MATAYO 14

1Na mwipango lilyo, u Mutemi Helode, yakawa yazihulika za Yesu. 2Yakawa kuwatya i wetumami wakwe, “U munhu yuyu, yo Yohana u Mubaputizi, kazuka mu wafu, holeka i vilungo vye metumo go wizine vikwitumilwa muli mwene.” 3Helode yuyu yo yamwibata Yohana, yakamuwopa ne minyolo no kumutajila mu jela, ku soko ya Helodiya, u mugolece wo mwanakwawe Filipo. Ne soko yayo yeneco yali yili nhavi, 4u mwene Yohana yamulonjela Helode, vyono, “Yili mwiko kuli'gwe kwikalana na yuyo u mugolece wa Filipo!” 5Holeka Helode yasakaga yamuwulaje Yohana, ninga hamba nhavivyo yawogopaga wanhu, vyono i wanhu wose, kuli wene, Yohana yali muwizi. 6Na mwizuwa lye sikukuu yo wulelwe wakwe Helode, u mwana we cicekulu wa Helodiya, yakavina viswanu muno ha mwande ye wajenzi. Sunga na Helode mweneco yakendezwa muno muno, 7yakawa kwihuwiza ko kwilahiza, vyono kosuma kumupela yuyo u muhinza, co cose cono kosaka. 8Nayo u muhinza, vyono yafundwa no nyina, yakabita yakalomba yakutya, “Ane nghulomba wumhelaje lulu baha du, u mutwe wa Yohana u Mubaputizi, wunhajilile amuno mu ciya.” 9U Mutemi yakakalala muno muno, ninga ku soko yo wilahize wakwe wono yali yelahiza, kanyhi na ku soko ye wajenzi wono wali wali baho ha zindigwa, hodu yalajiliza du yapegwa. 10Hodu ho baho Helode yakamutuma munhu, yakawa kubita ku jela, yakawa kumudumula Yohana u mutwe. 11No mutwe wa Yohana wukaletwa wuli mu ciya, wakamupela yuyulya u muhinza, nayo muhinza yakamutegulila nyina. 12Nawo i wejizwa wa Yohana wakaza, wakawusola u muwili wakwe wakawuzika. Hanyuma wakabita kumulonjela Yesu. 13Nayo Yesu yali zihulika zizo, yakawuka i hanhu baho, yakatulucila mu ngalawa, yakabita hanhu hanji hono hali helejehile ho yatule yali wene. Ninga i wanhu waza kumanya, wakamutyatya, wakujenda kwe migulu, wakulawilila mu makaya gawo. 14Nayo yaza kutima kwi'sangha, yakawona i lipuga iwaha lye wanhu, baho yakawawonela lusungu, yakawaponya i watamwa wawo. 15Yaza kuwa cinyamihe, i wejizwa wakwe wakamubitila, wakamutya, “Alu ahano nha nyika, ne lizuwa alu lyaswa. Holeka wuwelagaje i wanhu, ho wasume kubita wakegulile ndigwa ku vitumbi.” 16Ninga Yesu yakawatya, “Hasina soko ya wene yo kubitila kuko, langa, muwapelaje nyenye ndigwa.” 17Ninga i wene nawo wakamutya, “Ase ahano cisina cinhu co cose, langa cina mikate mihano du, na somba nyejete.” 18Yesu yakawatya, “Ale ndetelenyi vivyo hano.” 19Yakawalajiliza i wanhu wekale hasi mu mahanze, Mwene yakayisola yiyilya i mikate mihano, hamonga ne zisomba vyono nyejete, yakagalamila ku wulanga, yakamulumba Mulungu. Hanyuma yakayibegula yiyo i mikate yakawapela i wejizwa wakwe, nawo wakawapela wanhu. 20Ne wanhu wose wakalya, wakeguta. Hanyuma i wejizwa wakatondoleza i vibegulwa vyono vyasigala, wakamemya nhoto yikumi na nyejete. 21Na wono walya wali waficile nha wanhu elufu yihano walume du, ninga i wacekulu ne wana wadodo wose wono wali wali baho, wo si wawalilizwa mwi'walo lilyo. 22Hobaho du Yesu yakawalajiliza i wejizwa wakwe wenjile mu ngalawa, wamulongolele ku nhumbi nzagwe ye lilamba, lono mwene yali yakali yakuwelaga i wanhu. 23Na lono yali yakondya kuwelaga wanhu, yakabita kwi'tunda yali wene, ho yasume kulomba. Na lono lizuwa lyali lyaswa, ha cinyamihe, u mwene yali yali kuko yali wene, 24na mwi'pango lilyo ingalawa nayo yali yakondya kufika behi na ha ciligati ye lilamba, ninga yikugazwa ne mawingo ge lilenga, vyono vyali vidomile ne mbeho. 25Ne cilo lono kwali kweza behi no kudandawuka, Yesu yakawabitila i wejizwa, yakujenda mucanyha ye malenga, 26I wejizwa wakwe waza muwona yakujendela mucanyha ye malenga. Oo! Wakogopa muno muno, wakatya, “Nye, Yisoce.” Baho wakazoza muno muno so woga. 27Baho baho du nayo Yesu yakalongana nawo, yakawatya, “Nye wendece, mutule, nha yo nene. Mulece kogopa!” 28Nayo Petelo yakamutya, “Muwaha, hono mbeka yo gwegwe, wunhezaje nane, njende mucanyha mu malenga nize kwako.” 29Yesu yakatya, “Ale, wuze.” Hobaho Petelo yakawa kutima mu ngalawa, yakawa kujenda mucanyha mu malenga, yakumubitila Yesu. 30Ninga mwene Petelo vyaza kwitang'anila ne mbeho yono yakukunzaga muno, yakawa kwinjilwa no woga, hobaho du yakawa kwanza kudodomela, baho yakalila kwa yizi yiwaha, akuno yakutya, “Gwe Muwaha, wumhonye!” 31Hobaho nayo Yesu yakawugolola muwoko wakwe, yakamwibata, akuno yakumutya, “Lanje ta 'gwe, mono wina u wihuwilo wudodo! So cici lo wukwihwelela?” 32Hobaho wakawa kwinjila mu ngalawa, ne mbeho nayo hodu yikawa kutula. 33Na wose wono wali wali mu ngalawa, wakamuhemba, wakatya, “Mbeka agwe yo gwegwe go Mwana wo Mulungu.” 34Nawo wakalilowoka lilamba, wakafika ku yisi ya Genesaleti. 35Ne wanhu wa kuko wali weza kumumanya vyono yo Yesu, hodu wakawa kwanza kuzitandaza i zinghani zakwe mu yisi yiyo yose. Hobaho wakamuletela Yesu, i watamwa wose ku wulawa mu yisi yiyilya yose, 36nawo wakamulomba yawakombole watamwa, ho wapamize du hambe limhembo lye civwalo cakwe, nawo wose wono wamupamiza, wakapona.

will be added

X\