MATAYO 18

1Ale, mucipango cico i wejizwa wakamubitila Yesu wakamuwuza, wakutya, “Alu nani mono muwaha mu Wutemi wa ku wulanga?” 2Nayo Yesu yakamucema u mwana mudodo yumonga, yakamuwika haciligati yawo, 3hanyuma yakawatya, “Ane nghumulonjelenyi mbeka, vyono hono mulece kupituka no kuwa nha vyono wenha i wana wadodo, si mosumila lukulu kwinjila mu Wutemi wa ku wulanga. 4Na muli wose mono yakwinenenyheza nho mwana yuyu, ale yuyo yo muwaha mu Wutemi wa ku wulanga. 5Na muli wose mono yakumubocela u mwana yumonga nha vyono yenha yuyu mwi'tagwa lyangu, yuyo yakumbocela nene. 6“U munhu wo wose mono komwiwajiza yumonga wa muli wana wadodo wawa wono wanyihuwiye, yowa ciba kuli munhu yuyo yawopelezwe musingo ilizala liwaha lyo kusajila, no kugumilwa mu cisolo ce lilenga. 7Woyi he, kuli wenze ku soko ye mewajizo gono gakuwagwisa wanji. Imewajizo gago, heya ganojeye gawe gali baho, ninga woyi he kuli munhu yuyo mono yakugaleta. 8“Holeka hono u muwoko wako, hamba u mugulu wako wukwiwajize, ale ciba wuwudumulaje no kuwutaga kutali nagwe. Ku soko yili ciba kuli'gwe winjile mu wumi akuno wina muwoko hamba mugulu monga, si nho kutagwa mu moto we cibitilila, akuno ho wina ne miwoko myejete hamonga ne migulu yako myejete. 9Na hono iliso lyako likwiwajize, ale, wuliwusaje, wulitaje kutali nagwe. Habi nha yili ciba kuli'gwe, kwinjila mu wumi, akuno wina liso limonga, sinho kutagwa mu moto wa ku Gehena, akuno ho wina ne meso gako gose vyono mejete.” 10“Ale mwilanjililaje! Mulece kumubedegala yunji muyagwe ne wadodo wawa. Nghumulonjelenyi imbeka, vyono i wamalayika wawo kuko ku wulanga, wekalaga nhondo zose ha mwande yo Sogo yangu mono yali ku wulanga. [ 11Hambi u Mwana wo Munhu nha yaza ho yawaponye wono wajiliye.] 12Alu mukuwona wule? U munhu hono yawe yena ngholo igana limonga, na hono ngholo monga yajilile, kanozaga nhawule? Kozileka azilya ze makumi cenda ne cenda mwi'tunda, nayo yakubita kuyilondola yiyo yono yajiliye. 13Na kolo yakondya kuyiwona nghumulonjelenyi mbeka, vyono kotuga wusangalale muno ku soko ya yiyo ingholo monga, si nha vyono yakuzisangalalila azilya izingholo ze makumi cenda ne cenda zono si zajiliye. 14Yo nhavivyo, sunga no Sogo yenyu wa ku wulanga, si yendile yumonga wa muli iwadodo wawa yajilile.” 15“U nduguyo hono yakusutizye, ale, wubite wukamulajile imasutya gakwe, gwegwe na mweneco muli wene. Na hono yakuhulice, ale, kowa wamutuga nduguyo. 16Ninga hono yekale si yakuhulice ale, wumusolaje yunji yumonga, hamba wejete, muwe muli hamonga nagwe, na muwulanjize we wahomelezi wejete, hamba wadatu, zose ho zisume kunozelezwa. 17Nayo hono yekale si yawahulice wawo ale, wulilonjelaje likanisa. Na hono yekale si yalihulice likanisa, ale hodu, kuli'gwe yawe nhe wanhu wono si wamumanyile u Mulungu, ne watoweza kodi.” 18“Ane nghumulonjelenyi mbeka, vyono co cose cono mocidindila mono'nze, cowa cadindilwa nha vivyo na ku wulanga, na co cose cono mocidigulila mono'nze, ale nha vivyo na ku wulanga cowa cadigulilwa. 19Kanyhi nghumulonjelenyi vyono wanhu wejete wa muli nyenye, hono welumbanize baha mono'nze, so nghani yono wolomba, u Sogo yangu wa ku wulanga, mbeka kowapela inghani yiyi. 20Hambi nha ho hose hono wakwihanguliza wejete hamba wadatu, ku soko ye litagwa lyangu, nane nili baho muciligati yawo.” 21Hanyuma Petelo yakamubitila Yesu, yakamuwuza yakutya, “Alu mwene, hono u ndugu yangu yasutizye, ane yinojeye nimunenele nghanghulo yilinga? Kali mupunghati?” 22Nayo Yesu yakamupitula yakamutya, “Ane si nghutya, yeze kali mupunghati du, aa, ng'o, langa yiweze makumi mupunghati kali mupunghati. 23Holeka u Wutemi wa ku wulanga, wukwihwana no mutemi yunji, mono yakahila kuwona iliwalo lye sawo yakwe kuli wetumami wakwe.” 24Nayo yaza kwinjila mu wuwale, baho yakaletelwa munhu yunji mono yazijilwaga mapesa, talanta elufu yikumi. 25Nayo u munhu yuyo yakawa yasina cinhu co cose cono kosuma kulipa, holeka u muwaha wakwe, yakalajiliza vyono u munhu yuyo yaguzwe, u mwene no mugolece wakwe, ne wanagwe, sunga ne vinhu vyose vyono yali yena navyo, ho mugawa wuwo wulipwe. 26Ninga u mwitumami yuyo, yakafugama ha mwande yo muwaha wakwe, yakatya, “Wayiko wungolelaje nane nokulipa du u mugawa wose. 27Ayulya u muwaha wakwe nayo yakamuwonela lusungu, sunga yakawa kumunenela u mugawa wuwulya wose, hodu yakawa kumuleka yabite. 28“He, ninga u mwitumami yuyo, yali yeza kuwuka bahalya, yakamwagana yunji muyagwe ne wetumami wayagwe, mono u mwene yuyu yamudayaga yuyo muyagwe mapesa, dinali igana limonga. Hodu yakawa kumwibata, yakawa kumukoma mu mumelo, akuno yakutya, ‘Wundipaje umugawa wangu wono nghukudaya.’ 29Nayo yuyo u mwitumami muyagwe, yakafugama, yakamunena yakutya, Gwe, muyangu, wungolelaje, nane nokulipa du umugawa wako wose. 30Ninga mwene hamba si yasaka, langa yakamutajila mu jela, sunga kono kowulipila wuwulya u mugawa wose. 31Baho i wetumami wayagwe nawo waza kuyiwona inghani yiyo, mbeka wakakalala muno muno, hodu wakabita wakamulonjela u muwaha wawo muli zizo zono ziweye. 32Hobaho u muwaha yu yulya yakawa kumucema u mwitumami yuyulya, yakamutya, ‘Agwe, mbeka wuli mwitumami mubi. Agwe walomba kuli'ne, nane nghakunenela u mugawa awulya wose. 33Alu, si yali yikunojeye wumuwonele lusungu u mwitumami muyago nha vyono nane nakuwonela lusungu?’ 34Holeka u muwaha yuyo yakakolwa muno muno ne likuwo, yakamulavya yuyo u mwitumami ho yalipicizwe, sunga kono komalila kuwulipa u mugawa wuwulya wose. 35Ale, no Sogo yangu wa ku wulanga nayo, komutendelenyi nha vivyo nanye, hono mulece kwiyinenela munhu na nduguye kwe mitima yenyu yose.”

will be added

X\