mu wulajilize wa hayi. 25Wulenyi ta, u wulajilize wa Yohana wo kubaputiza walawa kuli nani? Wule, walawa ku wulanga hamba kuli wanhu?” Ninga iwene wakalongana weneco wose wakutya, “Hono citye, ‘Walawa ku wulanga,’ nayo kociwuza yatye, ‘Alu nhawule si mwamwihuwila?’ 26Na hono citye, ‘Walawa kuli wanhu,’ baho naho cikogopa i lipuga lye wanhu, hambi wose nha wamuvumiye Yohana nha vyono u mwene yali muwizi.” 27Hodu wakawa kutya, “Ase si cimanyile!” Nayo Yesu, yakawalonjela yakutya, “Ale hodu, hamba na nene sinomulonjelenyi vyono nghuzinozeza zizi mu wulajilize wa nani.” 28“Nanye mukuwona nhawule? U munhu yumonga yali yena wana wejete. Yakamulonjela mulongozi yakamutya, ‘Mwanangu izuwali wubite wuketume mulimo ku mugunda we mizabibu.’ 29Nayo muzelelo yulya yakatya, ‘Nema ne!’ Ninga hanyuma yayo, yakapitula lihweso lyakwe, yakabita kuwitumo mulimo. 30Nayo u sogo yawo yakamulonjela na yulya u mwanagwe we kejete, nha vivyo, nayo yakamulonjela sogwe yakatya, ‘Heya baba, nobita!’ Ninga hamba si yabita ku mulimo. 31Alu wa hayi wa muli wawa i wejete mono yetuma u wuhile wo sogwe?” Nawo wakamupitula wakatya, “Yuyulya u mwana mulongozi.” Yesu yakawatya, “Nane nghumulonjelenyi mbeka, vyono i watoweza kodi, sunga ne wasenyha, womulongolelenyi kwinjila mu wutemi wo Mulungu. 32Hambi Yohana nha yamuzizenyi yakamulajililenyi i nzila swanu ye mikalile, anye hamba si mwamwihuwila, ninga i watoweza kodi, sunga ne wasenyha wakamwihuwila. Nanye hamba muwe mwaziwona zizo zose, si mukasaka kuzikawaniza i zinhumbula zenyu no kumwihuwila.” 33Yesu yakatya, “Hulicizenyi ta, cihwanicizo cinji, Munhu yunji munya kaya, yakalima mugunda we mizabibu, yakawusitila no mululu, yakahimba ne likombo mumo lyo kuminyila zizabibu, yakazenga ne cilingo. Hanyuma yakawawika walimi, u mwene yakawa kubita ku yisi yinji ya kutali. 34Na mwi'pango lyo wupilo we zizabibu waza kusejelela, yakawatuma i wetumami wakwe wabite kuli wawalya iwalimi, ho wakasole mikalo yakwe. 35I walimi wawo, wakawebata wawo wetumami, yunji wakamutowa na yunji wakamuwulaga, na yunji kanyhi wakamutowanga ne mabwe. 36U munhu yuyo, nayo yakawatuma kanyhi i wetumami wanji, wenji kuciza walongozi, nawo i walimi, wakawatendela nha vivilya du. 37Nhondo ndumilizo, yakamutuma u mwanagwe, akuno yakwihwesa, ‘Magu, hamba womogopa u mwanangu.’ 38Ninga i walimi wawalya, waza muwona u muzelelo yuyulya yakuza, wakalongana weneco wose wakatya, ‘Ayu mwene yo muhazi, holeka ciba cimuwulaje, ase ho cisole u wuhazi wakwe!’ 39Hodu wakawa kumwibata, wakamulavyaniza kunze yo mugunda we mizabibu, wakamuwulaga. 40Alu yuyu munya mugunda we mizabibu kolo yakuza, ho yawanoze nhawule i walimi wawo?” 41Iwene wakamupitula wakatya, “Kowapela walimi wanji, wono wosuma kumupela mikalo mu cipango co wupilo wayo.” 42Baho nayo Yesu yakawatya, “Alo mukali si nayisoma inghani yiyi mu Mandiko Gono Gelile? Yono yikutya, ‘Ilibwe lyono walilema i wazenji alu lyo lyaweza lyo libwe liwaha lyo musinji. No Muwaha yo yayinozize inghani yiyi. Nayo yo nghani yo wizine muno muno kuli'se!’ 43“Holeka nghumulonjelenyi, vyono, u Wutemi wo Mulungu wowuswa kuli'nye no kupegwa i wanhu we makungugo ganji wono wakulavya mikalo yayo. [ 44Ninga mono kogwa mucanyha ye libwe lilyo, yuyo kobenanjika-benanjika, na hono limugwile munhu wo wose, langa lyomupondanjiza tici-tici.]” 45Iwakohani wawaha ne Wafalisayo, wali weza kuzihulika zizo ze vihwanicizo vyakwe Yesu, wakatanga lwa kamonga du nha vyono yawalongaga weneco. 46Holeka wakawa kwanza kulondola londola inzila yo kumwibatila, ninga lu wakogopa wanhu, hambi i wanhu nha wamumanya Yesu vyono u Mwene yo Muwizi.

will be added

X\